इब्रानीमन 2 - सादरी नवाँ नियम

महान छुटकारा

¹ से लगिन हमरे के जे सिखाल जाय रहे, उकर पालन करेक लगिन बगरा सावधान होवेक केर जरुरत अहे, तब हमरे सच्चाई केर डहर से नी भटकब।

² काले कि मूसा केर नियम जेके परमेश्‍वर स्वरगदूतमन केर जरिया से देई रहे सच्चा साबित होलक, आउर जे आदमीमन उ नियम के नी मानलैं परमेश्‍वर उमन के दंड देलक।

³ अगर हमरेमन एइसन बड़का छुटकारा के ठुकराय देवब, तो हमरे कैसे बचेक पारब। इ छुटकारा केर हकवा सोउब से पहिले प्रभु यीशु करलक, आउर फिन जेमन प्रभु यीशु से सुनलैं, उमन उ मनक संदेश के हमरेमन लगिन सच्चा साबित करलैं।

⁴ आउर इकर अलावा परमेश्‍वर हों अपन इच्छा केर मोताबिक चिन्हामन आउर चमत्कार, आउर अचरज केर काममन, आउर सोउब रकम केर शक्ति केर काममन, आउर पवितर आत्मा केर बरदानमन के बाँटेक से इकर सबूत देते रहलक।

मसीह हमरे केर छुटकारा देवाइया

⁵ परमेश्‍वर उ आवेक वाला दुनिया के जेकर बारे में हमरे गोठियाथी, स्वरगदूतमन केर अधीन नी करलक मगर यीशु केर अधीन काइर देलक।

⁶ पवितर किताब में कोनों ठिना इ गवाही देवल अहे कि आदमीमन का हेकैं कि तोंय हे परमेश्‍वर उमन उपरे नजइर करबे, या उमन केर चिंता करबे? उमन आदमी से बगरा आउर कोनों ना लगैं।

⁷ तोंय उके स्वरगदूतमन से थोरहें समय लगिन कम बनाले, आउर तोंय उके एगो राजा नियर महिमा आउर आदर देई हिस।

⁸ तोंय सोउब चीजमन केर उपरे उके अधिकार देई हिस, इ लगिन जबकि परमेश्‍वर सोउब कुछ के उकर अधिकार में काइर देई हे, तो एइसन कोनोवें नखे जे उकर अधिकार में नखे, मगर हमरे आइज तक सोउब कुछ उकर अधिकार में नी देखिला।

⁹ मगर हमरे यीशु के जे स्वरगदूतमन से थोरहें कम करल जाय रहे, माउत केर दुःख उठाएक केर चलते महिमा आउर आदर केर मुकुट पिंधल देखिला, काले कि परमेश्‍वर केर किरपा से हरेक आदमीमन लगिन उ मोइर गेलक।

¹⁰ परमेश्‍वर जेकर लगिन सोउब कुछ अहे, आउर जेकर जरिया से सोउब कुछ अहे, उ परमेश्‍वर के एहे बेस लगलक कि उ ढेइर आदमीमन के महिमा में पोंहचाओक, तो परमेश्‍वर छुटकारा देवाइया केर दुःख उठाएक केर द्वारा सिद्ध करोक कि इ उचित काम हेके।

¹¹ काले कि पवितर कराइया आउर जेमन पवितर करल जायना, सोउब एक हें आबा मतलब परमेश्‍वर केर संतान हेकैं, इकरे चलते यीशु उमन के भाई-बहिन कहेक से नी लजायला।

¹² मगर कहेला, “जे भला काम तोंय मोर लगिन काइर हिस, उके मोंय अपन आदमीमन के सुनामूँ, आउर सभा केर माझे में मोंय तोर भजन गामूँ।”

¹³ उ फिन कहेला “मोंय उकर उपरे भरसा रखमूँ,” आउर उ फिन कहेला, “देख, मोंय उ भाई-बहिन केर संगे अहों जेके परमेश्‍वर मोके देई हे।”

¹⁴ से लगिन जबकि परमेश्‍वर केर छउवामन माँस आउर लोहू से बाइन हैं, तो यीशु हों खुद हें उमन नियर माँस आउर लोहू केर आदमी बाइन गेलक, ताकि अपन माउत केर जरिया से उके, जेके माउत केर उपरे शक्ति मिल रहे, मतलब शैतान के नाश काइर देवोक।

¹⁵ इ नियर प्रभु यीशु उमन के छोड़ालक जेमन माउत केर डार से अपन पूरा जिंदगी गुलाममन नियर बितात रहैं।

¹⁶ काले कि प्रभु यीशु तो स्वरगदूतमन केर निहीं बल्कि अब्राहम केर बंश केर मदइत करेक लगिन चिंता करेला।

¹⁷ इ लगिन कि उके आउर बिसवासी भाई-बहिनमन नियर बाइन जाएक बिलकुल हें जरुरी रहे, इ नियर उ परमेश्‍वर केर महापुरोहित बनलक जे कि दयालु आउर बिसवास लायक अहे, ताकि उकर बलि केर जरिया से आदमीमन के उमन केर पापमन से क्षमा मिलेक पारोक

¹⁸ यीशु केर परीक्षा करल गेलक आउर उ खुद दुःख उठाय हे, से लगिन उ उमन केर हों मदइत करेक पारेला जेमन केर परीक्षा होवेला।