2 पतरस 2 - सादरी नवाँ नियम

झूठा गेयान पढ़ाएक वाला आदमीमन

¹ जे लेखे ढेइर समय पहिले इसराइलीमन केर माझे परमेश्‍वर केर संदेश के बताएक वाला झूठा आदमीमन रहैं, ओहे लेखे तोहर माझे हों झूठा उपदेस देवेक वालामन होबैं, उमन झूठा गेयानमन के चुप हें से फैलाय देबैं, जे आदमीमन के मसीह में बिसवास करेक से रोइक देवी। उ झूठा गेयान के पढ़ाएक वालामन मसीह के अपन मालिक मानेक से हों मना काइर देबैं। जे उमन केर मालिक हेके आउर उमन के पाप केर शक्ति से छुटकारा देई हे। इ लेखे उमन खुद के नाश काइर देबैं।

² परमेश्‍वर केर ढेइर आदमीमन इ झूठा शिक्षा के बताएक वालामन केर बुरा काममन केर नकल करबैं, आउर जे कोनोवें उमन करबैं उकर चलते, आदमीमन परमेश्‍वर बटे लेई जाएक वाला डहर केर बारे में निंदा करबैं।

³ इमन के पढ़ाएक वालामन लालची होबैं, आउर उमन बना-बनाल कहनीमन के सुनाय के तोहरे के धोखा देबैं ताकि तोहरे से पैसा कमाएक पारबैं। परमेश्‍वर ढेइर समय पहिलेहें फैसला काइर रहे कि उ उमन के दंड देवी आउर उ एइसन करेक लगिन तेयार अहे। उ पक्का उमन के नाश काइर देवी।

⁴ तोहरेमन जानाला कि ढेइर समय पहिले आबा परमेश्‍वर इ स्वरग दूतमन के हों दंड देवेक से नी छोड़लक जब उमन पाप करलैं। मगर उमन के हेंठे नरक में भेइज देलक, जहाँ उमन के अंधार में सिकड़मन में बाइंध के राइख देलक, जबकि उमन फैसला होवेक केर दिन केर इन्तजार कराथैं, जब उमन के दंड मिली, जेकर उमन लायक हेकैं।

⁵ तोहरे इके हों जानाला कि ढेइर समय पहिले नूह केर दिन में परमेश्‍वर दुनिया केर दुष्ट आदमीमन के नी छोड़लक, परमेश्‍वर ढेइर पानी बरसालक आउर उमन के डुबाय के नाश काइर देलक। मगर धरमी बनेक केर बारे परचार करेक वाला नूह सहित आठ आदमीमन के बचाय लेलक।

⁶ आउर तोहरे एहो जानाला कि ढेइर समय पहिले परमेश्‍वर सदोम आउर अमोरा नगर में रहेक वाला आदमीमन के दंड देलक, काले कि उमन बुरा काम काइर रहैं। से लगिन उ, उमन के पूरा रीति से आइग में भसम काइर देलक आउर उमन राख होई गेलैं। उ एइसन काइर के इ देखालक कि उमन केर का होवी, जेमन उकर डार नी मानैना।

⁷ मगर इकर से पहिले कि उ सदोम शहर के नाश करलक, परमेश्‍वर लूत के जे एगो धरमी आदमी रहे, उके शहर से निकलाय देलक आउर इ लेखे उके बचाय लेलक। लूत ढेइर दुःखी रहे, काले कि सदोम शहर केर आदमीमन कोनोवें नियम के नी मानत रहैं आउर लज्जा केर काम करत रहैं।

⁸ लूत उ बुरा आदमीमन केर माझे रहत रहे आउर उ रोज दिन उमन केर बुरा काममन के देखत रहे, जेके उमन करत रहैं आउर उ बुरा गोइठमन के सुनत रहे जेके उमन गोठियात रहैं, आउर इ सोउब उके ढेइर परेशान करत रहे, काले कि उ एगो धरमी आदमी रहे।

⁹ इ सोउब काम के जे आबा परमेश्‍वर बितल दिन में करलक, तो इकर से साफ पता चलेला कि परमेश्‍वर जानेला कि धरमी आदमी के का लेखे परीक्षा से निकलाई आउर दुष्ट आदमीमन के का लेखे फैसला होवेक केर दिन तक सजा देवेक लगिन रखी।

¹⁰ खास काइर के परमेश्‍वर उ झूठा पढ़ाएक वाला आदमीमन के दंड देवी, जे अपन बुरा काममन केर लालसा केर मोताबिक काम करैना आउर जे अपन उपरे परमेश्‍वर केर अधिकार के नी मानैना। उमन ढींठ आउर घमंडी अहैं, उमन महिमा से भरल स्वरगदूतमन केर बारे में बुरा कहेक से हों नी डरायना।

¹¹ स्वरगदूतमन उमन से ढेइर शक्तिशाली अहैं, मगर जब परमेश्‍वर ठिना उमन केर दोष लगायना तो उमन हों उमन केर अपमान नी करैना।

¹² मगर इमन निरबुद्धिया जानवरमन नियर काम करैना, ठीक उइसनेहें करैना जइसन उमन केर काया चाहेला आउर जे इ लगिन जनम होवैना कि आदमीमन उमन के फँसाय के मोराएक पारोक। उमन उ चीजमन केर अपमान करैना जेकर बारे में उमन हकीकत में कोनोवें नी जानैना। परमेश्‍वर इमन के तइसनेहें हें नाश करी जइसन आदमीमन जानवरमन के मोरायना।

¹³ उमन केर नाश होवेक उ नोकसान के फार हेके, जे उमन काइर हैं, उमन के दिन केर इंजोत में बुरा भोग-बिलास में पड़ल रहेक बेस लगेला। उमन तोहर माझे एगो दाग आउर धब्बा नियर अहैं, जे हर बेर तोहर लगिन बुरा रीति से मुँह के लुकाएक केर कारण बनैना, जब उमन तोहर संगे खाएक बइठैना।

¹⁴ उमन हर एक जनाना केर संगे गलत संबंध रखेक चाहैना, जेके उमन देखैना। उमन पाप करेक केर मोका सोउब बेरा खोजते रहैना, उमन उ आदमीमन के धोखा देवैना जेमन मसीह में मजबूती से भरसा नी करैना, आउर उमन के पाप बटे लेई जायना। उमन केर बगरा से बगरा चीजमन के पावेक केर लालसा केर खातिर परमेश्‍वर उमन के दंड देवी।

¹⁵ उमन भला काम करेक छोइड़ देई हैं आउर उमन ओहे लेखे केर बुरा काम करेक शुरु काइर देई हैं, जे कि बओर केर बेटा बिलाम ढेइर समय पहिले काइर रहे। उके गलत काम काइर के पइसा कमाएक बेस लगत रहे।

¹⁶ मगर परमेश्‍वर बिलाम के उकर बुरा काममन लगिन उकर गधी केर द्वारा डाँट सुनालक, जबकि गधीमन नी बोलैना मगर उ गधी बिलाम से एगो आदमी नियर गोठियालक जब उ बिलाम के राजा से मिलेक लगिन लाइद के लेगत रहे, आउर उ बेरा उ परमेश्‍वर केर संदेश के बताएक वाला बिलाम के ना समझ केर काम करेक से रोइक लेलक।

¹⁷ इ झूठा सिखाएक वालामन उ कुआँ केर सोता नियर बेकार अहैं, जे सूइख जाय हे आउर उ बदरी नियर बेकार अहैं, जे पानी बरसेक से पहिलेहें तेज हवा उके उड़ाय के लेई जायला। परमेश्‍वर उमन लगिन एगो एइसन ठाँव तेयार काइर हे जे पूरा अंधार अहे।

¹⁸ जब उमन आदमीमन के गेयान देवैना, तो उमन बेकार आउर घमंड से भरल शबदमन केर इस्तेमाल करैना। उमन आदमीमन के बतायना कि उमन उ लज्जा केर काममन के करेक लगिन आजाद अहैं जेके उमन केर काया करेक चाहेला आउर उमन के फिर से पाप करेक लगिन भरमाय देवैना, जे एखन-एखन दुष्ट जिंदगी से बाइच के निकइल हैं।

¹⁹ उमन आदमीमन से करार करैना कि जे कुछ भी उमन करेक चाहैना उके करेक लगिन आजाद अहैं, हालाँकि उमन खुद गुलाम नियर अहैं, काले कि जेके जे चीज केर आदत होई जायला, तो उ जेके करेला, उकर गुलाम बाइन जायला।

²⁰ जब आदमीमन प्रभु यीशु मसीह के अपन प्रभु आउर छुटकारा देवाइया माइन लेई रहैं, तब प्रभु उमन के इ दुनिया केर बुराई से बचाय लेई रहे। मगर अब एक बेर फिन उमन बुरा काममन में फाँइस जाय हैं आउर उ बुरा काम अब उमन के अपन वश में करेला, इ लगिन तब मसीह के नी मानेक से उमन केर दशा उ मनक बिसवासी बनेक से पहिले केर दशा से हों बुरा होई जाय हे।

²¹ मोर कहेक केर मतलब इ हेके कि जेमन मसीह के जाइन के छोइड़ देवैना उमन के जेमन मसीह के कहियो हें नी अपनाय हैं उमन से बगरा दंड मिली। उमन लगिन एहे बेस होतक कि उमन कहियो इ नी जानतैं कि अपन जिंदगी के धरमी तरीका से चलाएक केर का मतलब होवेला। अब उमन जानैना कि ठीक का हेके, मगर उमन परमेश्‍वर केर उ आगयामन के मानेक छोइड़ देलैं, जेके हमरे उमन के देई रही।

²² एइसन आदमीमन लगिन इ कहावत ठीक बइठेला कि कुकूर अपन उलटी के चाटेक लगिन फिन से घूइर के आवेला आउर धोवल सुवइर कादो में लोटेक लगिन फिन चाइल जायला।