इब्रानीमन 13 - सादरी नवाँ नियम

मसीही जिंदगी जियेक केर आगया

¹ भाई-बहिन नियर एक दोसर से प्रेम करते रहा।

² गोतियामन केर सेवा-सुसइर करेक ना छोड़बा, काले कि एइसन काइर के केतना आदमीमन अनजाने में स्वरगदूतमन केर सेवा-सुसइर काइर हैं।

³ कैदीमन केर साथ एइसन ब्यवहार करा कि उमन के एइसन महसूस होवोक, जइसन कि तोहरे हों कैद में अहा, आउर जेमन सताल जायना उमन केर संगे एइसन रहा, जइसन कि तोहरे हों अपन काया में उमन केर बथा के महसूस कराथा।

⁴ बिहा केर आदर करा, आउर बिहाउ जनाना आउर मरद तोहरे एक दोसर लगिन बिसवास लायक बनल रहा, काले कि परमेश्‍वर ब्यभिचारीमन केर आउर दोसर जनानामन से रिश्ता बनाएक वालामन केर न्याय करी।

⁵ तोहरे के धन केर लोभ नी करेक चाही, तोहरे ठिना जे कोनों अहे उकरे में संतोष रहा, काले कि परमेश्‍वर खुद कइह हे “मोंय तोके कहियो नी छोड़मूँ, आउर ना कहियो ठोकरामूँ।”

⁶ इ लगिन हमरे निडर होई के कहिला कि प्रभु मोर मदइतगार हेके, मोंय नी डरामूँ, आदमीमन मोके का करेक पारबैं।

⁷ जेमन तोहर अगुवा रहैं, आउर जेमन तोहरेमन के परमेश्‍वर केर बचन सुनाय हैं, उमन के याइद करा आउर उ मनक चाइल-चलन के धेयान से देखा कि उमन कइसन जिंदगी जिलैं आउर मोरलैं। आउर उमन केर बिसवास देइख के तोहरे हों उमन नियर परमेश्‍वर उपरे बिसवास करा।

⁸ यीशु मसीह काइल आउर आइज आउर जुग-जुग लगिन एक जइसन अहे, उ कहियो नी बदलेला।

⁹ से लगिन रकम-रकम केर आउर अजीब उपदेसमन से ना भरमाय देवल जबा, काले कि तोहरे केर मन लगिन इ भला होवी कि तोहरे परमेश्‍वर केर किरपा से मजबूत बनल रहा, ना कि खाएक केर नियममन के माइन के, जेके माइन के केकरो फायदा नी होलक।

¹⁰ हमरे ठिना एक एइसन बेदी अहे, जेकर में से खाएक केर अधिकार तंबू में सेवा करेक वाला पुरोहित के नखे।

¹¹ पहिला करार केर मोताबिक हर साल जे जानवरमन केर लोहू के महापुरोहित पाप बलि केर लगिन, महा पवितर ठाँव में लेई जायला, उ जानवरमन केर काया तंबू केर बाहरे पोड़ाल जायला।

¹² इकरे चलते यीशु हों आदमीमन के अपनेहें लोहू से पवितर करेक लगिन यरुशलेम शहर केर बाहरे दुःख उठालक आउर प्राण देलक।

¹³ से लगिन आवा, हमरे बलिदान चढ़ाएक केर यहूदी नियम के छोइड़ के यीशु उपरे बिसवास करब आउर उकर निंदा के अपन उपरे उठाब। आउर छावनी केर बाहरे निकइल जाब।

¹⁴ काले कि हिंयाँ इ धरती में हमरे केर सोउब दिन लगिन रहेक केर घर नखे, बल्कि हमरे के मिलेक वाला एगो नवाँ घर केर खोज में हमरे अही।

¹⁵ इ लगिन आवा, हमरे यीशु मसीह केर द्वारा अपन होंठ से लगातार परमेश्‍वर केर स्तुति करब, एहे हमरे केर उकर लगिन बलिदान हेके।

¹⁶ मगर भलाई करेक आउर जे कोनों तोहर ठिना अहे, उके उमन के देवेक लगिन पिछे ना रहबा, जेमन के जरुरत अहे, एक दूसरा केर मदइत करेक ना भुलाबा, काले कि परमेश्‍वर एइसन बलिदानमन से खुश होवेला।

¹⁷ अपन आत्मिक अगुवामन केर गोइठमन के माना आउर उमन जे कहैना उके करा, काले कि उमन तोहरे के धेयान से देखैना ताकि तोहरे भटइक ना जबा, आउर उमन के अपन सेवा केर बारे में परमेश्‍वर ठिना हिसाब देवेक पड़ी, आउर इ काम के उमन उदास होई के निहीं, बल्कि खुशी से करोक, काले कि उदास होई के करेक वालामन के कोनों फायदा नी होवी।

¹⁸ हमरे लगिन प्रार्थना करते रहा, काले कि हमरे पक्का जानिला कि हमरे केर बिवेक शुद्ध अहे, आउर हमरे सोउब काममन में जेके हमरे करिला, परमेश्‍वर के आदर देवेक चाहिला।

¹⁹ आउर प्रार्थना करेक लगिन मोंय तोहरेमन के आउर हें समझावना, ताकि मोंय तोहर ठिना तुरते फिन से आवेक पारमूँ।

^20-21 आउर अब शांति केर परमेश्‍वर, जे हमर प्रभु यीशु के मोरल में से फिन जियालक, तोहरे के उकर इच्छा के पूरा करेक लगिन सोउब रकम से तेयार करोक, यीशु मसीह केर शक्ति से परमेश्‍वर तोहर में उ काममन के करुवाओक, जे उके खुश करेला। यीशु मसीह अपन लोहू बहाय के बलिदान होवेक केर चलते, भेड़ीमन केर महान चरवाहा बनलक, जेकर से जुग-जुग केर करार उपरे मोहर लाइग गेलक। उकर महिमा लगातार होते रहोक आमीन।

²² हे बिसवासी भाईमन, मोंय तोहरे से बिनती करोना कि इ संदेश के धीरज से सुना, जेके मोंय तोहरे के उसकाएक लगिन लीख हों।

²³ तोहरेमन इ जाइन लेवा कि तीमुथियुस हमर बिसवासी भाई जेहेल से छूइट जाय हे, आउर अगर उ जल्दी आय जाई तो मोंय उके संगे लेई के तोहर से भेंट करमूँ।

²⁴ अपन सोउब अगुवामन आउर सोउब परमेश्‍वर केर आदमीमन के जोहार करा। इटली शहर केर बिसवासीमन तोहरे के जोहार कहैना।

²⁵ तोहरे सोउबमन केर उपरे परमेश्‍वर केर किरपा होते रहोक। आमीन।