खास चेलामन केर काम 17 - सादरी नवाँ नियम

थिस्सलुनीके शहर में यहूदीमन बटले दंगा

¹ पौलुस आउर सीलास फिन अम्फिपुलिस आउर अपुल्लोनिया नगर से होई के थिस्सलुनीके शहर में आलैं, जहाँ यहूदी मनक प्रार्थना घर रहे।

² पौलुस अपन रीति केर मोताबिक हूवाँ उमन ठिना गेलक, आउर तीन हफ्ता तक हरेक आराम केर दिन पवितर किताब से उमन केर संगे बहस करलक।

³ आउर सबूत केर साथ समझात रहे कि मसीह के दुःख उठाएक आउर मोरलमन में से फिन जी उठेक जरुरी रहे। पौलुस एहो कहलक, “एहे यीशु जेकर बारे में मोंय तोहरे के सुनावना, मसीह हेके।”

⁴ उमन में से थोरेक यहूदी आदमीमन पौलुस आउर सीलास केर इ गोइठ से राजी होलैं, इमन केर अलावा परमेश्‍वर केर डार-भय मानेक वाला ढेइर यूनानी आदमीमन आउर ढेइर इज्जतदार जनानामन हों बिसवास करलैं।

⁵ मगर यहूदी आदमीमन हिसिंगा करेक लगलैं आउर उमन थोरेक बजारु गुंडामन केर मदइत से भीड़ लगाय के नगर में दंगा करेक लगलैं। उमन पौलुस आउर सीलास के आदमीमन केर सामने लानेक केर बिचार से यासोन केर घर में हमला करलैं।

⁶ जब उमन पौलुस आउर सीलास के नी पालैं तो यासोन आउर थोरेक बिसवासी भाईमन के नगर केर अधिकारीमन ठिना खींच लानलैं आउर चिल्लाय-चिल्लाय के कहेक लगलैं, “इ आदमीमन दुनिया केर हर ठाँव में परेशान काइर देई हैं, अब हिंयाँ हों आय जाय हैं।

⁷ आउर यासोन इमन के अपन घर में रहेक लगिन ठाँव देई हे। इ सोउब आदमीमन महाराजा केर कानून केर बिरोध करैना आउर इ कहैना कि यीशु राजा हेके।”

⁸ इ सुइन के भीड़ केर आदमीमन आउर नगर केर अधिकारीमन घबराय गेलैं।

⁹ उमन यासोन आउर चेलामन के घूस लेई के छोइड़ देलैं।

बिरीया नगर में यहूदी मनक यीशु केर उपरे बिसवास करेक

¹⁰ बिसवासी भाईमन तुरते राइत के पौलुस आउर सीलास के बिरीया नगर में भेइज देलैं। हूवाँ पोंहइच के उमन यहूदी मनक प्रार्थना घर गेलैं।

¹¹ इ नगर केर यहूदी आदमीमन थिस्सलुनीके शहर केर यहूदी आदमीमन से भला रहैं। उमन बड़का लालसा से प्रभु केर बचन के सुनत रहैं आउर रोज दिन पवितर किताब के पइढ़ के खोजत रहैं कि इ बचन सच में पवितर किताब में अहे कि निहीं।

¹² इकर चलते इ होलक कि ढेइर आदमीमन बिसवासी बाइन गेलैं। इमन केर अलावा प्रसिद्ध यूनानी जनानामन आउर ढेइर मरदानामन हों बिसवास करलैं।

¹³ मगर जब थिस्सलुनीके शहर केर यहूदीमन जाइन गेलैं कि पौलुस बिरीया नगर में हों परमेश्‍वर केर बचन परचार कराथे, तो उमन हूवाँ हों आय के दंगा करेक आउर आदमीमन के भड़काएक शुरु करलैं।

¹⁴ तब बिसवासी भाईमन तुरते पौलुस के समुदर केर किनारे भेइज देलैं, मगर सीलास आउर तीमुथियुस हुवाँय रइह गेलैं।

¹⁵ पौलुस के पोंहचाएक वालामन उके एथेंस शहर पोंहचाय देलैं आउर पौलुस केर इ हुकूम पाय के बिरीया नगर घुरलैं कि सीलास आउर तीमुथियुस जेतना जल्दी होई सके मोर ठिना आय जाबैं।

एथेंस शहर में पौलुस केर धरम परचार

¹⁶ जब पौलुस एथेंस शहर में सीलास आउर तीमुथियुस केर आवेक केर आसरा देखत रहे, तो उ शहर में देवी-देवतामन केर मूर्तिमन के देइख के आत्मा में ढेइर दुःखी होलक।

¹⁷ से लगिन उ यहूदी मनक प्रार्थना घर में यहूदी आदमीमन से आउर परमेश्‍वर केर डार-भय मानेक वाला यूनानी आदमीमन से आउर रोज दिन चौराहा में आवेक-जाएक वाला आदमीमन से बहस करत रहे।

¹⁸ हूवाँ थोरेक इपिकूरी आउर स्तोईकी से जानल जाएक वाला सिखाएक वालामन से उकर भेंट होलक आउर उमन से बहस करेक लगलक। उमन में से थोरेक सिखाएक वालामन कहलैं, “इ बकवास करेक वाला आदमी हमरे से का कहेक चाहाथे?” मगर दोसर आदमीमन कहलैं, “इ बिदेसी देवतामन केर परचार मालूम होवेला।” काले कि पौलुस यीशु केर आउर उकर फिन से जी उठेक केर शुभ समाचार सुनात रहे।

¹⁹ तब उमन पौलुस के अपन संगे अरियुपगुस नाँव केर सभा में लेई गेलैं आउर उकर से पूछलैं, “का हमरे जानेक पारिला कि तोंय इ कोन नवाँ शिक्षा देवाथिस?

²⁰ काले कि तोंय ताजुब गोइठमन के हमरे के सुनाइसला, से लगिन हमरे जानेक चाहिला कि इकर मतलब का हेके।”

²¹ काले कि एथेंस शहर केर रहेक वाला आदमीमन आउर हूवाँ रहेक वाला परदेसी आदमीमन नवाँ-नवाँ गोइठमन के सुनाएक आउर सुनेक केर सिवाय आउर कोनों काम में समय नी बितात रहैं।

अरियुपगुस केर सभा में पौलुस केर भाषण

²² तब पौलुस अरियुपगुस सभा केर माझे में ठड़ाय के इ कहेक लगलक, “हे एथेंस शहर केर रहेक वाला भला आदमीमन! तोहर बारे में मोंय मानोना कि तोहरे हर गोइठ में देवतामन केर बड़का मानेक वाला हेका।

²³ काले कि जब मोंय घुमत रहों तो तोहर पूजा करेक केर चीजमन में से एगो एइसन बेदी हों देखलों, जेकर में लिखल रहे, ‘अनजान ईश्‍वर केर लगिन।’ तोहरे जेके बेगर जानले पूजा कराला, मोंय तोहरे के उकरे समाचार के सुनावना।

²⁴ जे परमेश्‍वर दुनिया आउर उकर में जे कुछ अहे, उ सोउब चीजमन के बनालक। उ आकाश आउर धरती केर मालिक हेके, उ हाँथ केर बनाल मंदिरमन में नी रहेला।

²⁵ उके कोनों चीज केर जरुरत नखे आउर ना केऊ आदमी केर सेवा केर जरुरत अहे, काले कि ओहे सोउब के जिंदगी, साँस आउर जरुरत केर सोउब चीजमन के देवेक वाला हेके।

²⁶ उ एके गो पुरूष से सोउब आदमी जाइत के दुनिया में रहेक लगिन बनाय हे, आउर उमन केर ठहराल समय आउर रहेक केर सीमानमन के बाइंध हे।

²⁷ परमेश्‍वर एइसन इ लगिन करलक ताकि आदमीमन परमेश्‍वर के खोजोक आउर खोजते-खोजते उके पाय जाओक, फिन भी उ हमर में से केकरो से दूर नखे।

²⁸ काले कि उकरे में हमरे जिंदा रहिला, आउर चलिला फिरिला आउर स्थिर रहिला। जइसन तोहरे केर थोरेक दोहा लिखेक वालामन हों कइह हैं, ‘हमरे हों उकरे बंश हेकी।’

²⁹ से लगिन परमेश्‍वर केर संतान होई के हमरे के इ समझेक नी चाही कि ईश्‍वर, सोना या रुपा या पखना केर नियर अहे, जे आदमी केर कारीगरी आउर सोच से बनाल जाय हे।

³⁰ अब तक तो परमेश्‍वर आदमीमन केर नी जानेक केर चलते इके अनदेखा करते आय हे, मगर अब उकर आगया इ हेके कि हर ठाँव केर सोउब आदमीमन पाप करेक छोइड़ देवोक।

³¹ काले कि परमेश्‍वर एक दिन ठहराय हे, जेकर में उ अपन ठहराल आदमी से दुनिया केर आदमी मनक न्याय करी। आउर परमेश्‍वर उ ठहराल आदमी के मोरलमन में से फिन जियाय के इ गोइठ केर सबूत देई दे हे।”

³² मोरलमन केर फिन से जी उठेक केर गोइठ सुइन के थोरेक आदमीमन तो मजाक करेक लगलैं, मगर थोरेक आदमीमन कहलैं, “इ गोइठ केर बारे में हमरे तोर से फिन कहियो सुनब।”

³³ उ बेरा पौलुस उमन केर माझे से निकइल के चाइल गेलक।

³⁴ फिन भी थोरेक आदमीमन उकर संगे मिल गेलैं, आउर प्रभु यीशु केर उपरे बिसवास करलैं। जेमन में दियुनुसियुस जे अरियुपगुस सभा केर सदस्य रहे, आउर दमरिस नाँव केर एगो जनाना रहे आउर उमन केर संगे आउर हें आदमीमन रहैं।