खास चेलामन केर काम 24 - सादरी नवाँ नियम

राजपाल फेलिक्स केर सामने पौलुस

¹ पाँच दिन केर पाछे हनन्याह यहूदी महापुरोहित आउर थोरेक धरम केर अगुवामन के आउर तिरतुल्लुस नाँव केर एगो वकील के अपन संगे लेई के कैसरिया शहर आलक, उमन राजपाल केर सामने पौलुस केर बिरोध में दोष लगालैं।

² तब पौलुस के बोलाल गेलक आउर वकील तिरतुल्लुस राजपाल केर सामने इ कहते पौलुस केर उपरे दोष लगाएक शुरु करलक, “हे महामहिम फेलिक्स, हमरे तोर चलते लम्बा समय से शांति से जिंदगी बिताते आवाथी। तोर बुद्धि से करल प्रबंध केर चलते हमर जाइत केर ढेइर बुराईमन दूर होवाथे आउर ढेइर सुधार होते जाथे।

³ इके हमरे सोउब जगा आउर सोउब लेखे से धन्यबाद केर संगे मानिला।

⁴ मोंय तोर से बगरा समय लेवेक नी चाहोना। मोंय तोर से बिनती कराथों कि तोंय हमर एक दूई गो गोइठमन के सुइन ले।

⁵ इ आदमी हमर लगिन सचमुच में फैलेक वाला रोग नियर अहे, जे दुनिया भइर केर यहूदी आदमीमन में झगरा करुवायला आउर इ एगो दल केर अगुवा हों हेके, जेके नासरी पंथ कहल जायला।

⁶ इ यहूदी मनक मंदिर के अपवितर करेक केर कोशिश करत रहे, से लगिन हमरे इके धारली। हमरे तो इके अपन नियम केर मोताबिक सजा देवेक चाहत रही

⁷ मगर पलटनमन केर सरदार लूसियास आय के इके जबरजस्ती हमर हाँथ से लुइट के लेई लेलक,

⁸ आउर इकर उपरे दोष लगाएक वालामन के तोर सामने आवेक केर हुकूम देलक। तोंय खुद इकर से पूइछ के सोउब गोइठमन केर सच्चाई के जाइन लेबे।”

⁹ यहूदी धरम केर अगुवामन हों तिरतुल्लुस केर साथ देई के कहलैं, “इ गोइठमन सच हेके।”

पौलुस केर जबाब

¹⁰ राजपाल फेलिक्स पौलुस के कहेक लगिन इशारा करलक, तो पौलुस जबाब देवेक लगलक, “मोंय इ जाइन के खुशी से अपन बचाव लगिन जबाब देवाथों कि तोंय ढेइर बरिस से इ परदेस केर आदमीमन केर फैसला करते आवाथिस।

¹¹ तोंय खुद हें इ गोइठ केर पता लगाएक पारिसला कि जब से मोंय यरुशलेम शहर में भक्ति करेक लगिन मंदिर में आय हों, मोर बारह दिन से बगरा नी होई हे।

¹² आउर उमन मोके ना तो मंदिर में आउर ना यहूदी मनक प्रार्थना घरमन में आउर ना नगरमन में केकरो से बहस करते या आदमीमन के उसकाते देखलैं।

¹³ जे गोइठमन केर बारे में इमन मोर उपरे दोष लगाथैं, इमन तोके उकर कोनों सबूत देवेक नी पारबैं।

¹⁴ मोंय तोर सामने माइन लेवाथों कि मोंय यीशु मसीह केर चेला बाइन के अपन पुरखामन केर परमेश्‍वर केर भक्ति करोना, आउर जे गोइठमन मूसा केर नियम आउर परमेश्‍वर केर संदेश के बताएक वालामन केर किताबमन में लिखल अहे, उ सोउब में बिसवास करोना। जेके यहूदी अगुवामन बुरा डहर कहैना।

¹⁵ जइसन उमन आसरा करैना कि परमेश्‍वर धरमी आउर अधरमी दुयो रकम केर आदमी के मोरलमन में से फिन जिंदा करी, तइसनेहें मोंय हों आसरा करोना।

¹⁶ से लगिन मोंय परमेश्‍वर आउर आदमीमन केर नजइर में सोउब बेरा बिवेक से निरदोष बनल रहेक केर खुद हें कोशिश करोना।

¹⁷ यरुशलेम शहर से ढेइर बरिस तक दूर रहेक केर पाछे मोंय गरीब आदमीमन के दान पोंहचाएक आउर परमेश्‍वर के भेंट चढ़ाएक लगिन यरुशलेम शहर आय रहों।

¹⁸ ओहे बेरा इमन यहूदी मनक मंदिर में मोके शुद्ध होवेक केर नियम के पूरा करते देखलैं, हूवाँ ना तो आदमीमन केर भीड़ रहे आउर ना कोनों रकम केर शोर-गूल होवत रहे।

¹⁹ हाँ, आसिया परदेस केर थोरेक यहूदी आदमीमन रहैं, आउर जे कुछ होलक उके उमन देखलैं। अगर मोंय कोनों गलती काइर रहों, तो उमन के मोर उपरे दोष लगाएक लगिन हिंयाँ तोर सामने आवेक चाही रहे।

²⁰ निहीं तो इमन खुद हें बताबैं कि जब मोंय यहूदी अगुवा मनक महासभा केर सामने ठड़ाल रहों, तो इमन मोर में का दोष पालैं?

²¹ सिरिफ एगो दोष इमन मोर उपरे लगाएक पारबैं, उ इ हेके, जब मोंय अंगना में उमन केर सामने ठड़ाय के जोर से इ कइह रहों, ‘मोरलमन केर फिन से जी उठेक केर बारे में आइज तोहर सामने मोर फैसला होवाथे।’ ”

²² राजपाल फेलिक्स जे यीशु मसीह केर डहर केर गोइठमन के ठीक-ठीक जानत रहे, उ फैसला के इ कइह के टाइल देलक, “जब पलटन केर सरदार लूसियास आवी, तो तोहर गोइठ केर फैसला करमूँ।”

²³ आउर सूबेदार के हुकूम देलक कि पौलुस के थोरेक छूट देई के उकर रखवाली करबे आउर उकर संगमन में से केखो उकर सेवा करेक से ना रोकबे।

राजपाल फेलिक्स आउर द्रुसिल्ला केर सामने पौलुस

²⁴ थोरेक दिन केर पाछे राजपाल फेलिक्स अपन जनाना द्रुसिल्ला केर संगे कैसरिया नगर आलक, उ यहूदिनी रहे। फेलिक्स पौलुस के बुलवाय के यीशु मसीह केर उपरे बिसवास करेक केर बारे में उकर से गोइठ सुनलक।

²⁵ जब पौलुस जे परमेश्‍वर केर सामने सही अहे, उके करेक आउर अपन इच्छा के काबू में करेक आउर परमेश्‍वर बटले आवेक वाला फैसला केर बारे में बताएक शुरु करलक, तो फेलिक्स डराय गेलक आउर उके जबाब देलक, “एखन तोंय जा। जब मोके समय मिली तो तोके फिन बुलवाय लेमूँ।”

²⁶ जेहेल घर से छुटकारा देवेक केर बदली में राजपाल फेलिक्स के पौलुस से कुछ रुपया घूस में पावेक केर आसरा रहे, से लगिन उ पौलुस के घरी-घरी बोलाय के उकर से गोठियात रहे।

²⁷ मगर जब दूई बरिस बीत गेलक, तो पुरकियुस फेस्तुस फेलिक्स केर ठाँव में राजपाल बाइन गेलक आउर फेलिक्स यहूदी आदमीमन के खुश करेक केर इच्छा से पौलुस के जेहेल घर में हें बंधुवा छोइड़ देलक।