इब्रानीमन 10 - सादरी नवाँ नियम

सिद्ध बलिदान

¹ मूसा केर नियम केर पुरना रीति असली चीजमन ना लगे, मगर आवेक वाला बेस चीजमन केर सिरिफ छाँई हेके, जेके मसीह हमरेमन लगिन पूरा काइर हे। से लगिन आदमीमन मूसा केर नियम केर अधीन रइह के एक हें किसिम केर बलिदान हर साल चढ़ायना, मगर इ बलिदानमन कहियो उमन के सिद्ध बनाएक नी पारी।

² अगर मूसा केर नियम उमन के सिद्ध बनातक तो बलिदान चढ़ाएक बंद होई जातक, आउर आराधना करेक वालामन सचमुच में अपन पापमन से शुद्ध होई जातैं, आउर उमन अपन मन में पाप केर दोष महसूस नी करतैं।

³ मगर उमन के हर साल पापमन केर याइद होते रहेला।

⁴ काले कि साँढ़मन आउर बकरामन केर लोहू पापमन के क्षमा करेक हें नी पारी।

^5-6 सेकरे चलते मसीह दुनिया में आवेक बेरा परमेश्‍वर से कहलक कि बलिदानमन आउर भेंटमन तोंय नी चाहले, एक बलिदान जेकर में जानवर के आइग में पोड़ाय के चढ़ाल जायला, आउर दूसरा बलिदान जेकर में पापमन केर क्षमा लगिन चढ़ाल जायला, इमन से तोंय खुश नी होले, से लगिन तोंय मोके बलिदान चढ़ाएक ले आदमी बनाले।

⁷ तब मसीह परमेश्‍वर से कहलक देख, मोंय आय जाय हों, पवितर किताब में मोर बारे में लिखल अहे ताकि हे परमेश्‍वर तोर इच्छा के पूरा करमूँ।

⁸ मूसा केर नियम सिखायला कि भेंट आउर बलिदान पाप केर चलते चढ़ाल जायला, मगर यीशु मसीह काले कहेला कि परमेश्‍वर उमन के नी चाहेला।

^9-10 आउर इकर पाछे उ एइसन कहलक, “हे परमेश्‍वर मोंय तोर इच्छा के पूरा करेक लगिन आय हों,” आउर यीशु मसीह परमेश्‍वर केर इच्छा केर मोताबिक अपन काया के एके बेर बलिदान केर रूप में चढ़ाय देलक, आउर इकर से परमेश्‍वर हमरे के पवितर करलक। इ नियर मसीह पहिला करार केर बलिदान के हटाय देलक, ताकि उ दूसरा करार के शुरु करोक।

¹¹ बेदी केर भीरे सेवा करेक वाला पुरोहित रोज दिन एक हें नियर बलिदान के दोहराय-दोहराय के चढ़ायला, जे कहियो पाप के दूर करेक नी पारी।

¹² मगर यीशु मसीह तो पापमन केर क्षमा लगिन सोउब समय ले एक हें बेर खुद के बलिदान काइर के चढ़ाय देलक आउर परमेश्‍वर केर भतखाइया आरा बाइठ गेलक।

^13-14 आउर एक हें बलिदान से उ, उमन के जेमन पवितर बनैना, सोउब दिन लगिन सिद्ध बनाय देलक। आउर अब यीशु अपन दुश्मनमन के अपन अधिकार केर नीचे करेक केर आसरा देखाथे।

¹⁵ आउर पवितर आत्मा हों हमरे के एहे गवाही देवेला, काले कि उ पहिले कइह रहे,

¹⁶ कि प्रभु कहेला जे करार मोंय उ दिनमन केर पाछे उमन से करमूँ, उ इ हेके कि मोंय अपन नियममन के उमन केर मन में याइद दिवामूँ आउर उमन केर हिरदय में लिखमूँ।

¹⁷ फिन परमेश्‍वर इ कहेला कि मोंय उमन केर पापमन के आउर उमन केर गुन्हा केर काममन के फिन कहियो याइद नी करमूँ।

¹⁸ आउर जब परमेश्‍वर हमरे केर पापमन के क्षमा काइर देलक, तो अब बलिदान चढ़ाएक केर कोनों जरुरत नखे।

परमेश्‍वर केर भीरे जाएक केर डहर

¹⁹ से लगिन हे बिसवासी भाईमन, यीशु मसीह हमरे लगिन लोहू बहाय के अपन जिंदगी के बलिदान काइर देलक, सेकर चलते हमरे हिम्मत केर साथ स्वरग में महा पवितर ठाँव में ढूकेक पारिला।

²⁰ बलिदान केर रूप में मोरेक केर चलते, मसीह परदा से होई के स्वरग केर पवितर ठाँव में ढूकलक, आउर नवाँ डहर बनालक जेकर से हमरे जिंदगी पावब।

²¹ हमरे ठिना एगो एइसन महापुरोहित अहे, जे परमेश्‍वर केर घर केर सोउब आदमीमन उपरे राइज करेला।

²² तो आवा हमरे अपन मन के शुद्ध काइर के आउर मसीह केर लोहू के हिरदय में छिड़काय के, आउर सफा पानी से अपन काया के धोई के, सच्चा मन आउर पूरा बिसवास केर संगे परमेश्‍वर ठिना आवब।

²³ अब आवा हमरे जे आसरा केर बारे में कबूल काइर ही, उके बेगर शंका करले पोक्ता से धाइर रहब, काले कि परमेश्‍वर जे करार काइर हे उके पूरा करेक लगिन सच्चा अहे।

²⁴ आवा हमरे एक दोसर के प्रेम करेक लगिन उसकाते रहब आउर भला काममन के करते रहब।

²⁵ आउर परमेश्‍वर केर आराधना करेक लगिन एक दोसर केर संगे जमा होवेक नी छोड़ब, जइसन कि केतना बिसवासीमन करैना, मगर हमरे के एक दूसरा के उसकाएक आउर चेताएक अहे, खास काइर के अब जबकि यीशु मसीह केर दोबारा घूइर आवेक केर बेरा भीरे पोंहचाथे।

²⁶ हमरे के उ चीजमन के करेक जरुरी अहे, काले कि सच्चाई केर शुभ समाचार के जानल केर पाछे, हमरे जाइन बुइझ के पाप करते रहब, तो हमरे केर पापमन के दूर करेक लगिन आउर कोनों बलिदान बचल नखे।

²⁷ मगर उमन लगिन परमेश्‍वर केर भयानक न्याय आउर हिदकल आइग, जे उकर बिरोधीमन के नाश काइर देवेला, बचल अहे।

²⁸ जबकि मूसा केर नियम के नी मानेक वाला केऊ आदमी केर बिरोध में, दूई या तीन झन गवाही देवैना, तो उके बेगर दया करले माइर मोराल जायला।

²⁹ अगर मूसा केर नियम केर मोताबिक एइसन दंड अहे, तो उ आदमी केर दंड आउरे बगरा होवी जे परमेश्‍वर केर बेटा के घिरना करेला, काले कि उ परमेश्‍वर केर बेटा केर आदर नी करलक आउर उके अपन गोड़ से रवाइंद देलक। उ मसीह केर लोहू के अशुद्ध मानलक, जे लोहू से परमेश्‍वर उके पवितर करेक लगिन नवाँ करार के शुरु काइर हे, आउर उ पवितर आत्मा केर हों अपमान करलक जेकर जरिया से उ किरपा पाय रहे।

³⁰ उमन ढेइर कठोर दंड पाबैं, काले कि परमेश्‍वर इ कइह हे, “बदला लेवेक मोर काम हेके, मोंय हें बदला देमूँ।” आउर फिन एहो कइह हे, “प्रभु अपन आदमीमन केर फैसला करी।”

³¹ जिंदा परमेश्‍वर केर हाँथ से दंड पावेक ढेइर भयानक अहे।

³² पिछला दिनमन के याइद करा जब तोहरे सच्चाई के जानला, तब तोहरे ढेइर पीड़ामन के साइह के कठिन दुःख उठाला आउर स्थिर रहला।

³³ तोहर में से थोरेकमन के आदमीमन केर भीरे अपमान करल गेलक आउर सताल गेलक, आउर तोहरे थोरेकमन अपन इच्छा से उमन केर संगे शामिल होला जेमन केर अपमान करल गेलक आउर सताल गेलक।

³⁴ तोहरेमन कैदीमन केर दुःख में हों दुःखी होला, आउर अपन सम्पति के हों खुशी से लुटेक देला, काले कि तोहरे जानाला कि तोहरे ठिना एखनो उ चीजमन अहे, जेके देवेक केर परमेश्‍वर करार काइर हे, उ चीजमन इ दुनिया केर सम्पति से बगरा बढ़ियाँ अहे आउर जुग-जुग लगिन अहे।

³⁵ से लगिन बिसवास करेक ना छोड़ा ताकि तोहरे परमेश्‍वर से बड़का इनाम के पाबा।

³⁶ तोहरे के लगातार बिसवास में धीरज से आसरा देखते रहेक चाही, तब तोहरे परमेश्‍वर केर इच्छा के पूरा करेक पारबा, आउर तोहरे उ सोउब के पाबा जेकर करार परमेश्‍वर तोहरे से काइर हे।

³⁷ काले कि पवितर किताब में लिखल अहे, “परमेश्‍वर कहेला, अब ढेइर थोर समय बाइच हे कि आवेक वाला आवी आउर देरी नी करी।

³⁸ आउर जे आदमी के मोंय धरमी बनाय हों उ बिसवास से जिंदा रही, मगर उ मोर उपरे बिसवास करेक छोइड़ देवी, तो मोंय सचमुच में उकर से खुश नी होमूँ।”

³⁹ मगर हमरे उमन में से ना लगी, जेमन परमेश्‍वर से पिछे घूइर जायना आउर नाश होई जायना, मगर हमरे उमन में से हेकी, जेमन बिसवास करैना आउर अपन जीउ के बचाय लेई हैं।