गलातियनमन 1 - सादरी नवाँ नियम

जोहार

¹ मोंय पौलुस जे यीशु केर चुनल खास चेला हेकों आउर इ चिट्ठी के लिखाथों। मोंय केऊ आदमी चाहे आदमीमन केर दल से चुनल नी जाय हों, मगर मोंय हमर प्रभु यीशु मसीह आउर आबा परमेश्‍वर बटले चुनल जाय हों, जे यीशु के मुरदा में से जियालक।

² मोंय इ चिट्ठी के गलातिया परदेस केर कलीसियामन केर बिसवासी भाईमन केर नाँव में लिखाथों।

³ मोंय प्रार्थना करोना कि हमर आबा परमेश्‍वर आउर प्रभु यीशु मसीह तोहरेमन उपरे किरपा करोक आउर शांति देओक।

⁴ हमर आबा परमेश्‍वर केर इच्छा केर मोताबिक मसीह यीशु खुद के हमरे केर पापमन केर क्षमा लगिन बलिदान काइर देलक। ताकि हमरे इ दुनिया केर आदमीमन केर बुरा असर से बचल रहब।

⁵ मोंय प्रार्थना करोना कि परमेश्‍वर केर स्तुति जुग-जुग होते रहोक। आमीन।

एके गो शुभ समाचार अहे

⁶ मोंय ताजुब होई गेलों कि जे परमेश्‍वर तोहरेमन के मसीह केर किरपा से बोलालक, उके तोहरेमन एतना जल्दी छोइड़ के दोसर शिक्षा के मानेक लगला।

⁷ सिरिफ एके गो शिक्षा अहे, मगर गोइठ एइसन अहे कि थोरेक आदमीमन तोहरे केर मन के भटकाएक आउर मसीह केर शिक्षा के बिगड़ाएक खोजैना।

⁸ मगर, अगर हमरे में से केऊ चाहे स्वरग केर दूत हों, उ शिक्षा के छोइड़ के जेके हमरे तोहरेमन के सुनाय ही, केऊ आउर दोसर शिक्षा केर बारे में तोहरेमन के सुनाई, तो परमेश्‍वर उके जुग-जुग लगिन दंड देवी।

⁹ जइसन हमरे पहिले कइह चुइक ही, तइसनेहें मोंय अब फिन कहोना कि उ शिक्षा के छोइड़ जेके तोहरेमन बिसवास काइर हा, अगर केऊ आउर दोसर शिक्षा केर बारे में सुनायला, तो परमेश्‍वर उके जुग-जुग लगिन दंड देवी।

¹⁰ इ गोइठ पक्का अहे कि मोंय आदमीमन के खुश करेक निहीं मगर परमेश्‍वर के खुश करेक चाहोना। अगर मोंय अब तक आदमीमन के हें खुश करते रहतो, तो मसीह केर सेवक नी बनतो।

¹¹ हे बिसवासी भाईमन मोंय तोहरेमन के बताय देवाथों कि जे शुभ समाचार मोंय सुनाय हों, उ आदमीमन केर लिखल ना लगे।

¹² काले कि इके मोंय हमर पुरखामन से नी सीख हों, आउर ना ही केऊ धरम केर अगुवामन मोके सिखाय हैं। मगर यीशु मसीह मोके इ शुभ समाचार के देखाय हे।

¹³ तोहरेमन सुइन हा कि कइसन मोंय यहूदीमन केर नियम के मानत रहों, आउर परमेश्‍वर केर कलीसिया केर बिसवासीमन के ढेइर हें सतात रहों आउर नाश करेक केर कोशिश करत रहों।

¹⁴ मोंय अपन समय में, अपन जोड़ी यहूदीमन से ढेइर आगे रहों, आउर हमर पुरखामन केर शिक्षामन के सिखेक आउर मानेक लगिन ढेइर मेहनइत करत रहों।

^15-16 मगर परमेश्‍वर अपन बेटा के मोके देखालक, ताकि मोंय परजाइत आदमीमन के यीशु केर बारे में शुभ समाचार केर परचार करमूँ। परमेश्‍वर मोके मोर जनमेक से पहिलेहें चुइन लेलक, आउर अपन किरपा से मोके अपन सेवा करेक लगिन बोलालक। जब यीशु खुद के मोके देखालक, तो मोंय सलहा लेवेक लगिन केकरो ठिना नी गेलों,

¹⁷ आउर ना जेमन मोर से पहिले से यीशु केर चुनल खास चेला अहैं उमन से मिलेक यरुशलेम शहर आलों। मगर तुरते अरब देस चाइल गेलों, फिन हूवाँ से दमिश्क नगर घूइर आलों।

¹⁸ फिन तीन बरिस केर पाछे मोंय यीशु केर चुनल खास चेला पतरस से भेंट करेक लगिन यरुशलेम शहर गेलों, आउर उकर ठिना पन्द्रह दिन तक रहलों।

¹⁹ मगर प्रभु में भाई याकूब के छोइड़ यीशु केर चुनल खास चेलामन में से आउर केकरो से नी भेटालों।

²⁰ परमेश्‍वर जानेला कि जे गोइठमन मोंय तोहरेमन के लिखाथों, उ बिलकुल सच हेके।

²¹ इकर पाछे मोंय यरुशलेम शहर के छोइड़ सीरिया आउर किलिकिया परदेसमन में आलों।

²² मगर यहूदिया परदेस केर कलीसियामन केर मसीही बिसवासीमन मोके तो कहियो नी देइख रहैं।

²³ मगर घरी-घरी एहे सुनत रहैं कि एक समय जे हमरे के सतात रहे, अब ओहे बिसवास केर शुभ समाचार केर परचार करेला। जबकि पहिले आदमीमन के मसीह में बिसवास करेक से रोकेक केर कोशिश करत रहे।

²⁴ से लगिन उमन परमेश्‍वर केर महिमा करैना, काले कि परमेश्‍वर मोके बिसवासीमन के सताएक वाला से बदइल के यीशु मसीह केर पिछे चलेक वाला बनाय देलक।