2 कुरिनथियनमन 7 - सादरी नवाँ नियम

¹ से लगिन हे दुलार बिसवासी भाईमन, जबकि हमरे के इ करारमन मिल हे, तो आवा, हमरे सोउब रकम केर दुष्ट काममन के करेक छोइड़ देवब, आउर परमेश्‍वर केर आदर करते हुए पूरा-पुरी पवितर जिंदगी जियेक केर कोशिश करब।

पौलुस केर शांति

² तोहरे, हमरे के अपन हिरदय में बसाय लेवा, हमरे ना केकरो से अन्याय करली, ना केखो बिगड़ाली, आउर ना केखो ठकली।

³ मोंय तोहरेमन के दोषी ठहराएक लगिन इ नी कहोना, काले कि मोंय पहिलेहें कइह चुइक हों कि तोहरेमन के हमरे अपन हिरदय में एइसन बसाय लेई ही कि चाहे कोनोवें होई जाओक, हमरे तोहरेमन से प्रेम करते रहब।

⁴ मोंय तोहरेमन से ढेइर हिम्मत केर साथ कहाथों, मोके तोहरेमन उपरे घमंड अहे, आउर मोंय शांति से भाइर जाय हों। अपन सोउब कष्टमन में हों मोंय ढेइर खुश रहोना।

⁵ काले कि जब हमरे मकिदुनिया परदेस में आली, तब हों हमरे के आराम नी मिललक, मगर हमरे के चाइरो बटे से परेशानी होवत रहे, बाहरे चाइरो बटे लड़ाईमन रहे, आउर हमरे केर हिरदय में डार रहे।

⁶ फिन भी दुःखी आदमीमन के शांति देवेक वाला परमेश्‍वर, तीतुस केर आवेक से हमरे के शांति देलक।

⁷ आउर ना सिरिफ उकर आवेक से मगर उकर उ शांति से हों, जे तीतुस के तोहर बटले मिल रहे, उ हमरे के बतालक कि तोहरे मोके केतना देखेक चाहाला, आउर जे कोनों तोहरेमन करला उकर बारे में तोहरे के दुःख अहे, आउर तोहरे कइसन मोर बारे में चिंता कराला।

⁸ मोंय इ चिट्ठी तोहरे के लीख के नी पसतावना, जबकि तोहरे इ चिट्ठी से दुःखी होला, पहिले जब मोंय देखलों कि थोरेक समय ले तोहरे दुःखी होला, तो मोंय पसतात रहों, मगर एखन मोंय खुश अहों।

⁹ अब मोंय खुश अहों मगर इ लगिन निहीं कि तोहरेमन के दुःख पोहोंचलक, मगर इ लगिन कि तोहरेमन उ दुःख केर चलते पाप करेक छोइड़ देला, काले कि तोहर दुःख परमेश्‍वर केर इच्छा केर मोताबिक रहे कि हमर बटले तोहरेमन के कोनों गोइठ में नुकसान ना पोंहचोक।

¹⁰ काले कि परमेश्‍वर केर इच्छा केर मोताबिक दुःख, पाप करेक छोड़वाय देवेला, जेकर नतीजा से छुटकारा मिलेला, आउर फिन उके पसताएक नी पड़ेला। मगर दुनिया केर दुःख जुग-जुग लगिन माउत बटे लेगेला।

¹¹ से लगिन धेयान देवा, परमेश्‍वर बटले आवल दुःख तोहरेमन में का-का बदलाव के लानलक, जोश से भरल लालसा, अपन बचाव लगिन सफाई देवेक केर इच्छा, अन्याय केर परती खीस, संकट केर परती सावधानी, मोर से भेंट करेक केर खूब इच्छा, सेवा करेक लगिन जोश, आउर पापी के दंड देवेक लगिन एइसन धुन, जेकर चलते तोहरे इ साबित काइर देला कि सोउब कुछ के ठीक करेक में तोहरे कोनों कसर नी छोइड़ हा।

¹² फिन मोंय जे चिट्ठी में कठोर गोइठमन के तोहर लगिन लीख रहों, उके ना तो अन्याय करेक वालामन केर चलते, आउर ना तो जेमन केर अन्याय होवेला उकर चलते लीख रहों, मगर इ लगिन लीख रहों कि तोहरे केर जोश, जे हमरे लगिन अहे उ परमेश्‍वर केर सामने दिसोक।

¹³ इ सोउब केर चलते हमरे के जोश मिललक, आउर हमरे केर इ जोश केर साथ तीतुस केर खुशी केर चलते आउर हें खुश होली, काले कि उकर जीव तोहरे केर चलते हरियार होई जाय हे।

¹⁴ काले कि अगर मोंय उकर सामने तोहर बारे में कोनों घमंड काइर हों, तो नी लजालों, मगर जइसन हमरे तोहरेमन से सोउब गोइठमन के सच-सच कइह देई रही, तइसनेहें हमर घमंड करेक तीतुस केर सामने हों सच निकललक।

¹⁵ आउर जब उके याइद आवेला कि तोहरे सोउबमन आगयाकारी अहा, आउर कइसन तोहरे डराते आउर थरथराते उकर से भेंट करला, तो तोहर खातिर उकर प्रेम आउर हें बाइढ़ जायला।

¹⁶ मोंय खुश अहों काले कि तोहर हर गोइठ में मोके पूरा भरसा अहे।