2 थिस्सलुनीकियनमन 2 - सादरी नवाँ नियम

पाप केर मरद मतलब बिनाश केर बेटा

¹ हे भाईमन, हमरे के अपन प्रभु यीशु मसीह केर घूइर आवेक आउर उ बेरा केर बारे में तोहर से कोनों कहेक अहे, जब हमरे एक संग उकर से मिलब।

² तोहरेमन अचका कोनों भविष्यवाणी या उपदेस सुइन के या कोनों चिट्ठी पइढ़ के, जेमन के हमरे बटले लिखल जाय हे समझल जायला, अपन बिवेक के हेराय ना देबा, जेमन में बताल जाय हे कि प्रभु केर दिन आय चुइक हे, तोहरे अपन मन में ना घबरावा।

³ प्रभु केर आवेक केर बारे में इ सोउब गलत गोइठमन में बिसवास ना करा, जेकर बारे में आदमीमन तोहरेमन के बताथैं। काले कि प्रभु यीशु केर घूइर आवेक से पहिले एइसन समय आवी कि ढेइर आदमीमन परमेश्‍वर केर बिरोध में हुड़दंग मचाबैं, आउर अधरमी आदमी मतलब बिनाश केर बेटा हों दिस्तार होवी।

⁴ जे परमेश्‍वर केर बिरोध करी आउर आउरो सोउब चीजमन केर हों बिरोध करी, जेकर आदमीमन भक्ति करैना, आउर उ अपने आप के सोउब से ऊँचा उठाई, हिंयाँ तक कि उ परमेश्‍वर केर मंदिर में बाइठ के खुद के ईश्‍वर बताई।

⁵ इ गोइठमन के तोहरे के जरूर हें याइद होवी कि मोंय तोहर संगे रहों, तो तोहरे के अक्सर बतात रहों।

⁶ आउर तोहरे जानाला कि कोन चीज उके रोइक के राइख हे, काले कि उ ओहे बेरा दिस्तार होवी जखन उकर समय आवी।

⁷ अधरम केर भेद तो एखन हों काम करते जाथे, मगर एखन एगो रोकेक वाला अहे, आउर जब तक उ दूर नी होई जाई, उ रोकल रही।

⁸ इकर पाछे उ अधरमी मरद दिस्तार होवी, मगर पाछे से जब प्रभु यीशु आवी, तो अपन मुँह केर फूक से उके माइर मोराई, आउर अपन आवेक केर तेज चमक से भसम करी।

⁹ उ अधरमी मरद ठिना शैतान केर शक्ति होवी, उ सोउब रकम केर झूठा चमत्कार, चिन्हा आउर अदभुत काम करी जेकर से आदमीमन सोचेक लगबैं कि इ काम परमेश्‍वर कराथे।

¹⁰ उ सोउब रकम केर बुराई काम करी आउर उमन के धोखा देवी, जेमन परमेश्‍वर बटले नाश करल जबैं। उमन सच्चाई उपरे बिसवास करेक से इनकार करैना जे उमन के बचाएक पारेला।

¹¹ आउर इकरे चलते परमेश्‍वर उमन केर माझे एगो एइसन भटकाय देवेक वाला शक्ति के भेजी कि उमन झूठ उपरे हें बिसवास करबैं।

¹² आउर परमेश्‍वर उ सोउब आदमीमन के दोषी ठहराई, जेमन सच्चा संदेश उपरे बिसवास नी करैना, मगर अधरम से प्रेम करैना।

बिसवास में स्थिर रहा

¹³ हे प्रभु केर दुलारा भाईमन, इ उचित अहे कि हमरे लगातार तोहर लगिन परमेश्‍वर के धन्यबाद देवब। काले कि उ दुनिया केर सिरजन से पहिले तोहरे के चुइन लेई हे ताकि तोहरे के बचाएक पारोक। उ पवितर आत्मा केर काममन से जे तोहरे के शुद्ध करेला, आउर यीशु मसीह केर बारे में सच्चा संदेश उपरे तोहर बिसवास करेक केर चलते तोहरे के बचायला।

¹⁴ जेकर लगिन परमेश्‍वर हमर बताल शुभ समाचार केर द्वारा तोहरे के बचाएक लगिन बोलालक, ताकि तोहरेमन हमर प्रभु यीशु मसीह केर महिमा में भागीदार होवेक पारबा।

¹⁵ से लगिन हे भाईमन, स्थिर रहा, आउर जे-जे गोइठमन केर शिक्षा हमरे तोहरेमन के आमने-सामने, चाहे चिट्ठी से देई ही उकर में बिसवास करते रहा।

¹⁶ हमरे हमर प्रभु यीशु मसीह से आउर हमर आबा परमेश्‍वर से प्रार्थना करिला, जे हमरे से प्रेम करेला, आउर अपन किरपा से जुग-जुग केर शांति आउर सोउब से बेस आसरा देई हे।

¹⁷ उ तोहरे केर मन में साहस देवोक आउर जे बेस काम हेके उके लगातार करते रहेक लगिन तोहरेमन के बचन में मजबूत करोक।