खास चेलामन केर काम 4 - सादरी नवाँ नियम

पतरस आउर यूहन्ना के बंदी बनाएक

¹ पतरस आउर यूहन्ना आदमीमन से इ कहते हें रहैं कि यहूदी पुरोहितमन, यहूदी मनक मंदिर केर सरदार आउर सदूकी दल केर आदमीमन उ मनक ठिना आय पोहोंचलैं।

² उमन ढेइर नराज रहैं, काले कि पतरस आउर यूहन्ना आदमीमन के सिखात रहैं कि जे आदमीमन मोइर जाय हैं परमेश्‍वर उमन के फिन से जिंदा काइर देवी जइसन कि उ यीशु के मोरलमन में से फिन से जिंदा काइर देलक।

³ तब उमन पतरस आउर यूहन्ना के धाइर के राइत भइर लगिन जेहेल घर में साइज देलैं, काले कि साँझ होई जाय रहे।

⁴ मगर संदेश के सुनेक वालामन में से ढेइर आदमीमन यीशु केर उपरे बिसवास करलैं, आउर हूवाँ बिसवास करेक वाला मरदानामन केर गिनती लगभग पाँच हजार तक पोंहइच गेलक।

पतरस आउर यूहन्ना यहूदी सभा केर सामने

⁵ अगला दिन उमन केर सरदारमन, धरम केर अगुवामन आउर मूसा केर नियम के सिखाएक वालामन यरुशलेम शहर केर एगो ठाँव में जमा होलैं।

⁶ उ सभा में यहूदी महापुरोहित हन्ना, काइफा, यूहन्ना, सिकंदर आउर दोसर सोउबमन हों जेमन महापुरोहित केर घराना केर रहैं, सोउबमन यरुशलेम में जमा होलैं।

⁷ आउर उमन पतरस आउर यूहन्ना के माझे में ठड़ुवाय के उमन से पूछेक लगलैं, “इ आदमी के ठीक करेक लगिन तोहरेमन के शक्ति आउर अधिकार केहर देलक?”

⁸ तब पतरस पवितर आत्मा से भाइर गेलक आउर उमन के जबाब देलक, “हे आदमीमन केर सरदारमन आउर धरम केर अगुवामन,

⁹ हमरे इ कमजोर आदमी केर भलाई काइर ही, आउर आइज हमरे से उकर बारे में पूछ-ताछ करल जाथे कि उ कइसन ठीक होलक।

¹⁰ तो तोहरेमन आउर सोउब इसराइली आदमीमन जाइन लेवा कि इ यीशु मसीह नासरी केर नाँव से करल जाय हे, जेके तोहरे क्रूस उपरे चढ़ाय रहा। मगर परमेश्‍वर उके मोरलमन में से फिन जियालक। आइज ओहे यीशु केर नाँव से इ आदमी तोहर सामने भला चंगा ठड़ाय हे।

¹¹ यीशु मसीह ओहे पखना हेके, जेके राज मिस्त्रीमन बेकार जाइन के फेइक देई रहैं, ओहे कोना केर नेव केर पखना बाइन गेलक।

¹² यीशु केर अलावा आउर केऊ दोसर से छुटकारा नी मिली, काले कि गोटा दुनिया में आदमीमन केर माझे, कोनों दोसर नाँव नी देवल जाय हे, जेकर से हमरे के छुटकारा मिली।”

यीशु केर नाँव लेवेक चलते चेलामन के धमकी

¹³ पतरस आउर यूहन्ना केर साहस देइख के आउर इ जाइन के कि इमन अनपढ़ आउर साधारण आदमी हेकैं, उमन ताजुब होई गेलैं, फिन उमन के चीन्ह लेलैं कि इमन तो यीशु केर संगे रइह चुइक हैं।

¹⁴ आउर उ आदमी के जे ठीक होई रहे, पतरस आउर यूहन्ना केर संगे ठड़ाल देइख के, यहूदी सभा केर अगुवामन उ मनक बिरोध में कोनों कहेक नी पारलैं।

¹⁵ मगर उमन के यहूदी अगुवा मनक महासभा केर बाहरे जाएक केर हुकूम देलैं, आउर उमन आपस में बिचार करेक लगलैं,

¹⁶ “हमरे इ आदमीमन केर संगे का करब? काले कि यरुशलेम शहर केर रहेक वाला सोउब आदमीमन के इ पता होई गेलक कि इमन महान चमत्कार केर चिन्हा देखाय हैं आउर हमरे इके इनकार करेक नी पारब।

¹⁷ मगर आदमीमन में इ समाचार आउर बगरा ना फैलोक, से लगिन हमरे इमन के कड़ा चेतावनी देब कि अब से तोहरे यीशु केर नाँव से केखो कोनों ना कहबा।”

¹⁸ तब उमन पतरस आउर यूहन्ना के भीतरे बोलाय के आगया देलैं कि यीशु केर नाँव से आदमीमन के कोनोवें ना कहबा आउर ना सिखाबा।

¹⁹ मगर पतरस आउर यूहन्ना उमन के जबाब देलैं, “तोहरे हें खुद फैसला करा कि परमेश्‍वर केर नजइर में का उचित अहे, हमरे परमेश्‍वर केर आगया के मानब या तोहर आगया के मानब?

²⁰ इ तो हमरे से नी होवी कि हमरे जेके देइख ही आउर सुइन ही, उकर बारे में हमरे आदमीमन के नी बताब।”

²¹ तब उमन पतरस आउर यूहन्ना के फिन धमकाय के छोइड़ देलैं, उमन के कोनों नी सूझत रहे कि कोन तरीका से उमन के सजा देवल जाई, काले कि सोउब आदमीमन इ घटना केर चलते परमेश्‍वर केर महिमा करत रहैं।

²² काले कि जे आदमी चमत्कारी रूप से ठीक होई रहे, उ चालीस बरिस से उपरे केर रहे।

सताव केर बेरा चेलामन केर प्रार्थना

²³ पतरस आउर यूहन्ना छूइट के अपन संगमन ठिना घूइर आलैं, आउर जे कुछ यहूदी मुध पुरोहितमन आउर धरम केर अगुवामन उमन से कइह रहैं, उ सोउब के बतालैं।

²⁴ इ सुइन के उमन एक मन होई के जोर से परमेश्‍वर से प्रार्थना करलैं, “हे मालिक, तोंय हें आकाश आउर धरती आउर समुदर आउर जे कुछ उमन में अहे, सोउब के बनाय हिस।

²⁵ तोंय पवितर आत्मा से अपन सेवक हमर पुरखा राजा दाऊद केर मुँह से कहले, ‘दोसर जाइतमन हुड़दंग काले मचालैं? आउर देस-देस केर आदमीमन काले जाल बुनलैं?

²⁶ प्रभु आउर उकर मसीह केर बिरोध में दुनिया केर राजा ठड़ालैं, आउर अधिकारीमन एक संगे जमा होई गेलैं।’

²⁷ इ एक सच्चाई हेके कि इ नगर में राजा हेरोदेस आउर पुन्तियुस पिलातुस दुयो हें इसराइली आदमीमन आउर परजाइत आदमीमन केर संगे मिल के तोर अभिषेक करल पवितर सेवक यीशु केर बिरोध में एक जुट होई गेलैं।

²⁸ उमन ओहे करलैं जेके तोर शक्ति आउर इच्छा आगे हें ठहराय देई रहे कि ओहे होवोक।

²⁹ अब, हे प्रभु, उ मनक धमकीमन के सुन आउर अपन सेवकमन के इ बरदान दे कि उमन साहस से तोर बचन के सुनाएक पारोक।

³⁰ आउर चंगा करेक लगिन तोंय अपन हाँथ के बढ़ाव ताकि तोर पवितर सेवक यीशु केर नाँव से चिन्हा आउर चमत्कार केर काम करल जाओक।”

³¹ उ मनक इ प्रार्थना सिरात हें उ घर जेकर में उमन जमा रहैं हिल गेलक आउर सोउबमन पवितर आत्मा से भाइर गेलैं आउर उमन परमेश्‍वर केर बचन साहस से सुनाएक लगलैं।

बिसवासी मनक एक संगे मिल के रहेक

³² आउर चेला मनक इ दल में सोउबमन एक मन आउर एक प्राण रहैं। हिंयाँ तक कि केऊ हों अपन सम्पति के अपन नी कहात रहैं, जे कुछ उ मनक ठिना रहे, उकर में सोउब केर साझा रहे।

³³ आउर खास चेलामन समूचा शक्ति से प्रभु यीशु केर फिन से जी उठेक केर गवाही देवत रहैं आउर उ सोउब केर उपरे परमेश्‍वर केर बड़का किरपा रहे।

³⁴ उमन में से केऊ हों गरीब नी रहैं, काले कि जेमन ठिना खेत चाहे घर रहे, उमन उके बेइच-बेइच के उकर से मिलल पइसा के लाइन के खास चेलामन के देई देवत रहैं।

³⁵ आउर खास चेलामन जेके जइसन जरुरत होवत रहे, ओइसनेहें बाँइट देवत रहैं।

³⁶ यूसुफ नाँव केर एगो आदमी रहे, जे लेवी केर खानदान केर रहे, उकर जनम साइप्रस टापू में होई रहे। खास चेलामन उकर नाँव बरनाबास रखलैं (जेकर मतलब बिसवास में बनल रहेक लगिन उसकाएक वाला हेके)।

³⁷ उकर ठिना थोरेक जमीन रहे, जेके उ बेइच देलक आउर उकर से पावल पइसा के लाइन के खास चेलामन के देई देलक।