खास चेलामन केर काम 18 - सादरी नवाँ नियम

कुरिन्थुस शहर में कलीसिया केर नेव

¹ इकर पाछे पौलुस एथेंस शहर के छोइड़ के कुरिन्थुस शहर में आलक।

² हूवाँ अक्विला नाँव केर एगो यहूदी आदमी से उकर भेंट होलक, जेकर जनम पुन्तुस परदेस में होई रहे। उ अपन जनाना प्रिस्किल्ला केर संगे थोरेक समय पहिले इटली शहर से आय रहे, काले कि महाराजा क्लौदियुस सोउब यहूदी आदमीमन के रोम देस से निकइल जाएक केर हुकूम देई रहे। पौलुस उमन से भेंट करेक गेलक।

³ पौलुस आउर अक्विला दुयो केर काम एक हें रहे, तंबू बनाएक केर काम। से लगिन पौलुस उमन केर संगे रइह के काम करेक लगलक।

⁴ पौलुस हर आराम केर दिन में यहूदी मनक प्रार्थना घर में बचन केर परचार करत रहे आउर बहस काइर के यहूदी आदमीमन आउर यूनानी आदमीमन के समझाय के उ मनक शंका के दूर करत रहे, ताकि उमन यीशु मसीह केर उपरे बिसवास करोक।

⁵ जब सीलास आउर तीमुथियुस मकिदुनिया परदेस से आलैं, तो पौलुस तंबू बनाएक केर काम छोइड़ के बचन सुनाएक में अपन पूरा समय देवेक लगलक आउर यहूदीमन के इ गवाही देते रहलक कि यीशु हें मसीह हेके।

⁶ मगर जब यहूदी आदमीमन पौलुस केर बिरोध आउर निंदा करेक लगलैं, तो उ इ देखाएक लगिन कि परमेश्‍वर उमन से खुश नखे, अपन लुगा केर धूर झाइर के उमन से इ कहलक, “परमेश्‍वर केर संदेश के नी मानेक केर चलते तोहरे खुद हें परमेश्‍वर बटे से मिलेक वाला सजा लगिन जिम्मेदार हेका! मोंय निरदोष हेकों। अब से मोंय परजाइत आदमीमन ठिना जामूँ आउर परमेश्‍वर केर बचन केर परचार करमूँ।”

⁷ पौलुस यहूदी मनक प्रार्थना घर से निकइल के तीतुस यूस्तुस नाँव केर एगो परजाइत आदमी जे परमेश्‍वर केर भय मानेक वाला आउर उकर आराधना करेक वाला रहे, उकर घर में आलक, जेकर घर प्रार्थना घर केर भीरे रहे।

⁸ यहूदी मनक प्रार्थना घर केर सरदार क्रिस्पुस अपन परिवार केर सोउब आदमीमन केर संगे प्रभु केर उपरे बिसवास करलक। आउर कुरिन्थुस शहर केर रहेक वाला ढेइर आदमीमन हों पौलुस केर गोइठ सुइन के उकर उपरे बिसवास करलैं आउर बपतिस्मा जल संस्कार लेलैं।

⁹ प्रभु एक राइत के दर्शन देई के पौलुस से कहलक, “ना डराव, मगर बचन केर परचार करते जा, आउर चुप ना रहबे,

¹⁰ मोंय तोर संगे अहों आउर केऊ हों तोर उपरे हमला काइर के तोके नोकसान पोंहचाएक नी पारी, काले कि इ शहर में ढेइर आदमीमन मोर उपरे बिसवास करबैं।”

¹¹ से लगिन पौलुस हूवाँ डेढ़ बरिस तक रहलक आउर आदमीमन के परमेश्‍वर केर बचन सिखाते रहलक।

¹² जब गल्लियो अखया परदेस केर राजपाल रहे, तो यहूदी आदमीमन एक होई के पौलुस केर बिरोध में आय गेलैं, आउर उके फैसला करेक केर कुरसी केर सामने लाइन के उकर उपरे इ दोष लगालैं,

¹³ “इ आदमी परमेश्‍वर केर भक्ति करेक इ लेखे सिखायला जे मूसा केर नियम केर उल्टा अहे।”

¹⁴ जब पौलुस खुद के बचाएक लगिन कहेक वाला रहे, तब राजपाल गल्लियो यहूदीमन से कहलक, “हे यहूदी आदमीमन! अगर तोहरे मोर सामने कोनों रकम केर अन्याय या अपराध केर मामला के लानता तो मोंय जरूर तोहर गोइठ के सुनतो।

¹⁵ मगर इ बहस शबदमन, नाँवमन आउर तोहर नियम केर बारे में हेके, से लगिन तोहरे हें इकर फैसला करा। मोंय एइसन गोइठमन केर फैसला करेक नी चाहोना।”

¹⁶ आउर राजपाल गल्लियो हुकूम देलक कि उमन उके फैसला करेक केर कुरसी ठिना से बाहरे निकलाय देवोक।

¹⁷ तब सोउब आदमीमन यहूदी मनक प्रार्थना घर केर सरदार सोस्थिनेस के धाइर के फैसला करेक केर कुरसी ठिना हें पिटलैं। मगर राजपाल गल्लियो इकर उपरे कोनों धेयान नी देलक।

अन्ताकिया शहर में पौलुस केर घुरेक

¹⁸ पौलुस ढेइर दिन तक कुरिन्थुस शहर में रहलक। इकर पाछे बिसवासी भाईमन से बिदा होई के पानी जहाज से सीरिया परदेस चाइल गेलक, उकर संगे प्रिस्किल्ला आउर अक्विला हों रहैं। सीरिया परदेस पोंहचेक से पहिले उ किंखिरया टापू में मूँड़ मुड़वालक, काले कि उ मन्नत माँइग रहे।

¹⁹ पौलुस इफिसुस शहर में पोंहइच के प्रिस्किल्ला आउर अक्विला के हूवाँ छोइड़ देलक आउर खुद यहूदी मनक प्रार्थना घर में जाय के यहूदीमन से बहस करेक लगलक।

²⁰ आदमीमन पौलुस से बिनती करलैं, “तोंय हमर संगे आउर थोरेक दिन रह।” मगर पौलुस नी मानलक।

²¹ आउर इ कइह के उमन से बिदा होलक, “अगर परमेश्‍वर चाही तो मोंय तोहर ठिना फिन आमूँ।” तब उ इफिसुस शहर छोइड़ के पानी जहाज से आगे चाइल गेलक।

²² आउर उ कैसरिया बंदररगाह में उतइर के यरुशलेम शहर गेलक आउर हूवाँ केर कलीसिया केर बिसवासीमन से भेंट काइर के अंताकिया शहर में आलक।

पौलुस केर तीसरा बेर परचार करेक जाएक

²³ पौलुस थोरेक दिन अन्ताकिया शहर में बिताय के हूवाँ से बिदा होलक आउर फ्रूगिया आउर गलातिया परदेस से होई के एक शहर से दोसर शहर घूमते सोउब चेलामन के स्थिर करते रहलक।

²⁴ उ समय अपुल्लोस नाँव केर एगो यहूदी आदमी जेकर जनम सिकंदरिया शहर में होई रहे, इफिसुस शहर में आलक। उ बिद्वान पुरूष रहे आउर पवितर किताब के बेस लेखे जानत रहे।

²⁵ उ प्रभु केर डहर केर शिक्षा पाय रहे। उ पूरा मन लगाय के यीशु केर बारे में आदमीमन के ठीक-ठीक सुनात रहे, आउर सिखात रहे, मगर उ सिरिफ यूहन्ना केर बपतिस्मा जल संस्कार केर गोइठ के जानत रहे।

²⁶ उ यहूदी मनक प्रार्थना घर में निडर होई के कहेक लगलक। जब प्रिस्किल्ला आउर अक्विला उकर उपदेस के सुनलैं, तो अपुल्लोस के अपन घर में लेई गेलैं आउर बेस लेखे परमेश्‍वर केर डहर केर शिक्षा के उके बतालैं।

²⁷ जब अपुल्लोस समुदर पार अखया परदेस जाएक केर ठाइन लेलक तो बिसवासी भाईमन उके ढाढ़स देलैं आउर अखया परदेस केर चेलामन के चिट्ठी लीख के बिनती करलैं कि उमन उकर स्वागत करोक। से लगिन जब अपुल्लोस अखया परदेस में पोहोंचलक तो उ नवाँ बिसवासीमन के जेमन प्रभु केर किरपा केर चलते बिसवासी बाइन रहैं, बिसवास में बढ़ेक लगिन ढेइर मदइत करलक।

²⁸ उ सोउब केर सामने यहूदी आदमीमन के चुप काइर देलक आउर पवितर किताब केर मोताबिक साबित करलक कि यीशु हें मसीह हेके।