2 पतरस 3 - सादरी नवाँ नियम

प्रभु केर फिन से घूइर आवेक केर दिन

¹ हे दुलार बिसवासी भाई-बहिनमन, अब मोंय तोहरेमन के दूसरा बेर चिट्ठी लिखाथों, इ दुयो चिट्ठी के इ लगिन लीख हों ताकि जे गोइठमन के तोहरे पहिले से जानाला, उके दोबारा याइद दिवाय के तोहरे केर मन में शुद्ध बिचारमन के जगाएक पारमूँ।

² मोंय एइसन इ लगिन कराथों, काले कि मोंय चाहोना कि तोहरे उ बचनमन के याइद रखा, जे परमेश्‍वर केर संदेश के बताएक वालामन ढेइर पहिले कइह रहैं, आउर हमर छुटकारा देवाइया आउर हमर प्रभु यीशु मसीह केर आगयामन के याइद रखा, जेके तोहरे के चुनल खास चेलामन सिखाय रहैं।

³ सोउब से जरुरी गोइठ तोहरे के समझेक चाही कि मसीह केर घूइर आवेक से पहिले एइसन आदमीमन होबैं, जे तोहर मजाक उड़ाबैं, काले कि तोहरे बिसवास कराला कि मसीह फिन से घूइर आवी। उमन आदत से मजबूर होई के बुरा काममन के करबैं।

⁴ आउर मजाक उड़ाते कहबैं, “का होलक प्रभु यीशु केर फिन से घूइर आवेक केर करार? उकर करार सच नखे, उ नी आवी। हमर पुरखामन तो मोइर गेलैं मगर सोउब कुछ तइसनेहें अहे जइसन दुनिया केर सिरजन केर शुरु में रहे।”

⁵ उमन जाइन बुइझ के इ गोइठ के नजइर अंदाज करैना कि परमेश्‍वर केर बचन केर जरिया आकाश युग-युग से बनल अहे आउर धरती पानी में से बनलक आउर चाइरो बटे पानी हें पानी अहे।

⁶ एहे पानी से परमेश्‍वर दुनिया के नाश काइर देलक जे उ बेरा मौजूद रहे। उ तेज बरसा भेजलक आउर इ धरती में बाइढ़ लाइन देलक आउर सोउब जिंदा जीव-जंतु के नाश काइर देलक।

⁷ जे लेखे परमेश्‍वर दुनिया केर सिरजन होवेक केर आगया देई रहे, ओहे नियर उ आगया देई हे कि एखन केर आकाश आउर धरती तब-तक बनल रहोक जब-तक उ उमन के आइग से ना पोड़ाय देओक। उ, उमन के उ दिन तक रखाथे, जब उ सोउब आदमीमन केर फैसला करी आउर अधरमी आदमीमन के नाश काइर देवी।

⁸ हे दुलार बिसवासी भाई-बहिनमन, इ गोइठ के जरूर याइद रखा कि प्रभु केर नजइर में एक दिन हजार साल केर नियर अहे आउर हजार साल एक दिन केर नियर अहे, उकर देखेक में दुइयो बराबइर अहे।

⁹ थोरेक आदमीमन सोचैना कि प्रभु अपन घूइर आवेक केर करार के पूरा करेक में देरी कराथे, मगर एइसन नखे, उ तोहरेमन केर चलते धीरज धराथे। उ चाहेला कि केऊ हों नाश ना होवोक, मगर हर केऊ अपन मन के फिराओक आउर पाप काम करेक छोइड़ देओक आउर प्रभु ठिना आय जाओक।

¹⁰ काले कि प्रभु पक्का घूइर आवी, उ अचका आय जाई जे नियर चोर अचका आवेला, उ बेरा आकाश में गरजेक केर आवाज सुनाई आउर आकाश लोप होई जाई। आकाश में सोउब कुछ, मतलब बेइर, चाँद आउर तइरगनमन पूरा रीति से जाइल जबैं। उ दिन परमेश्‍वर उ सोउब काममन के देखाई जेके आदमीमन काइर हैं, ताकि उमन केर फैसला करेक पारोक।

¹¹ इ पक्का अहे कि परमेश्‍वर इ लेखे सोउब चीजमन के नाश काइर देवी तो सोचा तोहरे के कइसन चाल चलेक चाही? तोहरे के पवितर चाइल-चलन आउर धरमी जिंदगी जियेक चाही जेकर से परमेश्‍वर खुश होवेला।

¹² जब तोहरे उ दिन केर इंतजार कराथा जे दिन परमेश्‍वर दुनिया केर सोउब आदमीमन केर फैसला करेक लगिन आवी, तो तोहरे अपन बटले एइसन काम करा कि उ दिन जल्दी आय जाओक। उ दिन केर आते हें आकाश आइग से पोइड़ के नाश होई जाई आउर उकर गरमी से आकाश केर सोउब चीज गइल जाई।

¹³ मगर हमरे बिसवासी आदमीमन परमेश्‍वर केर करार केर मोताबिक एगो नवाँ आकाश आउर नवाँ धरती केर आसरा देखाथी, जहाँ सिरिफ धरमी आदमीमन रहैना।

जागते आउर तेयार रहा

¹⁴ इ लगिन, हे दुलार बिसवासी भाई-बहिनमन, जबकि तोहरेमन इ गोइठमन केर होवेक केर आसरा देखाथा, तो एइसन जिंदगी जियेक लगिन सोउब लेखे से कोशिश करा, जे परमेश्‍वर के खुश करेला। आउर तोहरे शुद्ध, निरदोष आउर एक दोसर केर संगे शांति से रहा।

¹⁵ आउर अगर हमर प्रभु अपन धीरज केर खातिर देरी कराथे तो इके तोहरे अपन छुटकारा पावेक केर एगो मोका केर रूप में समझा, जइसन हमर दुलारा भाई पौलुस हों तोहरे के उ गेयान केर मोताबिक लिखलक, जे परमेश्‍वर उके देई हे, ओहो तोहरे के ओहे गोइठ बतालक जेके मोंय अपन चिट्ठी में बताय हों।

¹⁶ तइसनेहें उ अपन सोउब चिट्ठीमन में हों इ गोइठमन केर चरचा काइर हे, जेकर में केतना गोइठमन एइसन अहे, जेके समझेक कठिन अहे, आउर अनपढ़ आउर चंचल आदमीमन उकर अर्थमन के हों पवितर किताब केर आउर गोइठमन केर नियर खींच-ताइन के अपनेहें नाश केर कारण बनायना।

¹⁷ इ लगिन हे दुलार बिसवासी भाई-बहिनमन, तोहरे पहिलेहें से इ गोइठमन के जाइन हा, से लगिन सावधान रहा, ताकि अधरमी आदमीमन केर बहकाएक में फाँइस के मसीह में अपन बिसवास के हेराय ना देवा।

¹⁸ मगर हमर प्रभु आउर छुटकारा देवाइया यीशु मसीह केर किरपा आउर गेयान में बढ़ते जावा। उकरे महिमा एखन हों होवोक, आउर युग-युग होते रहोक। आमीन।