खास चेलामन केर काम 20 - सादरी नवाँ नियम

इफिसुस शहर से पौलुस केर जाएक

¹ जब शहर में दंगा शांत होई गेलक तो पौलुस चेलामन के बुलवाय के उमन के उत्साहित करलक आउर उमन से बिदा होई के मकिदुनिया परदेस चाइल गेलक।

² उ सोउब परदेस में से होई के हूवाँ केर बिसवासीमन के उपदेस देई-देई के उ मनक हिम्मत के बढ़ाते गेलक आउर यूनान परदेस में आलक।

³ हूवाँ तीन महिना बिताएक केर पाछे पानी जहाज से सीरिया परदेस जाएक वाला रहे। मगर जब उ सुनलक कि थोरेक यहूदी अगुवामन उके जहाज में मोराएक केर सलहा कराथैं, तो उ मकिदुनिया परदेस से होई के घूइर जाएक केर फैसला करलक।

⁴ बिरीया नगर केर रहेक वाला पुरूष केर बेटा सोपत्रुस, थिस्सलुनीके शहर केर रहेक वाला अरिस्तर्खुस आउर सिकुंदुस, दिरबे नगर केर गयुस आउर लुस्त्रा नगर केर तीमुथियुस आउर आसिया परदेस केर तुखिकुस आउर त्रुफिमुस, इमन सोउब पौलुस केर संगे जात रहैं।

⁵ मगर इ सोउब संगे जावाइयामन हमर से आगे चाइल गेलैं आउर त्रोआस नगर में पोंहइच के हमर इन्तजार करत रहैं।

⁶ मगर हमरे दुयो पैदल फिलिप्पी शहर चाइल गेली आउर हमरे बिन खमीर रोटी केर परब पाछे फिलिप्पी शहर से पानी जहाज में चाइढ़ के पाँच दिन में त्रोआस नगर में उ मनक ठिना पोहोंचली, आउर हूवाँ सात दिन तक रहली।

त्रोआस नगर में यूतुखुश के जियाएक

⁷ हफ्ता केर पहिला दिन हमरे प्रभु भोज लगिन जमा होली, काले कि पौलुस अगला दिन जाएक वाला रहे, से लगिन पौलुस आधा राइत तक बिसवासी भाईमन के उपदेस देते रहलक।

⁸ हमरे जे कोठरी में जमा होई रही, हूवाँ ढेइर दीया बरत रहे।

⁹ हूवाँ यूतुखुश नाँव केर एगो जवान खिड़की केर चौखट में बइठल नींद में झुपत रहे। जब पौलुस ढेइर देरी तक उपदेस देते रहलक, तो उ नींद केर झटका से तीसरी मंजिल से हेंठे गिर गेलक, तब थोरेक आदमीमन हेंठे कूइद के गेलैं आउर उके उठालैं, तो उ मोइर जाय रहे।

¹⁰ पौलुस हेंठे उतइर के उकर ठिना गेलक, आउर उकर से लिपइट के गले लगाय के कहलक, “ना घबराबा, काले कि उ एखनोहों जिंदा अहे।”

¹¹ पौलुस दोबारा उपरे जाय के प्रभु भोज खालक। आउर उ एतना देरी तक उमन से गोठियाते रहलक कि बिहान होई गेलक। फिन उ हूवाँ से चाइल गेलक।

¹² आउर उमन उ जवान के जिंदा लेई आनलैं। इकर से आदमीमन के ढेइर शांति मिललक।

पौलुस केर त्रोआस नगर से मिलेतुस नगर जाएक

¹³ हमरे पानी जहाज में चाइढ़ के अस्सुस नगर बटे आगे बाइढ़ गेली, जहाँ से हमरे के पौलुस के जहाज में लेई के आगे बढ़ेक रहे। पौलुस हूवाँ पैदल पोंहइच रहे, काले कि उ इ योजना के आगे हें ठहराय रहे।

¹⁴ जब पौलुस अस्सुस नगर में हमरे से मिललक तो हमरे उके पानी जहाज में चढ़ाय के मितुलेने नगर में आली।

¹⁵ आउर हूवाँ से जहाज खोइल के हमरे दूसरा दिन खियुस नगर केर भीरे से होई के सामुस नगर पोहोंचली, आउर उकर अगला दिन मिलेतुस नगर में आली।

¹⁶ पौलुस इफिसुस शहर में जहाज से नी उतरेक केर फैसला करलक, काले कि उ आसिया परदेस में आउर बगरा समय बिताएक नी चाहत रहे। काले कि उ जल्दी में रहे आउर पिन्तेकुस्त परब केर मोका में यरुशलेम शहर में रहेक चाहत रहे।

इफिसुस शहर केर धरम केर अगुवामन से बिदा होवेक

¹⁷ जब हमरे मिलेतुस नगर में पोहोंचली तो पौलुस इफिसुस शहर केर कलीसिया केर अगुवामन ठिना खबर भेइज के उमन के अपन ठिना बोलालक।

¹⁸ जब उमन उकर ठिना आलैं तो पौलुस उमन से कहलक, “तोहरे जानाला कि आसिया परदेस में मोर आवेक केर पहिला दिन से हें मोर ब्यवहार तोहर संगे का लेखे रहलक।

¹⁹ आउर का लेखे मोंय आँसू बहाय-बहाय के खुद के नरम बनाय के उ सोउब बिपत्तिमन में प्रभु केर सेवा करते रहलों, जे यहूदी अगुवामन केर जाल फंदा केर खातिर मोर उपरे आय रहे।

²⁰ आउर जे-जे गोइठमन तोहर फायदा केर रहे, उमन के बताएक में मोंय नी हिचकिचालों, आउर आदमीमन केर सामने आउर घर-घर जाय के उकर बारे में शिक्षा देवेक से पिछे नी हटलो।

²¹ मगर यहूदी आदमीमन आउर यूनानी आदमीमन केर सामने गवाही देते रहलों कि उमन पाप काम करेक छोइड़ के परमेश्‍वर बटे घुरोक आउर हमरे केर प्रभु यीशु मसीह केर उपरे बिसवास करोक।

²² अब, मोंय पवितर आत्मा केर चलाएक से मजबूर होई के यरुशलेम शहर जाथों, मोंय नी जानोना कि हूवाँ मोर उपरे का-का बीती,

²³ मोंय तो सिरिफ एतना जानोना कि हर नगर में पवितर आत्मा मोके चेताते जाथे कि जेहेल घर आउर दुःख मोर लगिन रखल अहे।

²⁴ मगर मोके अपन प्राण से कोनों मोह-माया नखे, मोंय तो सिरिफ उ सेवकाई के पूरा करेक चाहाथों, जेके प्रभु यीशु मसीह मोके जिम्मा देई हे, मतलब परमेश्‍वर केर किरपा केर शुभ समाचार के सच्चाई से परचार करमूँ।

²⁵ मोंय तोहर माझे परमेश्‍वर केर राइज केर परचार करते फिरलों। अब मोंय जानोना कि तोहरे मोके फिन कहियो देखेक नी पारबा।

²⁶ से लगिन मोंय आइज केर दिन तोहरे से गवाही देई के कहाथों कि तोहर में से केऊ यीशु केर उपरे बिसवास करल बिना मोइर जाई, तो इकर जिम्मेदार मोंय ना लगों।

²⁷ काले कि मोंय तोहरे के उ सोउब कुछ के बतालों, जेके परमेश्‍वर तोहरे के जनुवाएक चाहेला। मोंय कोनों के नी लुकालों।

²⁸ से लगिन तोहरे खुद केर आउर उ दल केर रखवाली करा जेकर लगिन पवितर आत्मा तोहरे के अगुवा चुइन हे, ताकि तोहरे परमेश्‍वर केर कलीसिया केर देखभाल करबा, जेके उ अपन बेटा केर लोहू देई के कीन लेई हे।

²⁹ मोंय जानोना कि मोर जाएक केर पाछे झूठा शिक्षा देवेक वाला आदमीमन आबैं आउर बिसवासी आदमीमन के ढेइर नोकसान पोंहचाबैं। उमन एइसन होबैं जइसन फाइर खाएक वाला भेड़ियामन, जे भेड़ीमन के फाइर खायना।

³⁰ हिंयाँ तक कि तोहर अपन बिसवासी दल से हें एइसन आदमीमन निकलबैं, जेमन चेलामन के अपन बटे मिलाएक लगिन उल्टा-पुल्टा शिक्षा देबैं।

³¹ से लगिन इके याइद करते रहा आउर सावधान रहा कि तीन बरिस तक दिन-राइत आँसू बहाय-बहाय के तोहर में से हरेक झन के चेताते रहलों।

³² अब मोंय तोहरे के परमेश्‍वर केर आउर उकर किरपा केर बचन केर देख-रेख में जिम्मा देवाथों, जे तोहर बिसवास के मजबूत करी। आउर परमेश्‍वर तोहरे के उ बपौती अधिकार देवी, जेके देवेक केर करार उ सोउब आदमीमन से काइर हे, जेमन उकर से पवितर करल जाय हैं।

³³ मोंय कहियो केकरो चाँदी, सोना या लुगा केर लोभ नी करलों।

³⁴ तोहरे खुद हें जानाला कि मोंय अपन आउर अपन संगमन केर जरुरत के पूरा करेक लगिन अपन एहे हाँथ से काम करलों।

³⁵ मोंय तोहरे के सोउब कुछ काइर के देखालों कि का लेखे मेहनइत काइर के कमजोर आदमीमन के संभराएक चाही। तोहरे के प्रभु यीशु केर गोइठमन के याइद रखेक जरुरी अहे, उ खुद कइह हे, ‘लेवेक से देवेक धाइन अहे।’ ”

³⁶ एतना कइह के पौलुस ठेहुना टेइक के उमन केर संगे प्रार्थना करलक।

³⁷ तब सोउब चेलामन मुरुक काँदेक लगलैं आउर पौलुस केर घेंचा में लिपइट के उके चूमेक लगलैं।

³⁸ उमन केर दुःखी होवेक केर बाड़ कारण इ रहे कि पौलुस उमन से कइह रहे कि तोहरे मोके फिन कहियो देखेक नी पारबा। इकर पाछे उमन उके पानी जहाज तक छोड़ेक आलैं।