खास चेलामन केर काम 8 - सादरी नवाँ नियम

कलीसिया में सताव

¹ स्तिफनुस के माइर मोराएक में शाऊल हों पूरा-पुरी राजी रहे। ओहे दिन से यरुशलेम शहर में कलीसिया केर आदमीमन उपरे ढेइर सताव शुरु होई गेलक। आउर यीशु केर खास चेलामन के छोइड़ के सोउब बिसवासी आदमीमन यहूदिया आउर सामरिया परदेस में तितिर-बितिर होई गेलैं।

² थोरेक भक्त आदमीमन स्तिफनुस केर लाश के कबर में गाइड़ देलैं आउर उकर लगिन ढेइर दुःख मनालैं।

³ शाऊल उ समय कलीसिया केर आदमीमन के सतात रहे। उ घर-घर ढूइक के बिसवासी मरदानामन आउर जनानामन के घिसराय-घिसराय के जेहेल घर में साइज देवत रहे।

सामरिया परदेस में फिलिप्पुस केर परचार

⁴ मगर जे बिसवासी आदमीमन तितिर-बितिर होई जाय रहैं, उमन घुइम-घुइम के शुभ समाचार केर परचार करत रहैं।

⁵ फिलिप्पुस सामरिया परदेस केर एगो शहर में जाय के आदमीमन के मसीह केर शुभ समाचार परचार करेक लगलक।

⁶ जे गोइठमन के फिलिप्पुस आदमीमन के बतालक, उके सुइन के आउर जे चमत्कार काम केर चिन्हामन के उ देखात रहे, उके देइख के उमन एक मन होई के उकर गोइठमन केर उपरे धेयान देवेक लगलैं।

⁷ काले कि जब फिलिप्पुस आदेश देलक तब ढेइर आदमीमन में से भूतमन जोर से चिल्लाते निकइल गेलैं, आउर ढेइर लकवा मरल आउर लंगड़ा आदमीमन हों ठीक होई गेलैं।

⁸ आउर उ शहर केर आदमीमन ढेइर खुश होलैं।

जादूगर सिमोन

⁹ उ शहर में फिलिप्पुस केर आवेक से आगे सिमोन नाँव केर एगो आदमी रहत रहे, जे थोरेक समय से जादू-टोना काइर के सामरिया परदेस केर आदमीमन के चकित काइर देवत रहे आउर खुद के एगो महान आदमी बतात रहे।

¹⁰ आउर छोट-बाड़ सोउब आदमीमन उकर गोइठ के माइन के कहत रहैं, “इ आदमी परमेश्‍वर केर उ शक्ति हेके, जे महान कहायला।”

¹¹ उ ढेइर दिनमन से अपन जादू से आदमीमन के चकित काइर के राइख रहे, से लगिन उमन उके ढेइर मानत रहैं।

¹² मगर जब आदमीमन फिलिप्पुस से परमेश्‍वर केर राइज आउर यीशु मसीह केर नाँव केर शुभ समाचार सुनलैं तो उकर उपरे बिसवास करलैं, आउर सोउब मरदाना आउर जनानामन बपतिस्मा जल संस्कार लेलैं।

¹³ सिमोन खुद हें फिलिप्पुस केर संदेश उपरे बिसवास करलक आउर बपतिस्मा जल संस्कार लेई के फिलिप्पुस केर संगे चेला बाइन के रहेक लगलक। उ चिन्हा आउर बड़का-बड़का चमत्कार केर काम देइख के ताजुब होवत रहे।

सामरी आदमीमन के पवितर आत्मा भेटाएक

¹⁴ जब यरुशलेम शहर में रहेक वाला यीशु केर खास चेलामन इ सुनलैं कि सामरिया परदेस केर आदमीमन परमेश्‍वर केर बचन के माइन लेई हैं तो उमन पतरस आउर यूहन्ना के उमन ठिना भेजलैं।

¹⁵ उमन हूवाँ जाय के उमन लगिन इ प्रार्थना करलैं कि उमन पवितर आत्मा पाओक।

¹⁶ काले कि अब तक उमन में से केकरो उपरे पवितर आत्मा नी भेजल जाय रहे, उमन सिरिफ प्रभु यीशु मसीह केर नाँव में बपतिस्मा जल संस्कार लेई रहैं।

¹⁷ पतरस आउर यूहन्ना उ मनक उपरे हाँथ राइख के प्रार्थना करलैं आउर उमन के पवितर आत्मा मिल गेलक।

¹⁸ जब सिमोन देखलक कि खास चेलामन केर हाँथ रखेक से पवितर आत्मा मिलेला, तो उ मनक ठिना रुपया लाइन के कहलक,

¹⁹ “मोके हों इ अधिकार देवा कि मोंय जेकर उपरे हाँथ रखमूँ उके पवितर आत्मा मिल जाओक।”

²⁰ मगर पतरस उकर से कहलक, “तोर रुपया तोर संगे नाश होवोक, काले कि तोंय परमेश्‍वर केर दान के रुपयामन से किनेक केर बिचार करले।

²¹ इ सेवकाई में तोर ना हिस्सा अहे आउर ना कोनों अधिकार अहे, काले कि तोर मन परमेश्‍वर केर आगे सच्चा नखे।

²² तोंय अपन इ पाप करेक छोइड़ दे आउर प्रभु से प्रार्थना कर कि उ तोर बुरा बिचार के क्षमा काइर देई।

²³ तोंय अपन इ बुरा काममन के छोइड़ दे, काले कि मोंय देखाथों तोंय जलन आउर अधरम केर बंधन में अहिस।”

²⁴ सिमोन जबाब देलक, “तोहरेमन हें मोर लगिन प्रभु से प्रार्थना करा, जेकर से जे गोइठमन तोंय कहले, उमन में से एको गो मोर उपरे ना बितोक।”

²⁵ पतरस आउर यूहन्ना गवाही देई के आउर प्रभु केर बचन सुनाय के यरुशलेम शहर घूइर आलैं। आउर घुरेक बेरा सामरी आदमीमन केर ढेइर गाँवमन में शुभ समाचार सुनाते गेलैं।

इथियोपिया देस केर एगो अधिकारी केर बिसवास करेक आउर बपतिस्मा जल संस्कार लेवेक

²⁶ फिन प्रभु केर एगो स्वरगदूत फिलिप्पुस से कहलक, “उठ आउर दक्खिन बटे उ डहर में जा, जे यरुशलेम शहर से गाजा शहर लेई जायला।” इ डहर सुनसान अहे।

²⁷ उ उइठ के चाइल गेलक। उ समय अचका एगो आदमी से मिललक, जे खोजा रहे आउर उ इथियोपिया देस केर रानी कन्दाके केर मंत्री आउर खजांची रहे, उ भक्ति करेक लगिन यरुशलेम शहर आय रहे।

²⁸ आउर उ रथ में बाइठ के अपन देस घुरत रहे, आउर यशायाह परमेश्‍वर केर संदेश के बताएक वाला केर किताब के जोर-जोर से पढ़ते जात रहे।

²⁹ तब पवितर आत्मा फिलिप्पुस से कहलक, “भीरे जाय के इ रथ केर संगे-संगे चल।”

³⁰ फिलिप्पुस कूइद के खोजा ठिना पोहोंचलक आउर उके यशायाह परमेश्‍वर केर संदेश के बताएक वाला केर किताब पढ़ते सुनलक, आउर उकर से पूछलक, “तोंय जेके पढ़ाथिस, का उके समझिसला?”

³¹ उ जबाब देलक, “जब तक केऊ मोके नी समझाई तो मोंय कइसन समझमूँ?” आउर खोजा फिलिप्पुस से रथ में चाइढ़ के अपन ठिना बइठेक लगिन बिनती करलक, तब फिलिप्पुस रथ में चाइढ़ के उकर संगे बाइठ गेलक।

³² पवितर किताब केर जे पाठ के उ पढ़त रहे, उ इ रहे कि उ भेड़ी नियर मोराय जाएक लगिन पोंहचाल गेलक, आउर जइसन मेमना अपन ऊन कतरेक वालामन केर आगे चुपचाप रहेला, तइसनेहें जब आदमीमन उके दुःख देलैं, तब ओहो अपन मुँह नी खोललक।

³³ उकर अपमान करल गेलक आउर उके न्याय नी मिललक। आउर केऊ उकर बंश केर बारे में बताएक नी पारबैं, काले कि इकर से आगे कि धरती में उकर केऊ बंश होतैं, आदमीमन उके माइर मोरालैं।

³⁴ खोजा फिलिप्पुस से पूछलक, “मोंय तोर से बिनती कराथों कि मोके बताव परमेश्‍वर केर संदेश के बताएक वाला केकर बारे में इ कहाथे, अपन बारे या केऊ दोसर केर बारे में कहाथे?”

³⁵ तब फिलिप्पुस उके बताएक लगलक, आउर पवितर किताब केर ओहे पाठ से शुरु काइर के उके यीशु मसीह केर शुभ समाचार बतालक, खोजा इ गोइठ के समइझ गेलक आउर यीशु केर उपरे बिसवास करलक।

³⁶ डहर में चलते-चलते उमन एगो पोखरा ठिना पोहोंचलैं। आउर पोखरा के देइख के खोजा फिलिप्पुस से कहलक, “देख, हिंयाँ पानी अहे, अब मोके बपतिस्मा जल संस्कार लेवेक में का रुकावट अहे?”

³⁷ फिलिप्पुस उके जबाब देलक, “अगर तोंय पूरा मन से बिसवास करिसला तो कोनों रुकावट नखे।” उ जबाब देलक, “मोंय बिसवास करोना कि यीशु मसीह हें परमेश्‍वर केर बेटा हेके।”

³⁸ तब खोजा रथ के ठड़ाएक केर हुकूम देलक। तब दुयो पोखरा में ढूकलैं आउर फिलिप्पुस खोजा के बपतिस्मा जल संस्कार देलक।

³⁹ जब उमन पोखरा से निकइल के बाहरे आलैं, तो प्रभु केर आत्मा फिलिप्पुस के उठाय के लेई गेलक। आउर खोजा उके फिन नी देखलक। आउर खोजा इ कइह के कि परमेश्‍वर मोके बचाय लेलक, खुशी मनाते अपन देस घूइर गेलक।

⁴⁰ आउर फिलिप्पुस खुद के अशदोद शहर में पालक, आउर जब तक उ कैसरिया शहर में नी पोहोंचलक, तब तक नगर-नगर शुभ समाचार सुनाते गेलक।