इब्रानीमन 3 - सादरी नवाँ नियम

यीशु मूसा से महान अहे

¹ हे मोर संगी बिसवासी भाईमन जेमन परमेश्‍वर केर हेका, तोहरेमन स्वरग में उकर से मिलेक लगिन बोलाल जाय हा, यीशु मसीह उपरे धेयान देवा जे हमर लगिन परमेश्‍वर केर शुभ समाचार केर दूत आउर महापुरोहित हेके।

² उ जिम्मेदारी से सोउब काममन के करलक, जेके करेक लगिन परमेश्‍वर उके ठहराय रहे। जइसन मूसा हों ईमानदारी से उ सोउब काम के पूरा करलक, जेके करेक लगिन परमेश्‍वर आगया देई रहे।

³ ठीक जइसन एगो घर बनाएक वाला आदमी घर से बगरा आदर पावेला, तइसनेहें यीशु मसीह हों मूसा से बगरा आदर पावेक केर लायक अहे।

⁴ सोउब घरमन के आदमीमन बनायना, मगर परमेश्‍वर सोउब कुछ के सिरजाय हे।

⁵ मूसा तो परमेश्‍वर केर सोउब आदमीमन लगिन सेवक नियर बिसवास लायक रहलक, आउर उ सोउब गोइठमन के देखालक जेके परमेश्‍वर पाछे से करेक वाला रहे।

⁶ मसीह एगो बेटा नियर परमेश्‍वर केर परिवार में बिसवास लायक अहे, अगर हमरे अपन साहस आउर उ आसरा में बिसवास के बनाय के राखिला, तो हमरे उकर परिवार हेकी।

बिसवास नी करेक वालामन के चेतावनी

⁷ से लगिन जइसन कि पवितर किताब में पवितर आत्मा कहेला, “अगर आइज तोहरेमन उकर आवाज के सुनाथा,

⁸ तो अपन मन के कठोर ना करा, जइसन कि तोहरे केर पुरखामन परीक्षा केर समय में सुनसान ठाँवमन में परमेश्‍वर केर बिरोध में बक-झक करलैं आउर सोउब मोइर गेलैं।

⁹ हूवाँ तोहरे केर पुरखामन चालीस बरिस तक मोर महान काममन के देइख के हों मोर बिरोध करते मोके परइख रहैं।

¹⁰ इकर चलते मोंय उ समय केर आदमीमन से खिसाल रहों, आउर कहलों, ‘इमन मोके ठोकराय देलैं, आउर जे मोंय उमन के आगया देई रहों उके मानेक से इनकार काइर देलैं।’

¹¹ तब मोंय खिसाय के आउर किरिया खाय के कहलों, ‘जे देस में उमन के मोंय आराम देवेक वाला रहों, हूवाँ उमन ढूकेक नी पारबैं।’”

¹² हे बिसवासी भाईमन, सावधान रहा कि तोहरेमन में एइसन बुरा आउर अबिसवासी मन ना होवोक, जे जिंदा परमेश्‍वर केर पिछे चलेक से इनकार काइर देओक।

¹³ बल्कि जखनोहों तोहरे सुनाला कि पवितर किताब कहेला, “आइज केर दिन तक,” तो तोहरे हर दिन एक दोसर के बेस जिंदगी जियेक लगिन उसकाते रहा, एइसन ना होवोक कि तोहर में से केऊ आदमी पाप केर धोखा में आय के कठोर होई जाओक।

¹⁴ काले कि अगर हमरे आखरी तक मजबूती से अपन पहिले जइसन बिसवास में बनल रहब, तो हमरे मसीह केर संगे हिस्सेदार बाइन जाइला।

¹⁵ जइसन कि पवितर किताब में लिखल अहे, “अगर आइज तोहरेमन उकर आवाज के सुनाथा, तो अपन मन के कठोर ना करा, जइसन कि तोहरे केर पुरखामन परीक्षा केर समय में काइर रहैं।”

¹⁶ भला केमन परमेश्‍वर केर आवाज के सुइन के हों परमेश्‍वर से बक-झक करलैं? उ सोउब आदमीमन जेमन मूसा केर अगुवाई से मिसर देस से निकइल रहैं।

¹⁷ आउर चालीस बरिस तक सचमुच में परमेश्‍वर उमन से खिसाल रहे जेमन पाप करलैं, आउर उमन सुनसान ठाँव में मोइर गेलैं।

¹⁸ आउर परमेश्‍वर किरिया खाय के कहलक कि उमन उ देस में कहियो ढूकेक नी पारबैं, जेकर में मोंय उमन के आराम देतो, सचमुच में परमेश्‍वर इ सोउब गोइठमन के उमन केर बारे में कइह हे जेमन आगया नी मानलैं।

¹⁹ इ नियर हमरे महसूस करिला कि उमन अबिसवास केर चलते ढूकेक नी पारलैं।