कुलुसियनमन 4 - सादरी नवाँ नियम

¹ हे मालिकमन, अपन-अपन गुलाममन केर संगे न्याय आउर ठीक-ठीक ब्यवहार करा, इ समइझ के कि स्वरग में तोहर हों एगो मालिक अहे।

मसीहीमन केर लगिन सलहा

² लगातार प्रार्थना करते हुए सचेत रहा। आउर परमेश्‍वर के धन्यबाद देते रहा।

³ आउर इकर संगे हें संगे हमर लगिन हों प्रार्थना करते रहा कि परमेश्‍वर हमर लगिन बचन परचार करेक ले एइसन दुरा खोइल देवोक कि हमरे मसीह केर उ भेद केर बखाइन करेक पारब, जेकर चलते मोंय एखन जेहेल में अहों।

⁴ आउर प्रार्थना करा कि मोंय मसीह केर बारे सही आउर खुला रीति से परचार करेक पारमूँ।

⁵ अबिसवासीमन केर संगे बुद्धिमानी से बरताव करा। हरेक मोका के किमती जाइन के उके ठीक से इस्तेमाल करा।

⁶ तोहर बोली हमेशा नरम आउर सुनेक में अच्छा होवोक, ताकि तोहरे हर आदमीमन के अपन बिसवास केर बारे में ठीक ढंग से जबाब देवेक पारबा।

आखरी जोहार

⁷ भाई तुखिकुस जे एगो बिसवास लायक सेवक हेके आउर प्रभु केर सेवा में मोर संगे काम करेक वाला हेके। उ तोहरे के मोर बारे में सोउब गोइठमन के बताय देवी।

⁸ मोंय उके तोहर ठिना इ लगिन भेइज हों कि तोहरेमन के हमर दशा मालूम होई जाओक आउर उ तोहरे केर बिसवास के मजबूत करोक।

⁹ उकर संगे मोंय उनेसिमुस के हों भेइज हों। उ बिसवास लायक आउर दुलारा भाई हेके आउर उ तोहर शहर केर हें हेके। इ दुयो तोहरे के हिंयाँ केर सोउब गोइठमन के बताय देबैं।

¹⁰ अरिस्तर्खुस जे मोर संगे जेहेल में अहे, आउर बरनाबास केर रिश्तेदार मरकुस बटले तोहरेमन के जोहार। मरकुस केर बारे में तोहरे के आगे हें बताल जाय रहे कि अगर उ तोहर ठिना आवी, तो उकर बेस लेखे स्वागत करबा।

¹¹ यीशु जेके आदमीमन यूस्तुस नाँव से बोलायना, तोहरेमन के जोहार कहेला। यहूदी बिश्वासीमन में से सिरिफ एहे परमेश्‍वर केर राइज केर लगिन मोर संगे काम करेक वाला आउर मोर शांति केर कारण हेके।

¹² इपफ्रास जे तोहर शहर केर हेके आउर मसीह यीशु केर सेवक हेके, तोहरे के जोहार कहेला। उ सोउब बेरा तोहर लगिन प्रार्थना करते रहेला ताकि तोहरेमन सिद्ध होई के पूरा बिसवास केर संगे परमेश्‍वर केर इच्छा में स्थिर रहा।

¹³ मोंय उकर गवाह हेकों कि उ तोहर लगिन आउर लौदीकिया शहर आउर हियरापुलिस शहर केर आदमीमन लगिन लगातार प्रार्थना करते रहेला।

¹⁴ हमरेमन केर दुलारा बाइध लूका आउर भाई देमास तोहरेमन के जोहार कहैना।

¹⁵ लौदीकिया शहर केर बिसवासी भाई-बहिनमन के आउर बहिन नुमफास आउर उकर घर में चलेक वाला कलीसिया के मोर बटले जोहार कहोना।

¹⁶ जब इ चिट्ठी तोहर हिंयाँ पइढ़ लेवल जाई तो एइसन करबा कि इ चिट्ठी लौदीकिया शहर केर कलीसिया में हों पढ़ाल जाओक। आउर उ चिट्ठी जे लौदीकिया शहर केर कलीसिया से आवी उके तोहरेमन हों पढ़बा।

¹⁷ फिन अरखिप्पुस से कहबा कि जे सेवा प्रभु में तोके जिम्मा देवल जाय हे, उके सावधानी केर संगे पूरा करबे।

¹⁸ मोंय पौलुस अपनेहें हाँथ से इ चिट्ठी में तोहरेमन के जोहार लिखाथों। मोंय जेहेल में अहों, मोके प्रार्थना में याइद रखबा। मोंय प्रार्थना करोना कि परमेश्‍वर केर किरपा तोहरेमन केर उपरे होते रहोक। आमीन।