गलातियनमन 2 - सादरी नवाँ नियम

यीशु केर चुनल खास चेलामन बटले पौलुस केर काम के सच्चा मानेक

¹ चौदह बरिस केर पाछे मोंय बरनाबास केर संगे फिन यरुशलेम शहर गेलों, आउर तीतुस के हों संगे लेई गेलों।

² मोंय हूवाँ इ लगिन गेलों काले कि परमेश्‍वर मोके जाएक कइह रहे। जब मोंय हूवाँ गेलों, तो हूवाँ केर बढ़ियाँ समझल जाएक वाला अगुवामन से अलगे मिललों आउर उ शुभ समाचार केर बारे में बतालों, जेके मोंय परजाइत आदमीमन केर माझे परचार काइर रहों। ताकि जे मोंय बितल समय में काइर हों, चाहे जे मोंय आवेक वाला समय में करमूँ उ बेकार ना होवोक।

^3-5 हूवाँ थोरेक आदमीमन एइसन अहैं, जेमन इ भरसा नी करैना कि सिरिफ यीशु हें उमन के छुटकारा देवी, मगर उमन छुटकारा पावेक लगिन यहूदी नियममन उपरे हों भरसा करैना। उमन हमरे केर जिंदगी में कोनों दोष खोजेक लगिन लूइक के आवेक नियर आय रहैं, काले कि मसीह हमरे के आजाद काइर हे, उमन हमरे के सोउब यहूदी नियममन के मनुवाय के सचमुच में गुलाम बनाएक चाहैना। मगर हमरे थोरेक देरी हों उमन केर गोइठ के नी मानली, ताकि तोहरेमन सच्चाई केर शुभ समाचार उपरे बिसवास में बनल रहबा। उमन कहैना हमर संगी बिसवासी भाई तीतुस जे यूनानी हेके, उकर खतना होवेक चाही, मगर आखरी में अगुवामन उके खतना करुवाएक लगिन दबाव नी देलैं।

⁶ फिन यरुशलेम शहर केर कलीसिया केर अगुवामन मोर शिक्षा में आउर कोनों नी जोड़लैं। उ अगुवामन कइसन अहैं इकर से मोके कोनों फरक नखे, काले कि परमेश्‍वर केकरो फैसला उकर बाहरी चीज के देइख के नी करेला।

⁷ मगर अगुवामन देखलैं कि जइसन यहूदीमन लगिन शुभ समाचार परचार केर काम पतरस के सोंपल जाय हे, तइसनेहें परजाइतमन लगिन मोके शुभ समाचार परचार केर काम सोंपल जाय हे।

⁸ काले कि जे परमेश्‍वर पतरस के यहूदीमन केर माझे यीशु केर चुनल खास चेला बनेक लगिन ठहरालक, ओहे परमेश्‍वर मोके परजाइत आदमीमन केर माझे यीशु केर चुनल खास चेला बनेक लगिन ठहराय हे।

⁹ आउर जेमन कलीसिया केर खूँटा समझल जायना, मतलब याकूब, पतरस (कैफा) आउर यूहन्ना, उमन परमेश्‍वर केर किरपा केर उ बरदान के जे मोके मिल हे जाइन गेलैं। उमन मोके आउर बरनाबास के अपन संगे काम करेक वाला समइझ के खुशी से अपन भतखाइया हाँथ के हिलालैं। उमन इकर लगिन सहमत होलैं कि हमरे परजाइत आदमीमन ठिना जाब आउर उमन यहूदीमन ठिना।

¹⁰ उमन हमरे से सिरिफ इ बिनती करलैं कि हमरे गरीबमन केर मदइत करब, आउर इ ओहे काम हेके जेके मोंय करेक चाहत रहों।

पौलुस बटले पतरस केर बिरोध

¹¹ एक दिन जब पतरस अंताकिया शहर में आलक, तो मोंय आदमीमन केर सामने उकर बिरोध करलों, काले कि उ सही काम नी करत रहे।

¹² पतरस उ बिसवासीमन केर संगे खात-पियत रहे जेमन परजाइत रहैं, मगर जब याकूब बटले भेजल थोरेक बिसवासीमन यरुशलेम शहर में आलैं, तो परजाइत बिसवासीमन केर संगे मेल-जोल रखेक आउर खाएक पियेक छोइड़ देलक। काले कि उ खतना केर रीति के मनुवाएक वाला यहूदी बिसवासीमन से डरात रहे।

¹³ आउर उकर संगे अंताकिया शहर केर थोरेक यहूदी बिसवासीमन हों छल-कपट करलैं। हिंयाँ तक कि बरनाबास हों परजाइत बिसवासीमन केर संगे मेल-जोल रखेक छोइड़ देलक।

¹⁴ जब मोंय देखलों कि जे ब्यवहार उमन करत रहैं उ शुभ समाचार केर सच्चा शिक्षा केर बिरोध में रहे, तो मोंय आदमीमन केर सामने पतरस से कहलों, “तोंय एगो यहूदी होई के हों परजाइतमन केर रीति रिवाजमन के मानिसला आउर यहूदीमन केर रीति रिवाजमन के नी मानिसला, तो तोंय परजाइत आदमीमन के हमरे यहूदीमन केर रीति रिवाज के काले मनुवाएक चाहिसला?”

बिसवास से धरमी बनेक

¹⁵ हमरे तो जनम से यहूदी हेकी, आउर पापी कहाएक वाला परजाइत आदमीमन में से ना लगी।

¹⁶ हमरे यहूदी बिसवासीमन जानिला कि मूसा केर नियम के माइन के केऊ हों आदमी परमेश्‍वर केर देखेक में धरमी नी बनेला। से लगिन हमरे यीशु मसीह उपरे बिसवास करली, काले कि हमरे मूसा केर नियम के माइन के निहीं मगर सिरिफ यीशु मसीह उपरे बिसवास काइर के धरमी बनब। इ लगिन कि मूसा केर नियम के माइन के केऊ हों धरमी बनेक नी पारेला।

¹⁷ थोरेक यहूदीमन सोचैना कि हमरे पाप काइर ही, काले कि हमरे मूसा केर नियम के मानेक छोइड़ के, धरमी बनेक लगिन यीशु मसीह उपरे भरसा करिला। तो का इकर मतलब इ हेके कि मसीह हमरे के पाप करुवायला? बिलकुल निहीं!

¹⁸ मगर, अगर मोंय इ गोइठ के फिन से मानमूँ कि एक आदमी मूसा केर नियम के मानेक से धरमी ठहराल जायला, तो मोंय सचमुच में पाप करमूँ।

¹⁹ इ एइसन अहे जइसन कि मोंय मूसा केर नियम लगिन मोइर गेलों, से लगिन मूसा केर नियम से अब मोंय नी चलोना, ताकि मोंय परमेश्‍वर केर सेवा करेक लगिन जिंदा रहेक पारमूँ।

²⁰ इ एइसन अहे जइसन मोंय मसीह केर संगे क्रूस उपरे मोइर गेलों, आउर अब मोंय जिंदा नी रहलों, बल्कि मसीह मोर में जिंदा अहे। आउर मोंय काया में अब जे जिंदा अहों, तो सिरिफ उ बिसवास से जिंदा अहों, जे परमेश्‍वर केर बेटा उपरे अहे, जे मोर से प्रेम करलक, आउर मोर लगिन खुद के देई देलक।

²¹ मोंय इ गोइठ के इनकार करेक नी पारमूँ कि परमेश्‍वर हमरे केर परती अपन किरपा केर चलते हमरे के बचालक, काले कि अगर मूसा केर नियम के मानेक से केऊ आदमी धरमी बनतक, तो मसीह के मोरेक नी पड़तक।