खास चेलामन केर काम 3 - सादरी नवाँ नियम

लंगड़ा भिखारी केर ठीक होवेक

¹ पतरस आउर यूहन्ना दूई पहर केर तीन बजे प्रार्थना केर समय में यहूदी मनक मंदिर में प्रार्थना करेक जात रहैं।

² आउर आदमीमन एगो जनम से लंगड़ा आदमी के रोज दिन यहूदी मनक मंदिर केर फाटक ठिना जे सुन्दर कहायला लाइन के बइठाय देवत रहैं, ताकि उ मंदिर में जाएक वाला आदमीमन से भीख माँगोक।

³ जब उ पतरस आउर यूहन्ना के यहूदी मनक मंदिर में जाते देखलक, तो उमन से भीख माँगलक।

⁴ पतरस आउर यूहन्ना उके धेयान से देखलैं आउर पतरस उकर से कहलक, “हमर बटे देख।”

⁵ तब उ कोनों पावेक केर आसरा में उमन बटे ताकेक लगलक।

⁶ पतरस उकर से कहलक, “चाँदी आउर सोना तो मोर ठिना नखे, मगर जे मोर ठिना अहे, उखे तोके देवाथों। यीशु मसीह नासरी केर नाँव से उठ आउर चल फिर।”

⁷ आउर पतरस उकर भतखाइया हाँथ के धाइर के उके उठालक, आउर तुरते उकर गोड़ आउर ठेहुनामन में ताकत आय गेलक।

⁸ आउर उ उछइल के ठड़ाय गेलक, आउर चलेक फिरेक लगलक आउर उछइल-उछइल के परमेश्‍वर केर महिमा करते उमन केर संगे यहूदी मनक मंदिर में गेलक।

⁹ सोउब आदमीमन उके चलते फिरते आउर परमेश्‍वर केर महिमा करते देखलैं।

¹⁰ आउर उके चीन्ह लेलैं कि इ ओहे लंगड़ा भिखारी हेके, जे यहूदी मनक मंदिर केर सुन्दर नाँव केर फाटक में बाइठ के भीख माँगत रहे आउर उ घटना से जे उकर संगे होई रहे, उमन ढेइर अचरज आउर ताजुब होई गेलैं।

राजा सुलैमान केर बरामदा में पतरस केर उपदेस

¹¹ जब उ पतरस आउर यूहन्ना केर संगे हें रहे, तब सोउब आदमीमन ढेइर ताजुब करते उ ठाँव में जे राजा सुलैमान केर बरामदा कहात रहे, कूइद आलैं।

¹² इ देइख के पतरस आदमीमन से कहलक, “हे इसराइली आदमीमन, तोहरे इ आदमी के काले इ लेखे देखाथा, आउर तोहरे हमरे बटे काले टकटकाय के देखाथा कि हमरे हें अपन शक्ति या भक्ति से इके चलेक-फिरेक लायक बनाय देली।

¹³ अब्राहम, इसहाक आउर याकूब केर परमेश्‍वर, हमर बाप दादामन केर परमेश्‍वर, अपन सेवक यीशु केर महिमा करलक, मगर तोहरे उके मरुवाएक लगिन यहूदी अगुवामन केर हाँथ में जिम्मा देला, आउर जब राजपाल पिलातुस उके छोइड़ देवेक केर बिचार करलक, तब तोहरे उकर सामने उके ठुकराय देला।

¹⁴ तोहरे यीशु के ठुकराय देला, जे पवितर आउर धरमी रहे आउर बिनती करला कि एगो हत्यारा के तोहर लगिन छोइड़ देवल जाओक।

¹⁵ आउर तोहरे उके जे आदमीमन के जुग-जुग केर जिंदगी देवेला माइर मोराला, जेके परमेश्‍वर मुरदा में से फिन जियालक, आउर इ गोइठ केर हमरे गवाह हेकी।

¹⁶ आउर यीशु मसीह केर नाँव में बिसवास करेक केर चलते इ आदमी के जेके तोहरे जानाला आउर एखन खुद देखाथा, ताकत देवल जाय हे। एहे बिसवास केर चलते इ आदमी भला चंगा होई हे।

¹⁷ अब हे भाईमन, मोंय जानोना कि तोहरे आउर तोहर अगुवामन यीशु के अनजान से माइर मोराला, काले कि तोहरे के पता नी रहे कि उ मसीह हेके।

¹⁸ मगर परमेश्‍वर इ गोइठमन के अपन सोउब संदेश के बताएक वालामन केर बटले आगे हें बताय देई रहे कि उकर मसीह दुःख उठाई आउर मोराल जाई। आउर उ इ लेखे इके सच काइर के देखालक।

¹⁹ से लगिन पाप करेक छोइड़ देवा आउर परमेश्‍वर बटे घूइर आवा ताकि तोहर पाप क्षमा करल जाई, तब परमेश्‍वर बटे से आत्मिक ताजगी केर बेरा आवी।

²⁰ आउर उ यीशु के भेजी, जे मसीह हेके, जेके उ तोहर लगिन पहिले से हें चुइन हे।

²¹ यीशु के स्वरग में उ समय तक रहेक जरुरी अहे जब तक परमेश्‍वर उ सोउब चीजमन के नवाँ नी बनाय देई जेमन के उ बनाय हे। जेकर बारे में ढेइर समय पहिले से हें परमेश्‍वर अपन पवितर संदेश के बताएक वाला आदमीमन केर मुँह से बताय देई रहे।

²² जइसन कि मूसा परमेश्‍वर केर संदेश के बताएक वाला कइह रहे, ‘प्रभु परमेश्‍वर तोहर भाईमन में से तोहर लगिन मोर जइसन एगो परमेश्‍वर केर संदेश के बताएक वाला के भेजी, उ जे कुछ तोहरे से कही उकर गोइठ के सुनबा आउर उकर मोताबिक चलबा।

²³ मगर जे आदमी उ परमेश्‍वर केर संदेश के बताएक वाला केर गोइठ के नी सुनी, उके परमेश्‍वर केर नीज आदमीमन में से नाश करल जाई।’

²⁴ आउर परमेश्‍वर केर संदेश के बताएक वाला शमूएल से लेई के उकर पाछे केर जेतना परमेश्‍वर केर संदेश के बताएक वालामन अपन संदेश में एहे गोइठ के कइह हैं।

²⁵ तोहरे सोउब परमेश्‍वर केर संदेश के बताएक वालामन केर संतान आउर उ करार केर भागीदार हेका, जेके परमेश्‍वर तोहर बाप दादामन से काइर हें, जब उ अब्राहम से कहलक, ‘तोर बंश से दुनिया केर सोउब आदमीमन आशीष पाबैं।’

²⁶ परमेश्‍वर अपन सेवक के मोरलमन में से फिन जिंदा काइर के सोउब से पहिले तोहर ठिना भेजलक, ताकि तोहर में से हरेक झन के अपन जिंदगी केर बुरा काममन के छोड़ेक में मदइत करोक आउर आशीष देवोक।”