खास चेलामन केर काम 22 - सादरी नवाँ नियम

भीड़ केर सामने पौलुस केर भाषण

¹ पौलुस कहलक, “हे भाईमन आउर आबामन, अब मोंय अपन बचाव में कोनों कहेक चाहाथों, उके सुना।”

² जब उमन पौलुस के इब्रानी भाषा में कहते सुनलैं तो उमन आउर हें चुप होई गेलैं। तब पौलुस उमन से इ कहेक शुरु करलक,

³ “मोंय तो यहूदी आदमी हेकों, मोर जनम किलिकिया परदेस केर तरसुस नगर में होई रहे, मगर मोंय एहे शहर यरुशलेम में पोइस-बाइढ़ हों। मोर शिक्षा-दीक्षा मूसा केर नियम केर मोताबिक गमलीएल महोदय केर देख-रेख में होलक। आइज परमेश्‍वर केर लगिन जइसन तोहरे धुन लगाय हा, तइसनेहें मोंय हों लगाय रहों।

⁴ मोंय यीशु मसीह केर डहर में चलेक वाला आदमीमन के जान लेवेक तक सतात रहों, मरदाना आउर जनाना दुयो के बाइंध-बाइंध के जेहेल घर में साइज देवत रहों।

⁵ यहूदी महापुरोहित आउर महासभा केर सोउब यहूदी धरम केर अगुवामन इ गोइठ केर गवाह हेकैं, ओहेमन से मोंय अधिकार केर चिट्ठी लेई के दमिश्क नगर जात रहों, ताकि हूवाँ केर बिसवासी भाईमन के बाइंध के यरुशलेम शहर लेई आमूँ आउर सजा देवामूँ।

अपन मन बदलेक केर बारे में बताएक

⁶ जब मोंय चलते-चलते लगभग दूई पहर के दमिश्क नगर केर भीरे पोहोंचलों तो अचका आकाश से एक तेज इंजोत मोर चाइरो बटे चमकलक।

⁷ आउर मोंय भूंई उपरे गिर गेलों आउर इ आवाज सुनलों, ‘हे शाऊल, हे शाऊल, तोंय मोके काले सताथिस?’

⁸ मोंय जबाब देलों, ‘हे प्रभु तोंय के हेकिस?’ उ मोर से कहलक, ‘मोंय नासरत नगर केर रहेक वाला यीशु हेकों, जेके तोंय सताथिस।’

⁹ जे मोर संगे रहैं उमन इंजोत के देखलैं, आउर उकर आवाज के हों सुनत रहैं, मगर उमन बुझेक नी पारलैं कि आवाज मोर से का कहलक।

¹⁰ तब मोंय पूछलों, ‘हे प्रभु! मोंय का करमूँ?’ प्रभु मोके जबाब देलक, ‘उठ आउर दमिश्क नगर में जा, आउर जे भी काम तोर करेक लगिन ठहराल जाय हे, उ सोउब तोके हूवाँ बताय देवल जाई।’

¹¹ मोंय तेज रोशनी केर चलते कोनों देखेक नी पारत रहों, से लगिन मोंय अपन संगमन केर हाँथ धाइर के दमिश्क नगर आलों।

¹² हूवाँ हनन्याह नाँव केर एगो आदमी रहे, जे मूसा केर नियम केर मोताबिक चलेक वाला एगो भक्त आदमी रहे, आउर हूवाँ केर रहेक वाला यहूदी आदमीमन में उकर बेस नाँव रहे।

¹³ उ मोर ठिना आलक आउर ठड़ाय के मोर से कहलक, ‘हे भाई शाऊल फिन से देखेक लग।’ ओहे बेरा मोर आँइख खुइल गेलक आउर मोंय उके देखलों।

¹⁴ तब उ मोर से कहलक, ‘हमर बाप दादामन केर परमेश्‍वर तोके इ लगिन चुइन हे कि तोंय उकर इच्छा के जानबे आउर उ धरमी यीशु के देखबे आउर उकर आवाज के सुनबे।

¹⁵ काले कि तोके परमेश्‍वर बटे से सोउब आदमीमन केर सामने उ गोइठमन केर गवाही देवेक अहे, जेके तोंय देखले आउर सुइन हिस।

¹⁶ अब काले देरी कराथिस? उठ, अपन पापमन केर क्षमा पावेक लगिन यीशु उपरे बिसवास काइर के बपतिस्मा जल संस्कार ले।’

इफिसुस केर कलीसिया केर अगुवामन केर उपदेस

¹⁷ जब मोंय यरुशलेम शहर में घुरलों आउर यहूदी मनक मंदिर में प्रार्थना करत रहों, तो मोंय एगो दर्शन देखलों।

¹⁸ आउर प्रभु यीशु दर्शन में मोर से इ कहाथे, ‘तोंय यरुशलेम शहर से जल्दी निकइल जा, काले कि उमन मोर बारे में तोर गवाही के नी मानबैं।’

¹⁹ मोंय कहलों, ‘हे प्रभु, उमन तो खुद जानैना कि मोंय तोर उपरे बिसवास करेक वाला आदमीमन के यहूदी मनक प्रार्थना घर में पिटवात रहों आउर जेहेल घर में भितरात रहों।

²⁰ आउर जब तोर गवाही देवेक वाला स्तिफनुस केर लोहू बहाय के उके माइर मोराल जात रहे, तो मोंय हों उके मोराएक में राजी रहों आउर हूवाँ ठड़ाल रहों, एतना हें निहीं, जेमन उके माइर मोरात रहैं, उ मनक लुगा केर रखवाली हों मोंय करत रहों।’

²¹ आउर प्रभु यीशु मोर से कहलक, ‘चाइल जा, काले कि मोंय तोके सोउब जाइत केर आदमीमन ठिना दूर-दूर तक भेजमूँ।’”

पौलुस रोम देस केर रहेक वाला

²² हिंयाँ तक तो उमन पौलुस केर इ गोइठ के धेयान से सुनते रहलैं, मगर अब उमन जोर से चिल्लाय के कहेक लगलैं, “एइसन आदमी के माइर मोरावा। इकर जिंदा रहेक बेस नखे।”

²³ जब उमन चिल्लाएक आउर अपन उपरी लुगा के फेकेक आउर आकाश में धूर उड़ाएक लगलैं,

²⁴ तो पलटन केर सूबेदार कहलक, “इके किला में लेई जावा आउर कोड़रा माइर के जाँच करा कि आदमीमन का लगिन इकर बिरोध में एइसन चिल्लाथैं।”

²⁵ जब पलटनमन उके कोड़रा मारेक लगिन सिकड़ से बाँधत रहैं तो पौलुस भीरे ठड़ाल सूबेदार से पूछलक, “का तोके कानून केर मोताबिक एइसन आदमी के जे रोम देस केर रहेक वाला हेके आउर उकर दोष हों साबित नी होई हे, कोड़रा मारेक उचित अहे?”

²⁶ इ सुइन के सूबेदार पलटनमन केर सरदार ठिना जाय के उके बतालक, “तोंय इ का कराथिस?” इ तो रोमी आदमी हेके।

²⁷ तब पलटन केर सरदार पौलुस ठिना आय के उकर से पूछलक, “मोके बताव, का तोंय रोम देस केर रहेक वाला रोमी हेकिस?” पौलुस उके जबाब देलक, “हाँ।”

²⁸ इ सुइन के पलटन केर सरदार कहलक, “मोंय रोमी बनेक केर पद ढेइर रुपया देई के पाय हों।” पौलुस जबाब देलक, “मोंय तो जनमे से रोमी आदमी हेकों।”

²⁹ तब जे आदमीमन पौलुस के जाँचेक वाला रहैं, उमन तुरते उकर ठिना से हाइट गेलैं आउर पलटन केर सरदार हों जे पौलुस के सिकड़ से बंधुवाय रहे, इ जाइन के कि पौलुस रोम देस केर रहेक वाला रोमी हेके, डराय गेलक।

महासभा केर सामने पौलुस

³⁰ अगला दिन सूबेदार पौलुस केर बारे में ठीक-ठीक जानेक केर इच्छा से कि यहूदी आदमीमन उकर उपरे का केर दोष लगाथैं, सिकड़ के खोइल देलक आउर यहूदी मुध पुरोहितमन के आउर धरम महासभा केर सोउब आदमीमन के जमा होवेक केर हुकूम देलक, आउर पौलुस के लाइन के उ मनक सामने ठड़ुवाय देलक।