खास चेलामन केर काम 21 - सादरी नवाँ नियम

पौलुस केर यरुशलेम शहर जाएक

¹ हमरे उमन से बिदा लेई के पानी जहाज में बइठली आउर सोझ डहर से कोस टापू में आली आउर दूसरा दिन रुदुस टापू में आली आउर हूवाँ से पतरा टापू में चाइल गेली।

² हूवाँ हमरे के एगो पानी जहाज मिललक, जे फीनीके परदेस जाएक वाला रहे। से लगिन हमरे उकर में चाइढ़ गेली आउर हूवाँ से चाइल गेली।

³ हमरे के लेंगा आरा साइप्रस टापू देखाई देलक। हमरे उके छोइड़ के सीरिया परदेस बटे बढ़ते गेली आउर सूर नगर में उतरली, काले कि हूवाँ जहाज से सामान उतराएक रहे।

⁴ हमरे हूवाँ चेलामन केर पता लगाली आउर उमन केर संगे सात दिन तक रहली। पवितर आत्मा केर अगुवाई से उमन घरी-घरी पौलुस से यरुशलेम शहर नी जाएक केर बिनती करते रहलैं।

⁵ सात दिन केर पाछे जब हमरे केर हूवाँ से जाएक केर समय आलक तो उमन सोउब परिवार केर संगे हमरे के बिदा करेक लगिन नगर केर सिमान तक आलैं। हमरे समुदर केर किनारे ठेहुना टेइक के प्रार्थना करली।

⁶ आउर हमरे उमन से बिदा लेई के पानी जहाज में चढ़ली आउर उमन अपन-अपन घर घूइर गेलैं।

⁷ हमरे सूर नगर से पतुलिमयिस नगर में पोहोंचली आउर हूवाँ बिसवासी भाईमन से भेंट करली आउर उमन केर संगे एक दिन रहली।

⁸ आउर अगला दिन हमरे हूवाँ से चाइल के कैसरिया शहर में आली। हूवाँ हमरे शुभ समाचार परचार करेक वाला फिलिप्पुस केर घर गेली आउर उकर हिंयाँ रहली। फिलिप्पुस उ सात आदमीमन में से एगो रहे, जेमन के यरुशलेम शहर में यीशु केर चुनल खास चेलामन बिधवा जनानामन केर देख-भाल करेक लगिन चुइन रहैं।

⁹ फिलिप्पुस केर चाइर गो कुँवारी बेटीमन रहैं, जेमन भविष्यवाणी करत रहैं।

¹⁰ जब हमरे के हूवाँ रहते काय दिन होई गेलक तो अगबुस नाँव केर एगो परमेश्‍वर केर संदेश के बताएक वाला यहूदिया परदेस से हमर ठिना आलक।

¹¹ उ हमर ठिना आय के पौलुस केर कसना के लेलक आउर उकर से अपन हाँथ-गोड़ के बाइंध के कहलक, “पवितर आत्मा इ कहेला, ‘जे आदमी केर इ कसना हेके, उके यरुशलेम शहर में यहूदी आदमीमन एहे लेखे बाँधबैं आउर उके दोसर जाइतमन केर हाँथ में जिम्मा देबैं।’ ”

¹² इ गोइठ सुइन के हमरे आउर हूवाँ केर आदमीमन पौलुस से बिनती करली कि यरुशलेम शहर ना जाओक।

¹³ मगर पौलुस उमन के जबाब देलक, “तोहरे इ का कहाथा? तोहरे काइंद-काइंद के मोके काले दुःख देवाथा? मोंय तो प्रभु यीशु केर नाँव लगिन यरुशलेम शहर में ना सिरिफ बाँधल जाएक लगिन मगर मोरेक लगिन हों तेयार अहों।”

¹⁴ जब उ हमर गोइठ मानेक लगिन तेयार नी होलक तो हमरे इ कइह के चुप होई गेली कि प्रभु केर इच्छा पूरा होवोक।

¹⁵ थोरेक दिन केर पाछे हमरे तेयारी केर संगे यरुशलेम शहर चाइल गेली।

¹⁶ कैसरिया शहर केर थोरेक चेलामन हों हमर संगे आलैं आउर रहेक लगिन हमरे के मनासोन नाँव केर एगो आदमी केर घर लेई गेलैं, जे साइप्रस नगर केर रहेक वाला रहे, आउर उ सोउब से पहिले केर चेलामन में से एगो रहे।

पौलुस केर याकूब से भेंट

¹⁷ जब हमरे यरुशलेम शहर में पोहोंचली तो हूवाँ केर बिसवासी भाईमन खुशी से हमर संगे मिललैं।

¹⁸ अगला दिन पौलुस हमरे के लेई के याकूब ठिना गेलक, जहाँ कलीसिया केर अगुवामन सोउब जमा होई रहैं।

¹⁹ पौलुस उमन के जोहार करलक आउर जे काम परमेश्‍वर उकर सेवकाई केर जरिया से परजाइत आदमीमन में काइर रहे, सोउब के एक-एक काइर के उमन के बतालक।

²⁰ उमन इ सुइन के परमेश्‍वर केर महिमा करलैं आउर फिन पौलुस से कहलैं, “हे भाई, तोंय जानिसला कि हजारो यहूदी आदमीमन बिसवास काइर लेई हैं आउर उमन सोउब मूसा केर नियम के ढेइर बिसवास से मानैना।

²¹ यहूदी बिसवासी आदमीमन के तोर बारे में बताल जाय हे कि तोंय परजाइत आदमीमन केर माझे रहेक वाला यहूदी आदमीमन के मूसा केर नियम के मानेक छोइड़ देवेक केर बारे में सिखाइसला, आउर कहिसला कि उमन ना अपन छउवामन केर खतना करोक आउर ना यहूदी रीति-रिवाज के मानोक।

²² अब तोंय बताव हमरे का करब? उमन के जरूर पता चाइल जाई कि तोंय हिंयाँ आय जाय हिस।

²³ से लगिन जे हमरे तोर से कहाथी, उके कर। हमर ठिना चाइर झन आदमी अहैं, उमन के उ गाछल के पूरा करेक अहे, जेके उमन परमेश्‍वर केर सामने माइन हैं।

²⁴ तोंय उमन केर संगे जा आउर खुद के आउर उमन के शुद्ध करेक केर नियम के पूरा कर, तोंय उमन केर मुंडन केर खरचा उठाव। तब सोउब के इ पता होई जाई कि जे कुछ भी तोर बारे में उमन के बताल जाय हे, उ झूठा हेके आउर तोंय खुद मूसा केर नियम के मानिसला आउर उकर मोताबिक चलिसला।

²⁵ मगर जहाँ तक परजाइत बिसवासी आदमीमन केर सवाल अहे, हमरे चिट्ठी लीख के अपन फैसला भेइज देई ही कि उमन मूर्तिमन लगिन बलि चढ़ाल माँस के, आउर लोहू के आउर घेंचा चीप के मोराल जानवरमन केर माँस के ना खाओक आउर ब्यभिचार ना करोक।”

²⁶ तब पौलुस उ आदमीमन के लेई गेलक आउर दूसरा दिन उमन केर संगे खुद के शुद्ध करेक केर पाछे उ यहूदी मनक मंदिर में गेलक आउर इ बताय देलक कि उ मनक शुद्ध होवेक केर दिन आउर उमन में से हरेक लगिन भेंट चढ़ाल जाएक केर दिन कहिया पूरा होवी।

मन्दिर में पौलुस केर धराय जाएक

²⁷ जब उ सात दिन पूरा होवेक वाला रहे तो आसिया परदेस केर यहूदी आदमीमन पौलुस के यहूदी मनक मंदिर में देइख के भीड़ केर आदमीमन के उसकालैं। उमन पौलुस के धाइर लेलैं आउर चिल्लाय के इ कहेक लगलैं,

²⁸ “हे इसराइली आदमीमन, हमर मदइत करा, इ ओहे आदमी हेके, जे सोउब ठाँव में मूसा केर नियम केर, हमर जाइत केर, आउर यहूदी मनक इ मंदिर केर बिरोध में सोउब आदमीमन के शिक्षा देवेला, इकर अलावा यूनान देस केर आदमीमन के मंदिर में लाइन के इ पवितर ठाँव के अपवितर काइर देई हे।”

²⁹ उमन एइसन इ लगिन कहलैं काले कि उमन आगे हें इफिसुस शहर केर रहेक वाला त्रुफिमुस के पौलुस केर संगे नगर में देइख रहैं, आउर समझत रहैं कि पौलुस उके अपन संगे यहूदी मनक मंदिर में लेई आय हे।

³⁰ तब गोटा नगर में खलबली मइच गेलक, आउर आदमीमन चाइरो बटे से कूइद के जमा होलैं। उमन पौलुस के धाइर के मंदिर केर बाहरे खींच लानलैं आउर यहूदी मनक मंदिर केर दुरा के तुरते बंद काइर देलैं।

³¹ उमन पौलुस के माइर मोराएक केर योजना बनात रहैं कि रोमी पलटन केर मालिक के खबर मिललक कि गोटा यरुशलेम शहर में खलबली मइच हे।

³² तब उ तुरते पलटनमन आउर सूबेदारमन के लेई के भीड़ बटे कूइद आलक। जब आदमीमन पलटन केर सरदार के आउर पलटनमन के देखलैं तो उमन पौलुस के मारेक-पिटेक बंद काइर देलैं।

³³ तब पलटनमन केर सरदार भीरे आय के पौलुस के धाइर लेलक आउर उके दूई गो सिकड़ से बाँधेक केर हुकूम देलक। तब उ आदमीमन से पूछेक लगलक, “इ के हेके आउर इ का काइर हे?”

³⁴ मगर भीड़ में से केऊ कुछ चिल्लात रहैं तो केऊ आउर कुछ। शोर गूल केर चलते उ सच्चाई के नी जानेक पारलक, से लगिन उ पौलुस के किला में लेई जाएक केर हुकूम देलक।

³⁵ जब पौलुस सीढ़ी में पोहोंचलक, तो भीड़ केर दबाव केर चलते पलटनमन के पौलुस के उठाय के लेई जाएक होलक।

³⁶ आदमीमन केर भीड़ इ चिल्लाते उकर पिछे आवत रहे, “उके माइर मोरावा।”

³⁷ जब उमन पौलुस के किला भीतरे लेई जात रहैं, तो उ पलटन केर सरदार से कहलक, “का मोंय तोर से कोनों कहेक पारमूँ?” उ जबाब देलक, “का तोंय यूनानी भाषा जानिसला?

³⁸ का तोंय मिसरी मनक देस केर उ ना लगिस, जे थोरेक दिन पहिले सरकार केर बिरोध बिद्रोह काइर के चाइर हजार आतंकीमन के सुनसान ठाँव में लेई जाय रहे?”

³⁹ पौलुस कहलक, “मोंय यहूदी आदमी हेकों आउर किलिकिया परदेस केर नामी नगर तरसुस केर रहेक वाला हेकों। मोंय तोर से बिनती कराथों कि मोके आदमीमन से गोठियाएक केर आगया दे।”

⁴⁰ जब पलटनमन केर सरदार उके आगया देलक तो पौलुस सीढ़ी में ठड़ाय के आदमीमन के चुप रहेक लगिन हाँथ से इशारा करलक। जब सोउब चुप होई गेलैं तो पौलुस इब्रानी भाषा में कहेक लगलक,