खास चेलामन केर काम 14 - सादरी नवाँ नियम

इकुनियुम शहर में शुभ समाचार केर परचार

¹ इकुनियुम शहर में पौलुस आउर बरनाबास यहूदी मनक प्रार्थना घर में गेलैं, आउर हूवाँ उ मनक बचन सुनाएक एतना असरदार रहे कि हूवाँ केर यहूदी आदमीमन आउर यूनानी भाषा गोठियाएक वाला आदमीमन दुयो में से ढेइर आदमीमन बिसवास करलैं।

² मगर जे यहूदी आदमीमन बिसवास नी काइर रहैं, उमन परजाइत आदमीमन के उसकालैं आउर उ मनक मन में बिसवासी भाई-बहिनमन केर बिरोध में जहर भाइर देलैं।

³ पौलुस आउर बरनाबास ढेइर दिन तक हूवाँ रहलैं आउर प्रभु केर उपरे भरसा काइर के बेगर डराले साहस से बचन केर परचार करते रहलैं। आउर प्रभु हों उमन बटले करल चिन्हा आउर चमत्कार केर काम से साबित करलक कि अपन किरपा केर संदेश सच हेके।

⁴ मगर शहर केर आदमीमन अनबन होई के दूई भाग में बाँइट गेलैं। जेकर से उमन में से थोरेक आदमीमन यहूदी आदमीमन बटे आउर थोरेक आदमीमन खास चेलामन बटे होई गेलैं।

⁵ परजाइत आदमीमन आउर यहूदी आदमीमन अपन अगुवामन से मिल के खास चेलामन केर संगे बुरा ब्यवहार करेक आउर उमन के पखना से मारेक केर कोशिश करलैं।

⁶ उमन इ गोइठ के जाइन गेलैं, आउर लुकाउनिया परदेस केर लुस्त्रा आउर दिरबे नगरमन में आउर आस-पास केर छोटका नगरमन में भाइग गेलैं।

⁷ आउर हूवाँ हों प्रभु यीशु केर शुभ समाचार सुनाएक लगलैं।

लुस्त्रा नगर केर लंगड़ा के ठीक करेक

⁸ लुस्त्रा नगर में एगो आदमी बइठल रहे, जे जनम से हें लंगड़ा रहे आउर कहियो चलेक-फिरेक नी पाइर रहे।

⁹ उ पौलुस केर उपदेस सुनत रहे। पौलुस उके धेयान से देखत रहे कि उकर में ठीक होई जाएक केर लायक बिसवास अहे।

¹⁰ उके देइख के जोर से कहलक, “अपन गोड़ केर ताकत से सोझ ठड़ाव।” ओहे बेरा उ आदमी उछइल के ठड़ाय गेलक आउर चलेक-फिरेक लगलक।

¹¹ जब आदमीमन पौलुस केर करल इ काम के देखलैं तो लुकाउनिया भाषा में जोर से चिल्लाय के कहलैं, “देवता मनवा केर रूप बाइन के हमर ठिना आय हे।”

¹² आउर उमन बरनाबास केर नाँव यूनानी देवता ज्यूस आउर पौलुस केर हिरमेस देवता रखलैं, काले कि उ मुध संदेश देवेक वाला रहे।

¹³ नगर केर बाहरे देवता ज्यूस केर मंदिर रहे। हूवाँ केर पूजारी फूल केर माला आउर साँड़ के लेई के फाटक ठिना आय पोहोंचलक। उ आदमीमन केर संगे बलिदान चढ़ाएक चाहत रहे।

¹⁴ जब खास चेला बरनाबास आउर पौलुस इके सुनलैं तो उमन अपन लुगा फाइर के भीड़ बटे कूइद के गेलैं आउर जोर से चिल्लाय के कहेक लगलैं,

¹⁵ “हे आदमीमन, तोहरे इ का कराथा? हमरे हों तो तोहरेमन नियर सुख-दुःख उठाएक वाला आदमी हेकी, हमरे तोहरेमन लगिन इ शुभ समाचार लाइन ही कि तोहरे इ बेकार रीति-रिवाज के छोइड़ के जिंदा परमेश्‍वर बटे अपन मन के लगावा, जे आकाश आउर धरती आउर समुदर आउर जे कुछ उमन में अहे, सोउब के बनाय हे।

¹⁶ उ पहिले केर समय में सोउब जाइत केर आदमीमन के अपन-अपन डहर में चलेक देलक।

¹⁷ हलांकि तोहरे उ परमेश्‍वर के तो नी जानाला फिन भी उ भलाई करते रहलक आउर उ आदमीमन के इ देखाते रहलक कि उ ओहे हेके जे तोहर लगिन आकाश से पानी बरसायला आउर ठहराल मौसम में अन्न उपजायला, उ अन्न देई के तोहर आदमीमन के खुशी से भाइर देवेला।”

¹⁸ इ कइह के बरनाबास आउर पौलुस आदमीमन के अपन लगिन बलिदान चढ़ाएक से ढेइर मुश्किल से रोकलैं।

¹⁹ मगर अंताकिया आउर इकुनियुम शहर से थोरेक यहूदी आदमीमन आय के हूवाँ केर आदमीमन के अपन बटे काइर लेलैं। उमन पौलुस के पखना से मारलैं आउर मोरल समइझ के उके नगर केर बाहरे घिसराय के लेई गेलैं।

²⁰ मगर जब चेलामन उकर चाइरो बटे आय के ठड़ालैं, तो उ उठलक आउर नगर में गेलक। दूसरा दिन उ बरनाबास केर संगे दिरबे नगर चाइल गेलक।

सीरिया परदेस केर अंताकिया शहर में घुरेक

²¹ पौलुस आउर बरनाबास उ नगर केर आदमीमन के शुभ समाचार सुनाय के ढेइर चेला बनालैं। इकर पाछे उमन लुस्त्रा नगर आउर इकुनियुम शहर होई के अंताकिया शहर में घूइर आलैं।

²² उमन हरेक नगर में चेलामन के मजबूत आउर बिसवास में स्थिर रहेक लगिन इ उपदेस देवत रहैं कि हमरे के ढेइर दुःख साइह के स्वरग राइज में जाएक होवी।

²³ पौलुस आउर बरनाबास हरेक कलीसिया में कलीसिया केर अगुवा चुनलैं आउर उपास प्रार्थना काइर के उमन के प्रभु यीशु केर हाँथ में जिम्मा देलैं, जेकर उपरे उमन बिसवास काइर रहैं।

²⁴ आउर उमन पिसिदिया परदेस से होई के पंफूलिया परदेस पोहोंचलैं,

²⁵ आउर पंफूलिया परदेस केर पिरगा नगर में प्रभु केर शुभ समाचार सुनाएक केर पाछे अत्तलिया शहर में आलैं।

²⁶ आउर हूवाँ से पानी जहाज में चाइढ़ के अंताकिया शहर घूइर आलैं, अंताकिया शहर केर हें बिसवासीमन उमन के चुइन के परचार करेक लगिन दोसर ठाँव में भेइज रहैं। उमन पौलुस आउर बरनाबास के परमेश्‍वर केर किरपा में सोंइप देई रहैं, अब उमन उ काम के पूरा काइर लेई रहैं।

²⁷ हूवाँ पोंहइच के उमन कलीसिया केर आदमीमन के जमा करलैं आउर बतालैं कि परमेश्‍वर हमर संगे होई के कइसन बड़का-बड़का काम काइर हे! आउर उ कइसन परजाइत आदमीमन लगिन यीशु मसीह केर उपरे बिसवास करेक लगिन दुरा खोइल देई हे।

²⁸ पौलुस आउर बरनाबास चेलामन केर संगे ढेइर दिन तक हूवाँ रहलैं।