खास चेलामन केर काम 12 - सादरी नवाँ नियम

पतरस केर बंदी बनाल जाएक आउर छुटेक

¹ उ समय राजा हेरोदेस कलीसिया केर थोरेक बिसवासी आदमीमन के सताएक लगिन उमन के बंदी बनाय लेलक।

² उ यीशु केर खास चेला यूहन्ना केर भाई याकूब के तलवाइर से मरुवाय देलक।

³ जब उ देखलक कि उकर एइसन करेक से यहूदीमन खुश होवैना, तो उ पतरस के हों धाइर लेलक। इ बिन खमीर रोटी केर परब केर मोका रहे।

⁴ आउर धारेक केर पाछे राजा हेरोदेस पतरस के जेहेल घर में भितरुवाय देलक। आउर पहरा करेक लगिन चाइर पारी में चाइर-चाइर झन सिपाहीमन के रखलक। इ बिचार से कि यहूदी मनक फसह परब केर पाछे पतरस के दोषी ठहराएक लगिन आदमीमन केर सामने लानोक।

⁵ जेहेल घर में पतरस के कायनों दिन तक रखल जाय रहे, मगर कलीसिया केर आदमीमन उकर लगिन एक मन होई के परमेश्‍वर से प्रार्थना करत रहैं।

⁶ जब राजा हेरोदेस उकर उपरे दोष लगाएक लगिन उके आदमीमन केर सामने लानेक वाला रहे, उकर से एक राइत आगे पतरस दूई गो सिकड़ से बाँधल, दूई झन सिपाहीमन केर माझे निंदात रहे आउर दुरा केर सामने हों पहरादारमन जेहेल घर केर पहरा करत रहैं।

⁷ अचका प्रभु केर एगो स्वरगदूत पतरस केर भीरे आय के ठड़ालक आउर पूरा कोठरी में इंजोत होई गेलक। आउर पतरस के थपथपाय के जगालक आउर कहलक, “जल्दी उठ!” आउर उकर हाँथ से सिकड़ तुरते खुइल के गिर गेलक।

⁸ तब स्वरगदूत उकर से कहलक, “अपन डाँड़ा के बाँध आउर जूता पिंध ले।” पतरस एइसनेहें करलक। स्वरगदूत फिन उकर से कहलक, “लुगा पिंध के मोर पिछे चाइल आव।”

⁹ पतरस उकर पिछे-पिछे जेहेल घर से बाहरे निकइल गेलक, मगर उ इ नी जानत रहे कि जे कुछ स्वरगदूत कराथे, उ सच हेके। उ सोचलक कि मोंय दर्शन देखाथों।

¹⁰ उमन पहिला आउर दूसरा पहरा के पार काइर के उ लोहा केर फाटक तक पोहोंचलैं, जहाँ से डहर शहर बटे जायला। उमन लगिन फाटक अपन से खुइल गेलक आउर उमन बाहरे निकइल गेलैं। जब उमन गली पार करलैं तब स्वरगदूत अचका पतरस के छोइड़ के चाइल गेलक।

¹¹ तब पतरस होस में आय के कहलक, “अब मोंय सच जाइन गेलों कि प्रभु अपन स्वरगदूत भेइज के मोके राजा हेरोदेस केर हाँथ से छोड़ाय लेलक आउर यहूदी अगुवामन केर सोउब आसरा के तोइर देलक।”

¹² आउर इ जाइन के कि परमेश्‍वर उके बचाय लेई हे। पतरस, उ यूहन्ना जे मरकुस कहायला उकर आयो मरियम केर घर आलक। हूवाँ ढेइर बिसवासी आदमीमन जमा होई के उकर लगिन प्रार्थना करत रहैं।

¹³ जब उ दुरा केर खिड़की ठोकठोकालक, तो रुदे नाँव केर एगो धांगरिन देखेक लगिन आलक कि उ के हेके।

¹⁴ उ पतरस केर आवाज के चीन्ह लेलक आउर खुशी केर मारे दुरा के बेगर खोलले भीतरे जाय के बतालक कि पतरस दुरा ठिना ठड़ाय हे।

¹⁵ उमन उकर से कहलैं, “तोंय पगली हेकिस।” मगर उ जोर देई के कहलक कि इ पतरस हें हेके, तब उमन कहलैं, “उ पतरस केर स्वरगदूत होवी।”

¹⁶ मगर पतरस दुरा के ठोकठोकाते रहलक। जब उमन दुरा के खोललैं तो पतरस के देइख के ताजुब होई गेलैं।

¹⁷ पतरस हाँथ से उमन के चुप रहेक केर इशारा करलक आउर उमन के बतालक कि प्रभु परमेश्‍वर का लेखे उके जेहेल घर से बाहरे निकलाय के लाइन हे। फिन पतरस कहलक, “याकूब आउर बिसवासी भाई-बहिनमन के खबर देई देवा कि मोंय जेहेल घर से बाहरे आय जाय हों।” तब पतरस हूवाँ से निकइल के दोसर ठाँव चाइल गेलक।

¹⁸ अगला दिन बिहान के जेहेल घर केर सिपाहीमन में खलबली मइच गेलक कि पतरस का होलक।

¹⁹ जब राजा हेरोदेस पतरस के खोजेक केर आगया देलक आउर जब उकर कहीं पता नी चललक, तो पहरादारमन से सवाल पूछलक, जब उमन उके जबाब देवेक नी पारलैं तो उमन के मौत केर सजा देवेक केर आगया देलक। आउर खुद थोरेक समय लगिन यहूदिया परदेस के छोइड़ के कैसरिया शहर में जाय के रहेक लगलक।

सताएक वाला केर मौत

²⁰ राजा हेरोदेस सूर आउर सैदा नगर केर आदमीमन से ढेइर खिसाय रहे। से लगिन उ दुयो शहर केर आदमीमन राजा हेरोदेस से मिलेक लगिन एगो दल बनाय के उकर ठिना आलैं। सोउब से आगे उमन बलास्तुस से मदइत माँगलैं, उ राजा केर निजी सहायक रहे। तब उमन मेल-मिलाप केर गोइठ लेई के राजा ठिना आलैं। काले कि उमन अपन खाएक लगिन अन्न राजा केर परदेस से पूरा करत रहैं।

²¹ जे दिन राजा हेरोदेस उ दुयो शहर केर आदमीमन से मिलेक वाला रहे, उ दिन राजसी लुगा पिंध के फैसला करेक केर कुरसी में बइठलक आउर उमन के भाषण देवेक लगलक।

²² आउर आदमीमन जोर से चिल्लालैं, “इ तो आदमी केर निहीं देवता केर शबद हेके।”

²³ ओहे बेरा प्रभु केर एगो स्वरगदूत तुरते उके मारलक, काले कि उ परमेश्‍वर केर महिमा नी काइर रहे। आउर राजा हेरोदेस केर काया में कीड़ा पाइड़ गेलैं आउर उ मोइर गेलक।

²⁴ मगर परमेश्‍वर केर बचन फैलते गेलक आउर बिसवासी आदमीमन केर गिनती हों बढ़ते गेलक।

²⁵ बरनाबास आउर शाऊल यहूदिया परदेस केर यरुशलेम शहर में यहूदी बिसवासीमन केर मदइत करेक केर पाछे हूवाँ से अन्ताकिया शहर घूइर आलैं। उमन अपन संगे यूहन्ना के जे मरकुस कहायला लेई आलैं।