2 थिस्सलुनीकियनमन 3 - सादरी नवाँ नियमप्रार्थना करेक केर अरजी 1 हे भाईमन, आखरी गोइठ इ हेके कि हमर लगिन प्रार्थना करते रहा ताकि हमरे जल्दी हें सोउब ठाँव में प्रभु यीशु मसीह केर संदेश के फैलाएक पारब, आउर आदमीमन इकर उपरे ओइसनेहें बिसवास करोक जइसन तोहरे काइर रहा। 2 एहो प्रार्थना करा कि परमेश्वर हमरे के दुष्ट आउर बुरा आदमीमन केर नोकसान से बचाओक, काले कि ढेइर आदमीमन प्रभु यीशु केर बारे में संदेश के सुनैना मगर उकर में बिसवास नी करैना। 3 मगर प्रभु बिसवास करेक केर लायक अहे, उ तोहरेमन के बिसवास में पोक्ता करी आउर दुष्ट शैतान से बचाय के रखी। 4 आउर हमरे के प्रभु में तोहर उपरे भरसा अहे कि तोहरे के जे कोनों करेक लगिन हमरे आगया देवीला, उमन के तोहरेमन मानाला, आउर मानते हों रहबा। 5 हमरे प्रार्थना करिला, प्रभु यीशु तोहरे के समझेक लायक बनाओक कि परमेश्वर तोहरे के कतइ प्रेम करेला, आउर सताव केर बेरा ओइसनेहें सहबा जइसन यीशु मसीह सहलक। आलसी केर बिरोध में चेतावनी 6 हे भाईमन, हमरे अपन प्रभु यीशु मसीह केर उ अधिकार से जेके हमरे के देई हे तोहरेमन के आगया देवीला, एइसन केऊवे बिसवासी भाई-बहिन से जुदा रहा जेमन आलसी अहैं, आउर उ आगयामन के नी मानैना जेमन के हमरे तोहरेमन के सिखाय ही। 7 काले कि तोहरेमन खुद हें बढ़ियाँ से जानाला कि तोहरे के ओहे नियर जिंदगी जियेक चाही जे नियर हमरे जियिला, काले कि हमरे तोहरे केर संगे रइह के काम करेक में आलसी नी करली। 8 हमरे केकरो रोटी मुफत में नी खाली, मगर कष्ट आउर मेहनइत से राइत दिन काम धंधा करत रही, जेकर से हमरे के अपन जरुरतमन के पूरा करेक लगिन केकरो उपरे भरसा करेक नी पड़लक। 9 हमरे कड़ा मेहनइत इ लगिन नी करली कि हमरे के तोहर से अपन खाएक माँगेक केर अधिकार नखे, मगर इ लगिन करली कि हमरे खुद के तोहर माझे एगो नमूना देखाब, ताकि तोहरेमन हमरे जइसन चाइल चलबा। 10 जब हमरे तोहर संगे रही तब तोहरे के आगया देई रही, अगर केऊ कोनों काम करेक नी चाहेला, तो उके कोनों खाएक ले ना देवल जाओक। 11 हमरे सुनिला कि तोहर में से थोरेक आदमीमन आलसी अहैं, आउर कोनों काम नी करैना, मगर दोसरमन केर काम के बिगड़ायना। 12 एइसनमन के हमरे उ अधिकार से जेके प्रभु यीशु मसीह हमरे के देई हे आगया देवीला आउर समझाइला कि चुपचाप काम काइर के अपनेहें कमाई केर रोटी खावा। 13 आउर तोहरे हे भाईमन, भलाई करेक में हिम्मत ना हारा। 14 अगर केऊ हमर इ चिट्ठी केर संदेश के नी मानी, तो पता लगावा कि उ केहर हेके, आउर उकर से जुदाय रहा, ताकि उके लाज लगोक। 15 फिन भी उकर संगे दुश्मनमन नियर ब्यवहार ना करा, मगर अपन भाई-बहिन समइझ के चेतावनी देवा। आखरी जोहार 16 मोंय प्रार्थना करोना कि प्रभु, जे शांति केर सोता हेके सोउब नियर से तोहरे के लगातार शांति देते रहोक आउर तोहरे सोउबमन केर संग सोउब बेरा रहोक। 17 मोंय पौलुस अपन हाँथ से जोहार लिखोना, मोंय अपन सोउब चिट्ठीमन केर आखरी में एहे नियर लिखोना ताकि सोउबमन के पता चाइल जाओक कि इ चिट्ठी मोर बटले लिखल जाय हे। 18 मोंय प्रार्थना करोना हमर प्रभु यीशु मसीह केर किरपा तोहरे सोउबमन केर उपरे होते रहोक। |
Sadri Bible by The Love Fellowship is licensed under Creative Commons Attribution-ShareAlike 4.0 License.
Beyond Translation