गलातियनमन 6 - सादरी नवाँ नियम

एक दोसर केर मदइत करा

¹ हे बिसवासी भाईमन, अगर केऊ आदमी कोनों पाप में धराय हों जाई, तो तोहरेमन जे पवितर आत्मा केर अगुवाई में चलाला, नरम भाव से उके धरम केर डहर में चलेक लगिन मदइत करा। आउर सावधान रहबा ताकि तोहरे खुद पाप करेक लगिन भटकाय देवल ना जबा।

² हमर में से जेमन दुःखमन में अहैं, तो हमरे के उमन केर मदइत करेक चाही, एहे नियर हमरे मसीह केर नियम के मानिला।

³ अगर केऊ अपने के समझेला कि मोंय खास आदमी हेकों, जबकि उ खास आदमी ना लगे, तो खुद के उ धोखा देवाथे।

⁴ हरेक झन अपन खुद केर काममन के जाँइच लेवोक, अगर उ बेस काम काइर हे तो उ अपन काम केर बारे में घमंड करेक पारेला। मगर उके अपन काम केर बराबरी दोसरमन केर काम से नी करेक चाही।

⁵ काले कि हमर में से हरेक आदमी के अपन खुद केर काममन केर जिम्मेदारी उठाएक चाही।

⁶ जे बचन केर शिक्षा पावेला, उके जे कोनों उकर ठिना अहे, उकर में सिखाएक वालामन के हों भागी करेक चाही।

⁷ खुद के धोखा ना देवा, केऊ कहियो परमेश्‍वर के मूरख बनाएक नी पारी, काले कि जे जइसन काम करी उके ओइसनेहें फल मिली।

⁸ अगर केऊ आदमी अपन काया केर इच्छामन के पूरा करेला, तो उके जुग-जुग केर दंड मिली। आउर अगर केऊ पवितर आत्मा केर इच्छामन के पूरा करेला, तो उके जुग-जुग केर जिंदगी मिली।

⁹ हमरे के भला काम करेक में निराश नी होवेक चाही, काले कि अगर हमरे हार नी मानब, तो परमेश्‍वर केर अपन समय में हमरे के इनाम मिली।

¹⁰ इ लगिन जहाँ तक हमरे के मोका मिलेला, हमरे के सोउब आदमीमन केर भलाई करेक अहे, खास काइर के बिसवासी भाईमन केर।

आखरी चेतावनी आउर जोहार

¹¹ देखा, मोंय कइसन बड़े-बड़े अक्षरमन में तोहरेमन के अपन हाँथ से लीख हों।

¹² जेमन यहूदीमन के खुश करेक चाहैना, उमन तोहरे केर खतना करुवाएक लगिन कहैना, उमन एइसन इ लगिन करैना, ताकि उमन के इ बताएक केर चलते कि सिरिफ मसीह केर क्रूस उपरे भरसा करेक चाही, सताल ना जाओक।

¹³ काले कि खतना करुवाल यहूदीमन खुद तो मूसा केर सोउब नियम के नी मानैना, मगर तोहरे केर खतना करुवाएक इ लगिन चाहैना, ताकि उमन दोसर यहूदीमन ठिना घमंड से इ बताएक पारबैं कि तोहरे केर खतना उमन केर चलते होई हे।

¹⁴ मगर मोंय क्रूस उपरे चढ़ाल हमर प्रभु यीशु मसीह के छोइड़ आउर कोनों गोइठ में घमंड करेक नी चाहोना। काले कि उकर माउत केर चलते, जे कोनों चीज इ दुनिया केर आदमीमन लगिन किमती अहे, मोर लगिन उकर कोनों कीमत नखे। आउर दुनिया केर आदमीमन केर बिचार से मोर हों कोनों कीमत नखे।

¹⁵ काले कि खतना करुवाएक से चाहे नी करुवाएक से कोनों फरक नी पड़ेला, मगर परमेश्‍वर पवितर आत्मा केर शक्ति से तोहरे के एगो नवाँ आदमी बनाय हे, एहे खास गोइठ हेके।

¹⁶ जेमन इ नियम के मानैना, उमन उपरे आउर परमेश्‍वर केर इसराइल उपरे दया आउर शांति बनल रहोक।

¹⁷ केऊ मोके आउर दुःख ना देवोक, काले कि मोर काया में जे दाग अहे, उ इ साबित करेला कि मोंय यीशु केर सेवक हेकों।

¹⁸ हे बिसवासी भाईमन, हमर प्रभु यीशु मसीह केर किरपा तोहर आत्मा केर संगे रहोक। आमीन।