खास चेलामन केर काम 19 - सादरी नवाँ नियम

इफिसुस शहर में यूहन्ना केर चेलामन

¹ जब अपुल्लोस कुरिन्थुस शहर में रहे। पौलुस भीतरे केर सोउब परदेस से होई के इफिसुस शहर में आलक। हूवाँ थोरेक चेलामन मिललैं।

² पौलुस उमन से पूछलक, “का तोहरे बिसवास करेक बेरा पवितर आत्मा के पाय हा?” उमन उके जबाब देलैं, “निहीं, हमरे तो पवितर आत्मा का हेके, इकर बारे में कोनों नी सुइन ही।”

³ तब पौलुस उमन से कहलक, “तो फिन तोहरे केकर बपतिस्मा जल संस्कार लेला?” उमन कहलैं, “यूहन्ना केर बपतिस्मा जल संस्कार।”

⁴ पौलुस कहलक, “यूहन्ना उ आदमीमन के बपतिस्मा जल संस्कार देलक, जेमन पाप करेक छोइड़ देलैं आउर परमेश्‍वर बटे आय गेलैं। मगर यूहन्ना आदमीमन से कहलक कि यीशु केर उपरे बिसवास करा, उ मोर पाछे आवेक वाला अहे, आउर उ मसीह हेके।”

⁵ इ सुइन के उमन प्रभु यीशु केर नाँव में बपतिस्मा जल संस्कार लेलैं।

⁶ जब पौलुस उ मनक उपरे हाँथ रखलक तो पवितर आत्मा उमन केर उपरे उतरलक आउर उमन अलग-अलग भाषा बोलेक आउर भविष्यवाणी करेक लगलैं।

⁷ इमन सोउब लगभग बारह झन मरदानामन रहैं।

⁸ पौलुस तीन महिना तक यहूदी मनक प्रार्थना घर में जाते रहलक। उ निडर होई के परमेश्‍वर केर राइज केर बारे में बहस करत रहे आउर यहूदी आदमीमन के समझात रहे।

⁹ मगर उमन में से थोरेक आदमीमन ढींठ होई के उकर गोइठ उपरे बिसवास नी करलैं आउर आदमीमन केर सामने इ डहर के बुरा कहेक लगलैं। से लगिन पौलुस उमन से नाता तोइर देलक आउर अपन चेलामन के हूवाँ से हटाय लेलक। उ रोज दिन तुरन्नुस स्कूल में परमेश्‍वर केर राइज केर बारे में शिक्षा देवत रहे।

¹⁰ दूई बरिस तक एहे होते रहलक। इ लेखे आसिया परदेस में रहेक वाला यहूदी आदमीमन चाहे यूनानी आदमीमन सोउबमन प्रभु केर बचन के सुनलैं।

¹¹ आउर परमेश्‍वर पौलुस केर हाँथ से अपन शक्ति केर चमत्कार काम देखात रहे।

¹² हिंयाँ तक कि उकर गतर से छूवाल रूमाल आउर गमछा के बेमरियामन केर उपरे राइख देवत रहैं, तो उ मनक बेमारीमन दूर होई जात रहे, आउर भूतमन उमन में से निकइल जात रहैं।

¹³ थोरेक यहूदी आदमीमन हों जे घुइम-घुइम के झाड़-फूक करत रहैं, भूत धारल आदमीमन से प्रभु यीशु केर नाँव में इ कइह के भूतमन के निकलात रहैं, “मोंय यीशु केर नाँव में जेकर परचार पौलुस करेला, तोके बाहरे आवेक केर हुकूम देवोना।”

¹⁴ यहूदी मुध पुरोहित स्किवा केर सात गो बेटा रहैं, इमन हों एइसनेहें झाड़-फूक करत रहैं।

¹⁵ मगर एक दिन भूत उमन के जबाब देलक, “यीशु के मोंय जानोना आउर पौलुस के हों चिन्होना, मगर तोहरे के हेका?”

¹⁶ आउर उ आदमी जेकर में भूत रहे, उ मनक उपरे झपइट के उमन के अपन कब्जा में काइर लेलक आउर एइसन पिटाई करलक कि उमन नंगा आउर चोट खाय के उ घर से निकइल के भागलैं।

¹⁷ इ घटना केर बारे में इफिसुस शहर केर रहेक वाला सोउब यहूदी आउर यूनानी आदमीमन हों जाइन गेलैं, आउर उमन डराय गेलैं आउर प्रभु यीशु केर नाँव केर बड़ाई करलैं।

¹⁸ आउर जेमन बिसवास काइर रहैं, उमन में से ढेइर आदमीमन सोउब केर सामने अपन-अपन बुरा काममन के माइन लेलैं।

¹⁹ आउर जादू करेक वाला ढेइर आदमीमन हों अपन-अपन किताबमन के जमा काइर के सोउब केर सामने पोड़ाय देलैं। जब उ मनक दाम जोड़ल गेलक, तो पता चललक कि उ मनक दाम पचास हजार चाँदी केर सिक्का केर बराबइर रहे।

²⁰ इ लेखे प्रभु केर बचन शक्ति से फैलते गेलक आउर मजबूत होते गेलक।

इफिसुस शहर में दंगा

²¹ इ घटना होवेक केर पाछे पौलुस मकिदुनिया परदेस आउर अखया परदेस से होई के यरुशलेम शहर जाएक केर फैसला करलक। उ कहलक, “हूवाँ पोंहचेक केर पाछे मोके रोम देस के हों देखेक जरुरी अहे।”

²² से लगिन अपन सेवा करेक वालामन में से तीमुथियुस आउर इरास्तुस के अपन से आगे मकिदुनिया परदेस भेइज देलक आउर खुद थोरेक दिन आसिया परदेस में रहलक।

इफिसुस में हुड़दंग

²³ एहे दिनमन में हूवाँ यीशु मसीह केर डहर के लेई के भारी खलबली मइच गेलक।

²⁴ काले कि देमेत्रियुस नाँव केर एगो आदमी जे चाँदी केर कारीगर रहे, उ कारीगरमन से देवी अरतिमिस केर मंदिर में मूर्ति बनुवात रहे, जेकर से कारीगरमन केर ढेइर कमाई होवत रहे।

²⁵ देमेत्रियुस इ कारीगरमन के आउर एहे लेखे केर काम करेक वाला दोसर कारीगरमन के हों जमा काइर के उमन से कहलक, “हे भाईमन, तोहरे जानाला कि इ काम से हमरे केर केतना कमाई होवेला।

²⁶ मगर तोहरे देखाथा आउर सुनाथा कि उ पौलुस सिरिफ इफिसुस शहर में हें निहीं, मगर आसिया परदेस केर सोउब गाँवमन में ढेइर आदमीमन के समझाय-बुझाय के बहकाय देलक कि हाँथ केर बनाल मूर्ति ईश्‍वर ना लगे।

²⁷ इकर से इ शंका होई गेलक कि ना सिरिफ हमर इ धंधा केर इज्जत चाइल जाई, मगर इ महान देवी अरतिमिस केर मंदिर केर महत्व हों चाइल जाई। जेकर पूजा गोटा आसिया परदेस में आउर दुनिया भइर में करल जायला।”

²⁸ इ सुइन के सोउब कारीगरमन खिसाय गेलैं आउर चिल्लाय-चिल्लाय के कहेक लगलैं, “इफिसुस शहर केर रहेक वाला आदमीमन केर देवी अरतिमिस महान अहे।”

²⁹ आउर शहर केर ढेइर आदमीमन चिल्लाएक केर आवाज सुइन के भीड़ में मेसा होई गेलैं आउर गोटा शहर में खलबली मइच गेलक। उमन एक जुट होई के गयुस आउर अरिस्तर्खुस के जे मकिदुनिया परदेस केर रहेक वाला आउर पौलुस केर संगी रहैं, घिसराय के लेई गेलैं आउर सोउब मिल के नाटक घर बटे कूइद गेलैं।

³⁰ पौलुस हों नाटक घर केर भीतरे जाय के आदमीमन से गोठियाएक चाहत रहे, मगर चेलामन उके जाएक नी देलैं।

³¹ आसिया परदेस केर थोरेक अधिकारीमन हों जे उकर संग रहैं, उकर ठिना खबर भेइज के बिनती करलैं कि नाटक घर केर भीतरे जाय के अपन जान केर खतरा मोल ना लेबे।

³² नाटक घर केर भीतरे सोउब आदमीमन चिल्लात रहैं, केऊ कुछ चिल्लात रहे तो केऊ आउर कुछ। सोउब कुछ गड़बड़ रहे आउर ढेइर आदमीमन तो एहो नी जानत रहैं कि उमन का लगिन जमा होई हैं।

³³ भीड़ में से थोरेक आदमीमन बुझलैं कि इ सिकंदर नाँव केर आदमी केर चलते होवाथे, काले कि थोरेक यहूदी आदमीमन उके भीड़ केर सामने ढेकइल के आगे काइर देई रहैं। सिकंदर हाँथ से इशारा काइर के आदमीमन के चुप रहेक लगिन कहलक, ताकि उ आदमीमन के समझाएक पारोक कि हिंयाँ का होवाथे।

³⁴ मगर जब उमन जाइन गेलैं कि उ यहूदी हेके तो सोउब आदमीमन एक आवाज में लगभग दूई घंटा तक चिल्लाते रहलैं कि “इफिसुस शहर केर रहेक वाला आदमीमन केर देवी अरतिमिस महान अहे।”

³⁵ शहर केर मंत्री आदमीमन के शांत काइर के कहलक, “हे इफिसुस शहर केर रहेक वाला आदमीमन, कोन आदमी नी जानेला कि इफिसुस शहर केर आदमीमन महान देवी अरतिमिस केर मंदिर केर देख-भाल कराथैं आउर उ मनक पवितर मूर्ति आकाश से गिर रहे।

³⁶ अब जबकि इ गोइठमन बिलकुल सच हेके तो उचित अहे कि तोहरे चुप रहा आउर बेगर सोच बिचार काइर के कोनों ना करा।

³⁷ तोहरे जे आदमीमन के धाइर के हिंयाँ लाइन हा, उमन ना तो मंदिर के लुटेक वाला हेकैं, आउर ना हमर देवी केर निंदा करेक वाला हेकैं।

³⁸ से लगिन अगर देमेत्रियुस आउर उकर संगी कारीगरमन केर केकरो से कोनों शिकाइत अहे, तो उकर लगिन कछैरी अहे, आउर हाकिम हों अहैं। हूवाँ उमन एक दोसर केर उपरे दोष लगाएक पारबैं।

³⁹ आउर अगर तोहरे केर इकर अलावा कोनों आउर माँग अहे, तो शहर केर सभा में उकर बारे में फैसला करल जाई।

⁴⁰ मोके डार अहे कि जब राजपाल इ दंगा केर बारे में सुनी तो कही कि हमरे रोमी सरकार केर बिरोध में दंगा करेक केर कोशिश कराथी, काले कि इ दंगा करेक केर कोनों कारण नखे, आउर हमरे इ भीड़ केर जमा होवेक केर कोनों जबाब देवेक नी पारब।”

⁴¹ इ कइह के उ सभा के बिदा करलक।