खास चेलामन केर काम 15 - सादरी नवाँ नियम

अन्ताकिया शहर में मनमुटाव

¹ थोरेक यहूदी बिसवासी आदमीमन यहूदिया परदेस से अन्ताकिया शहर में आलैं आउर बिसवासी भाईमन के सिखाएक लगलैं, “अगर मूसा केर देवल नियम केर मोताबिक तोहर खतना नी होवी तो तोहरे के छुटकारा नी मिली।”

² इकर बारे में पौलुस आउर बरनाबास केर उमन से ढेइर झगरा आउर बक झक होलक, तो इ फैसला होलक कि पौलुस आउर बरनाबास अन्ताकिया शहर केर थोरेक आदमीमन केर संगे यरुशलेम शहर जाबैं आउर इ सवाल उपरे खास चेलामन आउर कलीसिया केर अगुवामन से सलहा करबैं।

³ अन्ताकिया शहर केर कलीसिया उ मनक डहर खरचा लगिन थोरेक पइसा आउर खाएक केर इंतजाम काइर के उमन के बिदा करलैं, आउर उमन फीनीके आउर सामरिया परदेस से होई के हूवाँ केर बिसवासी भाई-बहिनमन के बतालैं कि परजाइत आदमीमन का लेखे शुभ समाचार सुइन के मसीह में बिसवासी बनाथैं, इ सुइन के सोउब चेलामन खुश होलैं।

⁴ जब उमन यरुशलेम शहर में पोहोंचलैं तो हूवाँ केर बिसवासीमन आउर खास चेलामन आउर कलीसिया केर अगुवामन उमन से खुशी से मिललैं। शाऊल आउर बरनाबास उमन के बतालैं कि परमेश्‍वर उमन केर संगे होई के कइसन-कइसन काम काइर हे।

⁵ मगर फरीसी दल केर आदमीमन में से जेमन बिसवास काइर रहैं, उमन में से थोरेक आदमीमन उइठ के कहलैं, “परजाइत बिसवासी आदमीमन के खतना आउर मूसा केर नियम के मानेक केर आगया देवेक चाही।”

⁶ तब यीशु केर खास चेलामन आउर कलीसिया केर अगुवामन इ गोइठ केर बारे में बिचार करेक लगिन जमा होलैं।

⁷ उमन में ढेइर बहस होवेक केर पाछे पतरस ठड़ाय के उमन से कहलक, “हे भाईमन, तोहरे जानाला कि परमेश्‍वर ढेइर दिन पहिलेहें तोहर में से मोके चुइन लेलक ताकि मोर मुँह से परजाइत आदमीमन शुभ समाचार केर बचन सुइन के बिसवास करोक।

⁸ मन के जाँचेक वाला परमेश्‍वर उमन के हों हमर नियर पवितर आत्मा देई के इ साबित करलक कि उमन हों परमेश्‍वर बटले चुनल आदमी हेकैं।

⁹ आउर उमन केर बिसवास करेक से उ मनक मन के शुद्ध काइर के हमर में आउर उमन में कोनों फरक नी करलक।

¹⁰ तो अब तोहरे परमेश्‍वर के काले परखाला आउर यहूदी नियम आउर रीति रिवाज के इ परजाइत बिसवासीमन के काले मनुवावाला, जेके हमर बाप-दादामन हों मानेक नी पाइर रहैं आउर ना हमरे मानेक पारब?

¹¹ हाँ, हमरे केर बिसवास तो इ अहे कि प्रभु यीशु केर किरपा से हमरे जे लेखे छुटकारा पाय ही, ओहे लेखे से उमन हों छुटकारा पाबैं।”

¹² तब जमा होवल सोउब आदमीमन बरनाबास आउर पौलुस केर गोइठ के चुपचाप सुनेक लगलैं कि परमेश्‍वर उमन से परजाइत आदमीमन में कइसन बड़का-बड़का चिन्हा आउर चमत्कार केर काम देखालक।

¹³ जब बरनाबास आउर पौलुस चुप होलैं तो याकूब कहेक लगलक, “हे भाईमन, मोर गोइठ के सुना।

¹⁴ सिमोन पतरस बतालक कि परमेश्‍वर पहिले परजाइत आदमीमन केर उपरे दया करलक आउर उमन में से थोरेक आदमीमन के अपन आदमी बनाएक लगिन चुनलक।

¹⁵ परजाइत आदमीमन केर इ बदलाव उ गोइठ केर बारे में बतायला जेकर बारे में परमेश्‍वर केर संदेश के बताएक वालामन ढेइर पहिले पवितर किताब में लीख रहैं।

¹⁶ जइसन कि लिखल अहे, ‘इकर पाछे मोंय फिन आय के राजा दाऊद केर राइज के जेके उकर दुश्मनमन नाश काइर देई रहैं, उके फिन से खड़ा करमूँ,

¹⁷ जेकर से बचल आदमीमन, मतलब सोउब जाइत केर आदमीमन के जेमन के मोंय अपन लगिन चुइन हो, उमन प्रभु केर खोजार में लगल रहोक।

¹⁸ इ गोइठमन के ओहे प्रभु कइह हे, जेकर बारे में दुनिया केर सिरजन से समाचार देते आय हे।’

¹⁹ से लगिन मोर बिचार इ हेके कि परजाइत आदमीमन में से जे आदमीमन परमेश्‍वर केर बटे आवैना, हमरे उमन के यहूदी नियम आउर रीति-रिवाज के मानेक लगिन जोर नी करब।

²⁰ मगर हमरे उमन के चिट्ठी लीख के भेजब कि उमन मूर्तिमन लगिन चढ़ाल अशुद्ध चीजमन के आउर ब्यभिचार आउर घेंचा चीप के मोराल जीवमन केर माँस आउर लोहू के ना खाओक।

²¹ काले कि बितल समय से नगर-नगर में मूसा केर नियम केर परचार करेक वालामन परचार करते आय हैं आउर इ नियम के हर आराम केर दिन यहूदी मनक प्रार्थना घर में पढ़ल जायला।”

परजाइत बिसवासीमन लगिन चिट्ठी

²² तब यरुशलेम शहर में सोउब बिसवासीमन आउर यीशु केर चुनल खास चेलामन आउर कलीसिया केर अगुवामन के इ गोइठ बेस लगलक आउर इ बिचार करलैं कि अपन में से थोरेक आदमीमन के चुइन के पौलुस आउर बरनाबास केर संगे अंताकिया शहर भेजब। उमन यहूदा के जे बरसब्बा कहायला, आउर सीलास के चुनलैं, उमन बिसवासी भाईमन में मुध आदमी रहैं।

²³ आउर चिट्ठी में इ लीख के उ मनक हाँथ में भेजलैं, “अंताकिया शहर, सीरिया आउर किलिकिया परदेस केर रहेक वाला परजाइत बिसवासी भाई-बहिनमन तोहरेमन के खास चेलामन आउर कलीसिया केर अगुवामन बटले जोहार!

²⁴ हमरे सुइन ही कि हमर हिंयाँ से थोरेक बिसवासी भाईमन हूवाँ जाय के तोहरे के अपन गोइठमन से घबराय देलैं, आउर तोहर मन के दुबिधा में काइर देई हैं, मगर हमरे उमन के इ आगया नी देई रही।

²⁵ से लगिन हमरे सोउब केर बिचार से थोरेक बिसवासी भाईमन के चुइन के तोहर हिंयाँ भेजेक केर फैसला करली आउर इ चुनल बिसवासी भाईमन के अपन दुलारा बरनाबास आउर पौलुस केर संगे तोहर ठिना भेजली।

²⁶ इमन एइसन बिसवासी भाईमन हेकैं, जेमन अपन जान के हमर प्रभु यीशु मसीह लगिन खतरा में डाइल देई हैं।

²⁷ आउर हमरे यहूदा आउर सीलास के तोहर हिंयाँ भेइज ही, जेमन अपन मुँह से हों इ गोइठमन के तोहरेमन के बताय देबैं।

²⁸ पवितर आत्मा के आउर हमरे के ठीक बुझालक कि इ जरुरी गोइठमन के छोइड़ के तोहरे के आउर बोझा नी देवब,

²⁹ तोहरेमन मूर्तिमन लगिन बलि चढ़ाल चीजमन के आउर लोहू के आउर घेंचा चीप के मोराल माँस के ना खाबा आउर ब्यभिचार से दूर रहबा, अगर तोहरे खुद के इ गोइठमन से बचाय के रखबा तो तोहर भला होवी। आगे शुभ।”

अन्ताकिया शहर में प्रतिनिधि मंडल

³⁰ फिन उमन बिदा होई के अंताकिया शहर में पोहोंचलैं, आउर सभा के जमा काइर के उ चिट्ठी के उमन के देई देलैं।

³¹ उमन उ चिट्ठी के पइढ़ के उ उपदेस केर गोइठ से मुरुक खुश होलैं।

³² आउर यहूदा आउर सीलास जे खुद हें परमेश्‍वर केर संदेश के बताएक वाला रहैं, ढेइर गोइठमन से भाईमन के उपदेस देई के उमन के बिसवास में स्थिर करलैं।

³³ यहूदा आउर सीलास थोरेक दिन हूवाँ रहलैं आउर इकर पाछे उमन अपन भेजेक वालामन ठिना जाएक लगिन हूवाँ केर भाईमन से शांति से बिदा होलैं।

³⁴ मगर सीलास हूवाँ रहेक केर फैसला करलक आउर यहूदा एकले यरुशलेम शहर घूइर गेलक।

³⁵ पौलुस आउर बरनाबास अंताकिया शहर में रइह गेलैं: आउर ढेइर आउरो आदमीमन केर संगे प्रभु यीशु केर बचन केर उपदेस करते आउर शुभ समाचार सुनाते रहलैं।

पौलुस केर दूसरी बेर परचार करेक लगिन जाएक आउर बरनाबास से जुदा होवेक

³⁶ थोरेक दिन केर पाछे पौलुस बरनाबास से कहलक, “जे-जे नगरमन में हमरे प्रभु केर बचन सुनाय रही। आव, हूवाँ जाय के देखब कि अपन बिसवासी भाईमन कइसन अहैं।”

³⁷ बरनाबास यूहन्ना के हों जे मरकुस कहायला अपन संगे लेगेक चाहत रहे।

³⁸ मगर पौलुस के उके अपन संगे लेई जाएक सही नी लगलक, काले कि उ आदमी पंफूलिया परदेस में उमन के छोइड़ देई रहे आउर उ मनक काम में साथ नी देई रहे।

³⁹ इकर बारे में दुयो झन में एतना बहस होलक कि उमन एक-दूसरा से अलग होई गेलैं। आउर बरनाबास, मरकुस के लेई के पानी जहाज में साइप्रस टापू चाइल गेलक।

⁴⁰ मगर पौलुस सीलास के चुनलक। आउर बिसवासी भाईमन उके परमेश्‍वर केर किरपा में जिम्मा देई देलैं आउर उ हूवाँ से चाइल गेलक।

⁴¹ फिन उ सीरिया आउर किलिकिया परदेस में गेलक आउर हूवाँ केर कलीसिया केर बिसवासी भाईमन के मजबूत करते हूवाँ से निकइल गेलक।