खास चेलामन केर काम 23 - सादरी नवाँ नियम

¹ पौलुस धरम महासभा केर आदमीमन बटे धेयान से देइख के कहलक, “हे भाईमन, मोंय आइज तक परमेश्‍वर लगिन बुद्धिमानी से जिंदगी बिताय हों।”

² इ सुइन के यहूदी महापुरोहित हनन्याह, पौलुस केर भीरे ठड़ाल आदमीमन के पौलुस केर मुँह में थप्पड़ मारेक केर हुकूम देलक।

³ तब पौलुस उकर से कहलक, “हे पाखंडी, परमेश्‍वर तोके हें मारी। तोंय हिंयाँ मूसा केर नियम केर मोताबिक मोर न्याय करेक लगिन बाइठ हिस, फिन भी तोंय मूसा केर नियम केर बिरोध मोके मारेक केर हुकूम देइसला?”

⁴ जे आदमीमन पौलुस केर भीरे ठड़ाल रहैं उमन पौलुस से कहलैं, “तोके परमेश्‍वर केर यहूदी महापुरोहित केर अपमान करेक केर साहस कइसन होलक?”

⁵ पौलुस जबाब देलक, “हे भाईमन, मोंय नी जानत रहों कि इ यहूदी महापुरोहित हेके। काले कि पवितर किताब में लिखल अहे, ‘अपन परजा केर अगुवा के बुरा शबद ना कहबे।’”

⁶ पौलुस इ जानत रहे कि धरम महासभा में आदमीमन दूई दल अहैं, सदूकी दल केर आदमीमन आउर फरीसी दल केर आदमीमन। से लगिन उ जोर से कहलक, “हे भाईमन, मोंय फरीसी आउर फरीसी आदमीमन केर संतान हेकों। मोर आसरा अहे कि परमेश्‍वर मोरल आदमीमन के फिन से जिंदा करी। मोर इ बिसवास केर चलते मोर उपरे फैसला होवाथे।”

⁷ जइसनेहें पौलुस एइसन कहलक, फरीसी दल आउर सदूकी दल केर आदमीमन में झगरा होवेक लगलक आउर महासभा में फूट होई गेलक।

⁸ काले कि सदूकी दल केर आदमी मनक इ बिसवास अहे कि आदमीमन मोइर के फिन जिंदा नी होबैं, ना स्वरगदूतमन अहैं आउर ना आत्मा अहे, मगर फरीसी दल केर आदमीमन इ सोउब में बिसवास करैना।

⁹ इ लेखे मुरुक शोर-गूल होवेक लगलक, तब थोरेक फरीसी दल केर आदमीमन जे मूसा केर नियम के सिखाएक वाला रहैं, ठड़ाय गेलैं आउर इ कइह के बिरोध करलैं, “हमरे इ आदमी केर उपरे कोनों दोष नी पावाथी। अगर केऊ आत्मा चाहे स्वरगदूत उकर से कोनों कइह हे, तो फिन का?”

¹⁰ जब झगरा ढेइर बाइढ़ गेलक तो पलटन केर सरदार के डार होलक कि कहीं इमन पौलुस के टुकरा-टुकरा ना काइर देबैं, से लगिन उ पलटनमन के हुकूम देलक कि पौलुस के सभा केर माझे से निकलाय के किला में लेई जाओक।

¹¹ ओहे राइत के प्रभु यीशु पौलुस ठिना ठड़ाय के उकर से कहलक, “हे पौलुस ढाढ़स बाँध, जइसन तोंय यरुशलेम शहर में मोर बारे में गवाही देले, तइसनेहें तोके रोम देस में हों गवाही देवेक होवी।”

पौलुस के मोराएक केर योजना

¹² बिहाने थोरेक यहूदी आदमीमन मिल के पौलुस केर बिरोध में जाल फंदा बुनलैं आउर किरिया खालैं कि जब तक हमरे पौलुस के नी माइर मोराब, तब तक हमरे कोनों नी खाब ना पियब।

¹³ इ जाल-फंदा बुनेक वाला आदमीमन चालीस झन से बगरा रहैं।

¹⁴ उमन यहूदी मुध पुरोहितमन आउर धरम केर अगुवामन ठिना जाय के कहलैं, “हमरे किरिया खाय ही कि जब तक हमरे पौलुस के नी माइर मोराब, तब तक कोनों नी खाब आउर ना पियब।

¹⁵ से लगिन अब धरम महासभा केर आदमीमन से मिल के पलटन केर सरदार के खबर भेजा कि तोहरे पौलुस केर मामला के ठीक-ठीक जाँच करेक चाहाला, उ पौलुस के तोहर ठिना भेइज देवोक। उकर हिंयाँ पोंहचेक से पहिलेहें हमरे उके माइर मोराएक केर तेयारी काइर ही।”

¹⁶ मगर पौलुस केर भगिना इ माइर मोराएक केर बारे में सुनलक। आउर किला में जाय के पौलुस के इकर बारे में खबर देलक।

¹⁷ पौलुस सौ फौजमन केर एगो अधिकारी के अपन ठिना बोलाय के कहलक, “इ जवान के पलटन केर सरदार ठिना लेई जा, इ उकर से कोनों कहेक चाहाथे।”

¹⁸ उ जवान के पलटन केर सरदार ठिना लेई जाय के कहलक, “पौलुस बंधुवा मोके बोलाय के मोर से बिनती करलक कि मोंय इ जवान के तोर ठिना लानमूँ, काले कि इ तोर से कोनों कहेक चाहाथे।”

¹⁹ पलटन केर सरदार उकर हाँथ धाइर के अलगे लेई जाय के उकर से पूछलक, “तोंय मोर से का कहेक चाहाथिस?”

²⁰ उ कहलक, “यहूदी धरम केर अगुवामन जाल फंदा बुइन हैं कि उमन तोर से इ बिनती करबैं कि उमन पौलुस केर मामला के ठीक से जाँच करेक चाहाथैं, से लगिन तोंय काइल पौलुस के यहूदी अगुवा मनक महासभा में लानबे।

²¹ मगर तोंय उ मनक इ बिनती के ना मानबे, काले कि उमन में से चालीस झन से बगरा आदमीमन पौलुस के मोराएक केर ताक में अहैं, उमन किरिया खाय हैं कि जब तक हमरे पौलुस के नी माइर मोराब, तब तक कोनों नी खाब-पियब। आउर उमन अब तेयार अहैं, आउर तोर हाँ कहेक केर आसरा देखाथैं।”

²² पलटन केर सरदार पौलुस केर भगिना के इ आगया देलक, “केखो इ ना बताबे कि तोंय मोके इ गोइठ के बताहिस।” आउर उ जवान के बिदा करलक।

पौलुस के राजपाल फेलिक्स ठिना भेजल जाएक

²³ पलटनमन केर सरदार दूई झन सूबेदारमन के बोलाय के कहलक, “आइज राइत नौ बजे तक कैसरिया शहर जाएक लगिन दूई सौ पलटनमन, सत्तर घोड़सवारी, आउर दूई सौ बरछा धराइया पलटनमन के तेयार रखा।

²⁴ आउर पौलुस लगिन हों घोड़ा तेयार रखा, जेकर से उमन पौलुस के राजपाल फेलिक्स ठिना सही सलामत पोंहचाय देवोक।”

²⁵ उ इ लेखे चिट्ठी हों लिखलक,

²⁶ “महाप्रतापी राजपाल फेलिक्स के क्लौदियुस लूसियास केर बटे से जोहार।

²⁷ इ आदमी के यहूदी आदमीमन धाइर लेई रहैं आउर इके माइर मोराएक चाहत रहैं, मगर मोंय अपन पलटनमन केर संगे हूवाँ पोंहइच के इके छोड़ाय लेलों, काले कि मोके पता चललक कि इ आदमी रोम देस केर रहेक वाला हेके।

²⁸ मोंय जानेक चाहत रहों कि उमन इकर उपरे का लगिन दोष लगाथैं, से लगिन मोंय इके उ मनक धरम महासभा में लेई गेलों।

²⁹ हूवाँ मोके पता चललक कि उमन अपन यहूदी नियम केर बारे में इकर उपरे दोष लगाथैं, मगर इकर उपरे माइर मोराएक जाएक या जेहेल घर में साजल जाएक केर लायक कोनों दोष नखे।

³⁰ जब मोके खबर मिललक कि उमन इ आदमी के मोराएक केर ताक में लगल अहैं, तो मोंय तुरते इके तोर ठिना भेइज देलों। आउर इकर उपरे दोष लगाएक वालामन के हों हुकूम देलों कि उमन तोर सामने इकर उपरे दोष लगाओक।”

³¹ हुकूम केर मोताबिक पलटनमन पौलुस के यरुशलेम शहर से लेई के राइते के अन्तिपत्रिस शहर में पोंहचाय देलैं।

³² दूसरा दिन उमन घोड़सवारीमन के पौलुस केर संगे कैसरिया शहर जाएक लगिन छोइड़ के पैदल पलटनमन यरुशलेम शहर में घूइर आलैं।

³³ घोड़सवारीमन कैसरिया शहर पोंहइच के राजपाल के चिट्ठी देलैं आउर पौलुस के उकर सामने ठड़ुवालैं।

³⁴ राजपाल चिट्ठी पइढ़ के पौलुस से पूछलक, “तोंय कोन परदेस केर हेकिस?” आउर इ जाइन गेलक कि पौलुस किलिकिया परदेस केर हेके,

³⁵ तो उकर से कहलक, “जब तोर उपरे दोष लगाएक वालामन आबैं तब तोर सुनवाई होवी।” आउर पौलुस के राजा हेरोदेस केर राजमहल में रखेक केर हुकूम देलक।