खास चेलामन केर काम 26 - सादरी नवाँ नियम

राजा अग्रिप्पा केर सामने पौलुस केर सफाई देवेक

¹ राजा अग्रिप्पा पौलुस से कहलक, “तोके अपन बारे में कहेक केर आगया अहे।” तब पौलुस हाँथ उठाय के अपन बचाव में जबाब देवेक लगलक,

² “हे राजा अग्रिप्पा, यहूदी अगुवामन जेतना गोइठमन केर उपरे दोष लगाय हैं, आइज तोर सामने उ मनक जबाब देवेक में मोंय खुद के धाइन समझोना।

³ खास रूप से इ लगिन कि तोंय यहूदीमन केर सोउब नियममन के आउर समस्यामन के जानिसला। से लगिन मोंय तोर से बिनती कराथों कि मोर गोइठमन के धीरज धाइर के सुनबे।

⁴ मोंय छोटपन से अपन जाइतमन केर माझे आउर यरुशलेम शहर में हें जिंदगी बिताय हों। से लगिन सोउब यहूदी आदमीमन जानैना कि मोर चाइल-चलन कइसन अहे।

⁵ उमन मोके ढेइर समय से जानैना, अगर उमन चाहबैं तो इ गोइठ केर गवाही देवेक पारबैं कि मोंय एगो फरीसी दल केर आदमी केर रूप में हें जिंदगी बितालों, जे हमर धरम केर सोउब से कड़ा नियम वाला डहर हेके।

⁶ आइज मोंय हिंयाँ तोहर सामने दोषी केर रूप में ठड़ाल अहों, इकर एहे कारण अहे कि मोंय परमेश्‍वर बटले हमर पुरखामन के देवल करार केर आसरा करोना।

⁷ इ ओहे करार हेके, जेकर पूरा होवेक केर आसरा में हमर बारहों गोतर केर आदमीमन दिन राइत पूरा सच्चाई केर साथ परमेश्‍वर केर भक्ति करते आवाथैं। हे राजा, एहे आसरा केर चलते यहूदी अगुवामन मोर उपरे दोष लगाथैं।”

⁸ तब पौलुस सुनेक वाला सोउब यहूदी आदमीमन से कहलक, “तोहरे के इ गोइठ काले बिसवास नी लगेला कि परमेश्‍वर मोरलमन के फिन से जिंदा करी?

⁹ मोंय हों खुद मानत रहों कि नासरत नगर केर रहेक वाला यीशु केर नाँव केर बिरोध करेक लगिन जे कोनों करेक पड़ी, उके करेक चाही।

¹⁰ यरुशलेम शहर में मोंय ठीक एइसनेहें करलों, मोंय यहूदी मुध पुरोहितमन से अधिकार चिट्ठी पाय के ढेइर पवितर आदमीमन के जेहेल घर में साजलों आउर जब उमन के मौत केर सजा देवल जात रहे, तो मोंय हों उमन के मरुवाएक में अपन मंजूरी देवत रहों।

¹¹ मोंय उमन के सोउब यहूदी मनक प्रार्थना घरमन में जाय के घरी-घरी सजा देवाय के यीशु केर निंदा करुवात रहों। हिंयाँ तक कि खीस केर मारे मोंय एइसन पगला होई गेलों कि दोसर नगरमन में हों जाय के सतात रहों।

अपन मन बदलेक केर बखाइन

¹² एहे मकसद से मोंय एक बेर यहूदी मुध पुरोहितमन से अधिकार चिट्ठी लेई के दमिश्क नगर जात रहों।

¹³ तब दूई पहर केर बेरा जब मोंय डहर में हें रहों कि हे राजा, स्वरग से एगो इंजोत के उतरते देखलों, जे बेइर केर इंजोत से हों तेज रहे आउर उ मोर आउर मोर संगे चलेक वालामन केर चाइरो बटे चमकत रहे।

¹⁴ हमरे सोउब भूंई उपरे गिर गेली आउर इब्रानी भाषा में एगो आवाज सुनली। केऊ मोर से कहत रहे, ‘हे शाऊल, हे शाऊल, तोंय मोके काले सताथिस? तोंय मोके चोट पोंहचाएक केर कोशिश काइर के खुद के चोट पोंहचाथिस।’

¹⁵ मोंय पूछलों, ‘हे प्रभु! तोंय के हेकिस?’ प्रभु जबाब देलक, ‘मोंय यीशु हेकों, जेके तोंय सताथिस।

¹⁶ मगर तोंय अब उठ, अपन गोड़ में ठड़ाव, मोंय तोके इ लगिन दर्शन देई हों कि तोके अपन सेवक आउर गवाह बनामूँ। जेके तोंय मोर बारे में देइख हिस आउर पाछे जे कुछ दर्शन देखबे, उकरो बारे में गवाही देबे।

¹⁷ आउर मोंय तोके इसराइल केर आदमीमन से आउर परजाइत आदमीमन से बचामूँ, जेमन ठिना अब मोंय तोके भेजाथों।

¹⁸ मोंय तोके उ मनक आँइख खोलेक लगिन, उमन के अंधार से इंजोत में लानेक लगिन, मतलब शैतान केर अधिकार से छोड़ाय के परमेश्‍वर बटे लानेक लगिन उमन ठिना भेजाथों। जेकर से उमन मोर उपरे बिसवास काइर के अपन पापमन केर क्षमा पाओक आउर पवितर करल आदमीमन केर माझे अपन ठाँव के पाओक।’

पौलुस केर अपन काममन के बताएक

¹⁹ इ लगिन हे राजा अग्रिप्पा, मोंय उ स्वरगीय दर्शन केर गोइठ मानलों।

²⁰ मोंय पहिले दमिश्क नगर केर फिन यरुशलेम शहर केर रहेक वाला आदमीमन के आउर उकर पाछे यहूदिया परदेस केर रहेक वाला सोउब आदमीमन के आउर परजाइत आदमीमन के समझाते रहलों कि पाप करेक छोइड़ देवा आउर परमेश्‍वर बटे आय जावा आउर बेस काम काइर के इके साबित काइर के देखावा कि तोहरे पाप करेक छोइड़ देई हा।

²¹ एहे कारण हेके कि जब मोंय यहूदी मनक मंदिर में रहों, तो यहूदी अगुवामन मोके धारलैं आउर माइर मोराएक चाहलैं।

²² मगर मोंय परमेश्‍वर केर मदइत से आइज तक जिंदा अहों, जेकर से आइज तोहरे केर आउर छोट बाड़ सोउब केर सामने सच्चाई केर गवाही देवाथों। जे गोइठमन केर बारे में मूसा आउर परमेश्‍वर केर संदेश के बताएक वालामन भविष्यवाणी काइर रहैं, उ गोइठमन के छोइड़ आउर कोनों गोइठ नी कहोना।

²³ इ कि मसीह दुःख उठाई आउर ओहे सोउब से पहिले मोरलमन में से जी उइठ के हमर आदमीमन में आउर परजाइत आदमीमन में इंजोत केर परचार करी।”

²⁴ जब पौलुस अपन बचाव में इ कहते हें रहे कि फेस्तुस जोर से कहलक, “हे पौलुस, तोंय पगला हेकिस। तोर ढेइर गेयान तोके पगला बनाय देवाथे।”

²⁵ मगर पौलुस कहलक, “महामहिम फेस्तुस, मोंय पगला ना लगों, मगर सच्चाई के आउर बुद्धि केर गोइठमन कहाथों।

²⁶ राजा के इ गोइठमन केर बारे में पता अहे, से लगिन मोंय बिसवास केर साथ इ गोइठमन के उकर सामने कहाथों, मोके पक्का बिसवास अहे कि इ गोइठमन उकर लगिन नवाँ नखे काले कि इ घटना छिप के नी होई हे।

²⁷ हे राजा अग्रिप्पा, का तोंय परमेश्‍वर केर संदेश के बताएक वालामन केर बिसवास करिसला? हाँ, मोंय जानोना कि तोंय बिसवास करिसला।”

²⁸ अब राजा अग्रिप्पा पौलुस से कहलक, “का तोंय थोरे हें समझाएक से मोके मसीही बनाएक चाहिसला?”

²⁹ पौलुस जबाब देलक, “थोरे में या ढेइर में, परमेश्‍वर से मोर एहे प्रार्थना अहे कि ना सिरिफ तोंय मगर जेतना आदमीमन आइज मोर गोइठ के सुनाथैं सोउबमन इ बंधनमन के छोइड़ के मोर नियर बाइन जाओक।”

³⁰ तब राजा अग्रिप्पा, राजपाल आउर बिरनीके आउर उमन केर संगे बइठेक वाला सोउब आदमीमन उइठ के ठड़ाय गेलैं आउर चाइल गेलैं।

³¹ आउर कछैरी से निकलेक बेरा आपस में कहेक लगलैं, “इ आदमी मौत केर सजा पावेक केर लायक या जेहेल घर में रहेक केर लायक कोनों गुन्हा नी काइर हे।”

³² राजा अग्रिप्पा फेस्तुस से कहलक, “अगर इ आदमी इ बिनती नी काइर रहतक कि महाराजा उकर फैसला करोक, तो इके छोइड़ देवल जातक।”