2 तीमुथियुस 3 - सादरी नवाँ नियम

आखरी दिनमन में अधरम

¹ हे तीमुथियुस, मोंय चाहोना कि तोंय इके जाइन ले, यीशु मसीह केर घूइर आवेक से पहिले आखरी दिनमन में कठिन समय आवी।

² काले कि आदमीमन सिरिफ अपनेहें चिंता करबैं, धन केर लोभी होबैं, बड़े-बड़े गोइठ गोठियाबैं, घमंडी होबैं, दोसर मनक निंदा करबैं, आयो-आबा केर आगया नी मानबैं, उमन मदइत करेक वालामन के हों धन्यबाद नी देबैं, आउर अपवितर होबैं,

³ दोसरमन उपरे दया नी करबैं, दोसरमन के क्षमा नी करबैं, अपन इच्छामन के काबू करेक नी पारबैं, कठोर मन वाला होबैं, आउर बेस गोइठमन से घिरना करबैं।

⁴ जेमन, उमन उपरे भरसा करैना ओहोमन के इनकार काइर देबैं, लापरवाह होबैं, खुद के दोसरमन से बेस सोचबैं, आउर उमन परमेश्‍वर के निहीं, बल्कि भोग बिलास केर हें खोजार करबैं।

⁵ उमन खुद एइसन देखाबैं जइसन कि परमेश्‍वर केर सेवा करैना, मगर उकर शक्ति के नी मानबैं, जे उमन केर जिंदगी के बदलेक पारेला, तोंय एइसन आदमीमन से दूर रहबे।

⁶ एहेमन में से थोरेक आदमीमन दोसर मनक घर में जायना आउर मूरख जनानामन के अपन कब्जा में काइर लेवैना। जेमन पापमन से दबल आउर सोउब रकम केर बुरा इच्छामन केर कब्जा में अहैं।

⁷ इ जनानामन लगातार नवाँ चीजमन के सीखते तो रहैना, मगर मसीह केर बारे में सच्चा शिक्षामन के कहियो बुझेक नी पारैना।

⁸ झूठा सिखाएक वालामन मसीह केर सच्चा संदेश के परचार करेक से रोकेक केर कोशिश करैना, जइसन यन्नेस आउर यम्ब्रेस मूसा केर बिरोध काइर रहैं। उमन केर बुद्धि भ्रष्ट होई जाय हे, आउर उमन मसीह उपरे बिसवास नी करैना।

⁹ मगर उमन ढेइर लम्बा समय तक आदमीमन के धोखा देवेक नी पारबैं। काले कि जइसन आदमीमन यन्नेस आउर यम्ब्रेस के चीन्ह लेलैं कि उमन मूरख रहैं, तइसनेहें एहोमन के सोउबमन चीन्ह लेबैं कि इमन मूरख हेकैं।

बिसवास में मजबूत रहेक केर शिक्षा

¹⁰ मगर हे तीमुथियुस, तोंय मोर उपदेस, चाइल चलन, आउर मोर योजना, मोंय कइसन बिसवास करोना, मोंय मुसीबतमन के कइसन सहलों, आदमीमन के कइसन प्रेम काइर हों, आउर दुःखमन में कइसन धीरज धाइर हों, इ सोउब गोइठमन के तोंय जानिसला।

¹¹ तोंय उ भयानक दुःखमन केर बारे में हों जानिसला जे अंताकिया शहर, इकुनियुम आउर लुस्त्रा नगर केर आदमीमन बटले मोर उपरे पाइड़ रहे। आउर कइसन मोंय हूवाँ सताव के सहलों, मगर प्रभु मोके उ सोउब से छोड़ाय लेलक।

¹² मगर जेतना आदमीमन मसीह यीशु में भक्ति केर संगे जिंदगी बिताएक चाहैना उमन सोउब सताल जाबैं।

¹³ मगर दुष्ट आउर बहकाएक वालामन धोखा देते आउर धोखा खाते, बिगड़ते चाइल जाबैं।

¹⁴ हे तीमुथियुस, जे कोनों हमरे तोके सिखाय ही उकरे मोताबिक चलते रह, जेकर में तोंय पोक्ता बिसवास काइर हिस। आउर इके याइद रख कि इ गोइठमन के तोंय केकर से सीख हिस।

¹⁵ जब तोंय एगो छोटका छउवा रहिस, सेहे बेरा से पवितर किताब केर गोइठमन के तोंय सीख हिस। जे तोके इ बुझेक में मदइत करेला कि जब तोंय यीशु मसीह उपरे बिसवास करिसला तो परमेश्‍वर तोके बचायला।

¹⁶ पवितर किताब केर हरेक बचन, जेके परमेश्‍वर उमन केर दिमाग में साजलक जेमन उके लिखलैं, आउर इ आदमीमन के सिखाएक लगिन, आउर जेमन गलती करैना उमन के डाँटेक लगिन, आदमीमन केर दोष के सुधराएक लगिन आउर सही जिंदगी जियेक लगिन फायदा पोंहचाएक वाला हेके।

¹⁷ ताकि इके पालन काइर के परमेश्‍वर केर आदमी हर रकम से बेस काम करेक लगिन तेयार रहोक।