खास चेलामन केर काम 7 - सादरी नवाँ नियम

महासभा में स्तिफनुस केर भाषण

¹ यहूदी महापुरोहित स्तिफनुस से पूछलक, “का इ दोष सही हेके?”

² उ जबाब देलक, “हे भाईमन आउर आबामन! मोर गोइठ के सुना। हमर पुरखा अब्राहम हारान नगर में आय के बसेक से पहिले जब उ मेसोपोटामिया परदेस में रहत रहे, उ बेरा महिमा से भरल परमेश्‍वर उके देखाई देलक।

³ आउर उकर से कहलक, ‘तोंय अपन देस आउर अपन कुटुम्बमन के छोइड़ के उ देस में चाइल जा, जेके मोंय तोके देखामूँ।’

⁴ से लगिन उ कसदीमन केर देस के छोइड़ के हारान नगर में जाय के बाइस गेलक। जब उकर आबा मोइर गेलक तब परमेश्‍वर उके हूवाँ से लाइन के इ देस में मतलब इसराइल देस में बसालक, जेकर में आइज हमरे बाइस ही।

⁵ उ समय इ देस में परमेश्‍वर उके अधिकार केर रूप में गोड़ रखेक केर ठाँव तक नी देलक, मगर उ अब्राहम से करार करलक कि मोंय इ देस के तोर आउर तोर पाछे तोर बंश केर अधिकार में काइर देमूँ, मगर उ समय अब्राहम केर संतान हों नी रहैं।

⁶ आउर परमेश्‍वर अब्राहम से एहो कहलक, ‘तोर बंश पराया देस में परदेसी नियर रहबैं। आउर हूवाँ केर आदमीमन उमन के अपन धांगर बनाय के रखबैं आउर चाइर सौ बरिस तक उ मनक संगे बुरा ब्यवहार करबैं।’

⁷ परमेश्‍वर फिन कहलक, ‘जे देस केर आदमीमन उमन के सताबैं, उ देस केर आदमीमन के मोंय सजा देमूँ। इकर पाछे उमन उ देस से निकइल जाबैं आउर इ देस में आय के एहे ठाँव में मोर भक्ति करबैं।’

⁸ परमेश्‍वर अब्राहम केर संगे करार करलक आउर उकर से कहलक कि उ अपन घर केर सोउब मरदानामन केर करार केर चिन्हा केर रूप में खतना करुवाओक। एक बरिस पाछे जब इसहाक केर जनम होलक तो आठवाँ दिन उकर खतना करलक, आउर इसहाक से याकूब आउर याकूब से बारह गोतर जनमलैं।

⁹ आउर याकूब केर बेटामन अपन भाई यूसुफ के जलन से मिसर देस जाएक वालामन ठिना बेइच देलैं, मगर परमेश्‍वर उकर संगे रहे।

¹⁰ परमेश्‍वर यूसुफ के सोउब दुःखमन से छोड़ाय के मिसर देस केर राजा फिरौन केर नजइर में दया आउर बुद्धि देलक, आउर राजा फिरौन उके मिसर देस केर आउर अपन पूरा राजमहल केर अधिकारी बनाय देलक।

¹¹ जब यूसुफ मिसर देस केर अधिकारी रहे, तब पूरा मिसर देस आउर कनान देस में अकाल होलक, जेकर से हर ठाँव में दुःख आउर तकलीफ झेलेक पड़लक आउर हमर पुरखामन के हों खाएक लगिन अन्न नी मिलत रहे।

¹² मगर जब याकूब के इ पता होलक कि मिसर देस में अन्न अहे, तो उ हमर बाप-दादामन के अन्न कीन लानेक लगिन हूवाँ पहिले बेर भेजलक। उमन हूवाँ यूसुफ से मिललैं आउर अन्न कीनलैं, मगर उमन उके नी चिन्हलैं।

¹³ दूसरा बेर जब उमन अन्न किनेक लगिन हूवाँ गेलैं, तो यूसुफ खुद के अपन भाईमन केर उपरे दिस्तार काइर देलक, आउर राजा फिरौन के यूसुफ केर घराना पता होलक।

¹⁴ तब यूसुफ अपन आबा याकूब के आउर अपन सोउब कुटुम्बमन के, जे पचहत्तर झन रहैं, मिसर देस आवेक लगिन खबर भेजलक।

¹⁵ तब याकूब मिसर देस में गेलक, आउर पाछे हूवाँ उ आउर हमर पुरखामन मोइर गेलैं।

¹⁶ उमन याकूब आउर उकर बेटा मनक हाड़मन के हमरे केर देस कनान में लेई आनलैं, आउर उमन याकूब केर हाड़ के उ कबर में गाड़लैं जेके अब्राहम दाम केर रूप में चाँदी देई के कीन रहे। आउर याकूब केर बेटा मनक हाड़ के शकेम शहर केर उ खेत में गाड़लैं, जेके याकूब हामोर केर बेटामन से कीन रहे।

¹⁷ परमेश्‍वर अब्राहम से जे करार काइर रहे, जब उकर पूरा होवेक केर बेरा भीरे आलक, तब हमर आदमीमन केर गिनती मिसर देस में ढेइर बगरा बाइढ़ गेलक।

¹⁸ से बेरा मिसर देस में दोसर राजा रहे, जे यूसुफ केर बारे में कोनों नी जानत रहे।

¹⁹ उ हमर पुरखामन केर संगे चलाँकी से बुरा ब्यवहार करलक, हिंयाँ तक कि हमर पुरखामन के अपन नवाँ जनमल छउवामन के बाहरे नदी में फेइक देवेक लगिन मजबूर करलक ताकि एको गो छउवा जिंदा ना रहोक।

²⁰ एहे समय में मूसा केर जनम होलक, जे परमेश्‍वर केर नजइर में ढेइरे सुन्दर रहे। आउर तीन महिना तक उकर आयो-आबा उके लुकाय के पालन पोषण करलैं।

²¹ मगर जब उके आउर लुकाएक नी पारलैं तो उके घर केर बाहरे राइख देलैं आउर राजा फिरौन केर बेटी नदी किनारे से निकलाय के उके गोद लेई लेलक आउर अपन बेटा नियर पोसलक।

²² आउर मूसा के मिसरीमन केर सोउब शिक्षा पढ़ाल गेलक, उ गोइठ-बात आउर काम करेक में शक्तिशाली रहे।

²³ जब मूसा चालीस बरिस केर होलक, तो उकर मन में अपन इसराइली भाईमन से भेंट करेक केर बिचार आलक।

²⁴ हूवाँ उ मिसर देस केर आदमी के इसराइली आदमी केर उपरे अन्याय करते देइख के उके बचालक आउर मिसरी आदमी के मोराय के उकर बदला लेलक।

²⁵ मूसा केर बिचार इ रहे कि मोर भाईमन बुइझ जाबैं कि परमेश्‍वर मोर हाँथ से उमन के गुलामी से छुटकारा देवी, मगर उमन एइसन नी बुझलैं।

²⁶ दूसरा दिन मूसा दूई झन इसराइली आदमीमन के लड़ते देखलक, उ इ कइह के उमन में सलहा कराएक केर कोशिश करलक, ‘हे भाईमन! तोहरे तो दुयो भाई-भाई हेका, तोहरे आपस में काले लड़ाथा?’

²⁷ मगर जे आदमी अपन इसराइली भाई से लड़त रहे, उ मूसा के ढेकइल देलक आउर उकर से कहलक, ‘के तोके हमर उपरे राजा आउर फैसला करेक वाला हाकिम ठहराय हे?

²⁸ काइल जे लेखे तोंय मिसरी आदमी के माइर मोराले, का ओहे लेखे मोके हों माइर मोराएक चाहाथिस?’

²⁹ इ गोइठ सुइन के मूसा डराय गेलक आउर हूवाँ से भाइग गेलक। आउर मिदियान देस में परदेसी बाइन के रहेक लगलक। हूवाँ उकर दूई झन बेटा जनमलैं।

³⁰ मिदियान देस में जब मूसा केर पूरा चालीस बरिस बीत गेलक, तो परमेश्‍वर उके सीनै पहार केर सुनसान ठाँव में बरते झूँड़ में एगो स्वरगदूत नियर दिस्तार देलक।

³¹ जब मूसा बरते झूँड़ के देखलक जे भसम नी होवत रहे तो उ ताजुब होई गेलक, आउर जब देखेक लगिन भीरे गेलक तो उके प्रभु केर इ आवाज सुनालक,

³² ‘मोंय तोर पुरखा मनक मतलब अब्राहम, इसहाक आउर याकूब केर परमेश्‍वर हेकों।’ मूसा डरे थरथराय गेलक, उके फिन देखेक केर साहस नी होलक।

³³ तब परमेश्‍वर उकर से कहलक, ‘अपन गोड़ केर जूता खोइल ले, काले कि जे ठाँव में तोंय ठड़ाय हिस, उ पवितर ठाँव हेके।

³⁴ मोंय सचमुच अपन आदमीमन केर दुरदशा के जे मिसर देस में अहैं, देइख हों, आउर उ मनक चिखेक आउर काँदेक के सुइन हों, से लगिन उमन के छोड़ाएक आय हों। अब आव, मोंय तोखे मिसर देस में भेजमूँ।’

³⁵ इ ओहे मूसा हेके, जेके इसराइली आदमीमन इ कइह के ठुकराय देई रहैं, ‘तोके के हमर उपरे राजा आउर फैसला करेक वाला हाकिम ठहराय हे?’ उखे परमेश्‍वर स्वरगदूत बटले राजा आउर छोड़ाएक वाला ठहराय के उ मनक ठिना भेजलक।

³⁶ ओहे आदमी इसराइली आदमीमन के मिसर देस में लाल समुदर आउर सुनसान परदेस में चालीस बरिस तक चमत्कार काम आउर चिन्हा देखाय-देखाय के हूवाँ से सुनसान ठाँव में बाहरे निकलाय लानलक।

³⁷ इ ओहे मूसा हेके, जे इसराइली आदमीमन से कहलक, ‘परमेश्‍वर तोहर भाईमन में से तोहर लगिन मोर जइसन एगो परमेश्‍वर केर संदेश के बताएक वाला खड़ा करी।’

³⁸ एहे मूसा सुनसान ठाँव में हमर पुरखामन केर माझे एगो अगुवा केर रूप में रहे। परमेश्‍वर एगो स्वरगदूत के भेजलक जे सीनै पहार उपरे उकर संगे गोठियाय रहे। उखे परमेश्‍वर जीवन देवेक वाला बचन बतालक आउर उके हमरे तक पोंहचालक।

³⁹ मगर हमर बाप-दादामन उकर गोइठ मानेक नी चाहलैं आउर मूसा के ठुकराय देलैं। उमन मिसर देस घुरेक चाहत रहैं।

⁴⁰ आउर उमन मूसा केर भाई हारून से कहलैं, ‘हमरे लगिन एगो एइसन देवता बनाव, जे मिसर देस घुरेक लगिन हमरे केर आगे-आगे चली, काले कि इ मूसा जे हमरे के मिसर देस से निकलाय लानलक, उकर का होलक, हमरे नी जानिला?’

⁴¹ उ दिनमन में उमन एगो बछरु केर मूर्ति बनाय के उकर आगे बलिदान चढ़ालैं आउर अपन हाँथ केर बनाल मूर्ति लगिन खुशी मनालैं।

⁴² से लगिन परमेश्‍वर उमन बटे से मुँह मुइड़ लेलक आउर उमन के आकाश केर बेइर, चाँद आउर तइरगनमन के अपन देवता केर रूप में भक्ति करेक लगिन छोइड़ देलक। जइसन परमेश्‍वर केर संदेश के बताएक वालामन केर किताब में लिखल अहे, ‘हे इसराइल केर घराना केर आदमीमन, का तोहरे सुनसान ठाँव में चालीस बरिस तक जानवर केर बलिदान आउर अन्नबलि मोके चढ़ाला? निहीं!

⁴³ तोहरे तो उ तंबू के बोइह के घुमाय फिरला, जेकर में तोहर देवता मोलेक केर मूर्ति आउर तोहर देवता रिफान केर तइरगन केर मूर्ति रहे, मतलब उ मूर्तिमन के जेके तोहरे पूजा करेक लगिन बनाय रहा। से लगिन मोंय तोहरे के बेबीलोन देस केर बाहरे लेई जाय के बसामूँ।’

⁴⁴ सुनसान ठाँव में हमर बाप-दादामन केर ठिना गवाही केर तंबू रहे, परमेश्‍वर मूसा के इकर बारे में इ आगया देई रहे, ‘तोंय जे साइज देइख हिस, ओहे लेखे उके बनाव।’

⁴⁵ ढेइर समय पाछे ओहे तंबू अगला पीढ़ी केर बाप दादामन के मिललक आउर उमन उके यहोशू केर अगुवाई में इ देस में लेई आनलैं। उ समय इ देस परजाइतमन केर अधिकार में रहे, मगर परमेश्‍वर उमन के हमर बाप दादामन केर सामने से निकलाय देलक, आउर उ तंबू राजा दाऊद केर समय तक रहलक।

⁴⁶ राजा दाऊद केर उपरे परमेश्‍वर केर दया रहे, से लगिन उ बिनती करलक कि याकूब केर परमेश्‍वर लगिन एगो घर बनाओक।

⁴⁷ मगर राजा दाऊद केर बेटा सुलैमान उकर लगिन मंदिर बनुवालक।

⁴⁸ मगर परमप्रधान परमेश्‍वर हाँथ केर बनाल मंदिर में नी रहेला, जइसन कि परमेश्‍वर केर संदेश के बताएक वाला कइह हे,

⁴⁹ ‘परमेश्‍वर कहेला, स्वरग मोर सिंहासन आउर धरती मोर गोड़ रखेक केर पिढ़ा हेके। मोर लगिन तोहरे कोन रकम केर मंदिर बनाबा आउर मोर आराम केर ठाँव कहाँ होवी?

⁵⁰ का इ सोउब चीजमन मोर हाँथ केर बनाल ना लगे?’

⁵¹ हे मन केर ढींठ आदमीमन, तोहरे उकर गोइठ के मानेक आउर सुनेक से ठुकराय देवाला। तोहरे सोउब बेरा हें पवितर आत्मा केर बिरोध कराला, जइसन तोहर बाप दादामन करत रहैं।

⁵² परमेश्‍वर केर संदेश के बताएक वालामन में से केके तोहर बाप दादामन नी सतालैं? उमन उ परमेश्‍वर केर संदेश के बताएक वालामन के माइर मोरालैं, जेमन धरमी आदमी मतलब मसीह केर आवेक केर भविष्यवाणी काइर रहैं आउर अब तोहरे हों जब यीशु आलक तो उके धरुवाय के मरुवाय देला।

⁵³ तोहरे ओहेमन हेका, जेमन के स्वरगदूतमन बटे से मूसा केर नियम देवल गेलक, मगर उकर पालन नी करला।”

स्तिफनुस के पखना से माइर मोराएक

⁵⁴ जब यहूदी अगुवा मनक महासभा केर आदमीमन स्तिफनुस केर इ गोइठमन के सुनलैं तो उमन खिसे रंजाय गेलैं आउर उकर उपरे दाँत केटरेक लगलैं।

⁵⁵ मगर उ पवितर आत्मा से भाइर के स्वरग बटे देखलक आउर उ परमेश्‍वर केर तेज रोशनी के आउर यीशु के परमेश्‍वर केर भतखाइया आरा ठड़ाल देखलक।

⁵⁶ आउर उमन से कहलक, “देखा, मोंय स्वरग के खुलल आउर आदमी केर बेटा के परमेश्‍वर केर भतखाइया आरा ठड़ाल देखाथों।”

⁵⁷ इ गोइठ के सुनते हें उमन जोर से चिल्लाय के अपन कान के बंद काइर लेलैं। आउर एके संगे स्तिफनुस केर उपरे झपटलैं।

⁵⁸ आउर उमन स्तिफनुस के धाइर के यरुशलेम शहर केर बाहरे खींचते लेई गेलैं आउर हूवाँ उके पखना से माइर मोरालैं, इ बेरा स्तिफनुस केर उपरे दोष लगाएक वाला आदमीमन अपन उपरी लुगा के खोइल के शाऊल नाँव केर एगो जवान केर गोड़ ठिना राइख देई रहैं।

⁵⁹ जब उमन स्तिफनुस के पखना से मारत रहैं तब उ इ कइह के प्रार्थना करत रहे, “हे प्रभु यीशु, मोर आत्मा के लेई ले।”

⁶⁰ फिन ठेहुना टेइक के जोर से कहलक, “हे प्रभु, उ मनक इ पाप के क्षमा काइर दे।” आउर इ कइह के मोइर गेलक।