खास चेलामन केर काम 28 - सादरी नवाँ नियम

माल्टा टापू में पौलुस

¹ जब हमरे ठीक-ठाक किनारे पोंहइच गेली, तब हमरे जानली कि इ टापू केर नाँव माल्टा हेके।

² हूवाँ केर रहेक वाला आदमीमन हमर उपरे ढेइर दया करलैं। पानी गिरत रहे आउर जाड़ लगत रहे, से लगिन उमन आइग सुलगाय के हमरे सोउब केर स्वागत करलैं।

³ जब पौलुस काठी केर गठरी जमा काइर के आइग में रखत रहे, तो एगो साँप आँच पाय के उकर से निकललक आउर उकर हाँथ में मेढ़ाय गेलक।

⁴ टापू केर आदमीमन साँप के उकर हाँथ में मेढ़ाल देइख के आपस में कहलैं, सचमुच इ आदमी हत्यारा हेके। इ समुदर से तो बाइच गेलक मगर हमर देवी न्याय इके जिंदा रहेक नी देलक।

⁵ तब पौलुस साँप के आइग में झटइक देलक, आउर उकर कोनों नोकसान नी होलक।

⁶ मगर उमन इकर आसरा में रहैं कि उकर काया फूइल जाई या अचका गिर के मोइर जाई, मगर ढेइर देरी तक आसरा देखेक केर पाछे पौलुस कोनों नी होलक, तो उ मनक बिचार बदइल गेलक आउर कहेक लगलैं, “इ तो केऊ देवता हेके।”

⁷ उ ठाँव केर भीरे हें टापू केर मुखिया पुबलियुस केर जमीन रहे। उ हमरे के अपन घर लेई जाय के तीन दिन तक संगी नियर हमर सेवा करलक।

⁸ पुबलियुस केर आबा के जार आउर सूल झाड़ा होवत रहे, से लगिन पौलुस उकर ठिना कोठरी में जाय के प्रार्थना करलक आउर उकर उपरे हाँथ राइख के उके ठीक करलक।

⁹ जेकर से उ टापू केर आउरो बेमरियामन आलैं, आउर उमन के ठीक करल गेलक।

¹⁰ से लगिन उमन सोउब रकम से हमर ढेइर माइन करलैं। जब हमरे हूवाँ से जाएक लगली, तो जे कुछ हमरे के जरुरी रहे, उ सोउब कुछ के उमन जहाज में राइख देलैं।

माल्टा टापू से रोम देस बटे जाएक

¹¹ तीन महिना पाछे हमरे सिकंदरिया शहर जाएक वाला एगो जहाज में चाइढ़ गेली, जे जाड़ केर चलते एहे टापू में रूइक रहे। इ जहाज केर अगला भाग में जुड़वाँ देवता केर चिन्हा रहे, जेके यूनानी भाषा में दियुसकूरी कहल जायला।

¹² हमरे सुरकूसा जहाज घाट में लंगर डाइल के तीन दिन हूवाँ रहली।

¹³ हूवाँ से आगे बाइढ़ के हमरे रेगियुम नगर में पोहोंचली, अगला दिन दखनी हवा चलेक लगलक, हमरे फिन आगे बढ़ली आउर उकर अगला दिन पुतियुली शहर में पोहोंचली।

¹⁴ हूवाँ हमरे के बिसवासी भाईमन मिललैं, आउर उमन हमरे के अपन घर में रूकेक लगिन बिनती करलैं। हूवाँ हमरे सात दिन रहली। हूवाँ रहेक केर पाछे हमरे भूंई डहर से रोम देस जाएक लगिन निकइल गेली।

¹⁵ रोम देस केर थोरेक बिसवासी भाईमन हमर आवेक केर खबर सुइन के हमरे से मिलेक आउर हमरे के रोम देस लेई जाएक लगिन अप्पियुस नगर केर बाजार आउर तीन सराय तक आलैं। उमन के देइख के पौलुस परमेश्‍वर के धन्यबाद देलक आउर ढाढ़स बाँधलक।

¹⁶ जब हमरे रोम देस पोहोंचली, तो पौलुस के एगो पलटन केर संगे जे उकर पहरा देवत रहे, जहाँ चाही, हूवाँ रहेक केर आगया मिल गेलक।

रोम देस में पौलुस

¹⁷ तीन दिन केर पाछे पौलुस यहूदी अगुवामन केर एक सभा बोलालक। जब उमन जमा होलैं तो पौलुस उमन से कहलक, “हे भाईमन, मोंय ना तो अपन आदमीमन केर बिरोध में गुन्हा काइर हों आउर ना हमर पुरखामन केर नियम केर बिरोध में गुन्हा काइर हों, फिन भी मोके यरुशलेम शहर में बंधुवा बनाय के रोम देस केर सरकार केर हाँथ में जिम्मा देवल गेलक।

¹⁸ मोर जाँच करेक केर पाछे उमन मोके छोइड़ देवेक लगिन तेयार रहैं, काले कि उमन मोर में मौत केर सजा लाएक कोनों दोष नी पालैं।

¹⁹ मगर जब हूवाँ केर यहूदी अगुवामन इकर बिरोध करेक लगलैं, तो मोके मजबूर होई के महाराजा से माँग करेक होलक कि हिंयाँ रोम में मोर फैसला होवोक, इ निहीं कि मोके अपनेहें आदमीमन केर उपरे दोष लगाएक रहे।

²⁰ मोंय तोहरे से मिलेक केर आगया इ लगिन लेई हों कि मोंय तोहरे से इकर बारे में गोठियामूँ। काले कि इसराइल केर आसरा लगिन जे कि मसीह हेके, मोंय इ सिकड़ से जकड़ल अहों।”

²¹ यहूदी अगुवामन उकर से कहलैं, “हमरे के तोर बारे में यहूदिया परदेस से कोनों चिट्ठी नी मिल हे आउर ना बिसवासी भाईमन में से केऊ आय के तोर बारे में खबर देई हैं या तोर बुराई के बताय हैं।

²² मगर इ डहर केर बारे में तोर से हें तोर बिचार के सुनेक चाहिला, काले कि हमरे जानिला कि सोउब ठाँव में इ डहर केर बिरोध होवाथे।”

²³ तब यहूदी अगुवामन पौलुस केर संगे एक दिन ठहरालैं, आउर उ दिन ढेइर आदमीमन उकर हिंयाँ जमा होलैं। बिहान से लेई के साँझ तक पौलुस सच्चाई से परमेश्‍वर केर राइज केर बारे में शिक्षा देते रहलक। उ मूसा केर नियम आउर परमेश्‍वर केर संदेश के बताएक वालामन केर किताबमन में लिखल बचनमन से यीशु मसीह केर बारे में उमन के समझाएक केर कोशिश करते रहलक।

²⁴ उमन में से थोरेक यहूदी अगुवामन तो पौलुस केर गोइठ सुइन के उकर उपरे बिसवास करलैं मगर थोरेक यहूदी अगुवामन बिसवास नी करलैं।

²⁵ जब उ मनक बिचार आपस में नी मिललक तो उमन हूवाँ से जाएक लगलैं, तब पौलुस उमन से इ गोइठ कहलक, “पवितर आत्मा परमेश्‍वर केर संदेश के बताएक वाला यशायाह केर मुँह से तोहर पुरखामन से ठीक हें कइह हे,

²⁶ ‘तोहरे सुनते तो रहबा, मगर नी समझबा, आउर देखते तो रहबा, मगर नी चिन्हबा,

²⁷ काले कि इ आदमीमन केर मन कठोर होई जाय हे, इमन सुइन के हों अनसुना काइर देवैना आउर देइख के हों अनदेखा काइर देवैना, कहीं एइसन ना होवोक कि इमन देइख के चीन्ह लेबैं आउर सुइन के अपन मन में समइझ जबैं आउर मोर बटे घूइर आबैं आउर मोंय उमन के ठीक काइर देमूँ।’

²⁸ से लगिन तोहरे के इ जानेक उचित अहे कि परमेश्‍वर केर इ छुटकारा केर संदेश परजाइत आदमीमन केर लगिन भेजल जाय हे। आउर उमन इके जरूर सुनबैं।”

²⁹ पौलुस केर इ गोइठ सुइन के यहूदी अगुवामन आपस में बहस करते हूवाँ से चाइल गेलैं।

³⁰ पौलुस पूरा दूई बरिस तक अपन भाड़ा केर घर में रहलक।

³¹ आउर उ अपन से भेंट करेक आवल आदमीमन केर पूरा दिल से स्वागत करत रहे, उ साहस केर साथ बिना रोक टोक केर परमेश्‍वर केर राइज केर परचार करते आउर प्रभु यीशु मसीह केर बारे में शिक्षा देते रहलक।