इफिसियनमन 5 - सादरी नवाँ नियम

इंजोत केर संतान बना

¹ तोहरे परमेश्‍वर केर दुलार छउवामन हेका, से लगिन तोहर स्वभाव परमेश्‍वर केर जइसन होवोक।

² मसीह केर पिछा करते दोसरमन लगिन प्रेम से भरल जिंदगी जिया, जे तोहर से प्रेम करलक आउर तोहर पापमन के उठाएक लगिन खुद के बलिदान काइर देलक। उकर से परमेश्‍वर खुश रहे, काले कि उ बलिदान उकर लगिन महकेक वाला सेंट नियर रहे।

³ जइसन पवितर आदमीमन लगिन उचित अहे, तइसनेहें तोहर में ब्यभिचार, आउर कोनों रकम केर अशुद्ध काम, या लोभ केर चरचा तक ना होवोक।

⁴ आउर ना तोहर में बेसरम केर गोइठ, ना बेकार गोइठ-बात, आउर ना गंदा हँसी मजाक होवोक, काले कि इ गोइठमन तोहर लगिन नी शोभेला, मगर तोहरे के परमेश्‍वर के धन्यबाद देवेक चाही।

⁵ काले कि तोहरेमन अच्छा से जानाला कि केऊ ब्यभिचारी आदमी, या अशुद्ध आदमी, या लोभी आदमी जे मूर्ति पूजा करेक केर बराबइर अहे, उ मसीह आउर परमेश्‍वर केर राइज में हिस्सेदार नी होवी।

⁶ केऊ तोहरेमन के इ कइह के धोखा ना देवोक कि परमेश्‍वर उमन के दंड नी देवी, जेमन एइसन पाप करैना। काले कि एहे काममन के करेक केर चलते परमेश्‍वर केर खीस आगया नी मानेक वालामन उपरे भड़केला।

⁷ से लगिन एइसन पाप काममन के करेक वालामन केर साथ ना देबा।

इंजोत में चलेक

⁸ तोहरेमन तो पहिले शैतान केर कब्जा में रहा, मगर अब परमेश्‍वर केर होई गेला, से लगिन अब परमेश्‍वर केर संतानमन नियर चला।

⁹ (काले कि परमेश्‍वर केर संतानमन केर काम सोउब रकम केर भलाई करेक, आउर धरमी बनेक, आउर सच्चाई केर डहर में चलेक हेके)।

¹⁰ आउर इके जानेक केर कोशिश करा कि प्रभु के कोन चीज खुश करेला?

¹¹ आउर शैतान केर बेकार काममन में शामिल ना होवा, बल्कि आदमीमन के बतावा कि इ काममन बुरा हेके।

¹² काले कि अबिसवासी मनक लुकल काममन केर चरचा करेक हों लाज केर गोइठ हेके।

¹³ मगर जब दुष्ट आदमीमन तोहर अच्छा ब्यवहार के देखैना तो उ मनक बुरा ब्यवहार उमन के दिसेक लगेला, जेकर नतीजा इ होवेला कि उमन अपन बुरा काममन के छोइड़ देवैना आउर तोहर जइसन बेस आदमी बाइन जायना।

¹⁴ इ लगिन कहल जाय हे, “हे निंदाएक वालामन जाइग जावा, आउर मुरदा में से जी उठा, तो मसीह तोहर उपरे अपन इंजोत के चमकाई।”

बुद्धिमानी से चला

¹⁵ इ लगिन सावधानी से देखते रहा कि कइसन जिंदगी जियाथा, निरबुद्धियामन नियर निहीं मगर बुध्दिमानमन नियर चला।

¹⁶ हरेक मोका केर इस्तेमाल जे तोहर ठिना अहे, भला काम करेक में करा, काले कि इ मोका बुरा दिनमन में तोहरे के मिल हे।

¹⁷ इ जानेक केर कोशिश करा कि प्रभु तोहर से का करुवाएक चाहेला आउर बुद्धिमान बना।

¹⁸ आउर दारू पी के मतवारी ना करा, इकर से आदमीमन निरलज ब्यवहार करैना, मगर पवितर आत्मा से भरते जावा।

¹⁹ आउर आपस में आराधना आउर महिमागान आउर आत्मिक गीत गाते रहा, आउर अपन-अपन मन में प्रभु केर सामने गाते आउर बजाते रहा।

²⁰ आउर जे कोनों हमर प्रभु यीशु मसीह हमर लगिन काइर हे उकर चलते सोउब बेरा परमेश्‍वर आबा के सोउब गोइठ में धन्यबाद देते रहा।

²¹ आउर मसीह केर भक्ति करेक केर चलते एक दोसर केर अधीन में रहा।

पति आउर उकर जनाना

²² हे जनानामन, अपन-अपन पति केर अधीन में एइसन रहा, जइसन तोहरे प्रभु केर अधीन में रहाला।

²³ काले कि पति जनाना केर मूँड़ हेके जइसन कि मसीह कलीसिया केर मूँड़ हेके, आउर मसीह कलीसिया केर छुटकारा देवाइया हेके, आउर कलीसिया मसीह केर काया हेके।

²⁴ जइसन कलीसिया मसीह केर अधीन में अहे, तइसनेहें जनानामन के हों हर गोइठ में अपन-अपन पति केर अधीन में रहेक चाही।

²⁵ हे पतिमन, अपन-अपन जनाना से प्रेम करा, जइसन कि मसीह हों कलीसिया से प्रेम काइर के उके शुद्ध करेक ले खुद के उकर लगिन देई देलक।

²⁶ ताकि उ बिसवासीमन के पाप से शुद्ध काइर के, जे शुभ समाचार बचन से होवेला, आउर चिन्हा केर रूप में उमन के पानी में नहाएक से पवितर बनाओक।

²⁷ उ अपन कलीसिया केर सोउब आदमीमन लगिन मोइर गेलक, ताकि उमन के सिद्ध बनाएक पारोक, आउर सोउब के अपन हेदना लानेक पारोक, जेमन में कोनों दोष या पाप या आउर कोनों रकम केर बुराई नी होवी, बल्कि उमन पूरा पुरी पवितर आउर निरदोष होबैं।

²⁸ एहे लेखे पति अपन-अपन जनाना से अपन काया केर बराबइर प्रेम करोक, जे अपन जनाना से प्रेम करेला, उ खुद से प्रेम करेला।

²⁹ काले कि केऊ हों कहियो अपन काया से खीस नी रखेला मगर उकर देखभाल करेला, जइसन मसीह कलीसिया केर देखभाल करेला।

³⁰ काले कि हमरे मसीह केर काया केर अंग हेकी।

³¹ जइसन पवितर किताब में लिखल अहे, “मरदाना अपन आयो आबा के छोइड़ के अपन जनाना से मिलल रही, आउर उमन दुयो एगो आदमी नियर रहबैं।”

³² इ एगो किमती आउर गहरा शिक्षा हेके जेके हमरे हिंयाँ समझेक पारिला, मोंय इकर जोड़ी मसीह आउर उकर उपरे बिसवास करेक वालामन से करोना।

³³ मगर इ तोहर उपरे हों लागू होवेला, तोहर में से हरेक झन अपन जनाना से अपन नियर प्रेम रखोक, आउर जनाना हों अपन पति केर आदर करोक।