2 कुरिनथियनमन 6 - सादरी नवाँ नियम

¹ आउर हमरे जे परमेश्‍वर संगे काम करेक वाला हेकी, तोहरे से अरजी करिला कि उकर किरपा जे तोहर उपरे होई हे, उके बेकार ना जाएक देवा।

² काले कि पवितर किताब में परमेश्‍वर कहेला, “मोंय अपन सही समय में तोहरे केर प्रार्थना के सुइन लेलों, आउर छुटकारा देवेक केर दिन मोंय तोहरे केर मदइत करलों।” सुना, एखन उ खुशी केर समय हेके, सुना, एखन उ छुटकारा पावेक केर दिन हेके।

³ परमेश्‍वर संगे काम करेक वाला केर रूप में, हमरे कोनों गोइठ में ठोकर खाएक केर कोनोवें मोका नी देवीला, ताकि हमरे केर सेवा उपरे केऊ कोनों रकम केर दोष ना लगाओक।

⁴ मगर हमरे सोउब रकम से, इ देखाइला कि हमरे परमेश्‍वर केर सच्चा सेवा करेक वाला हेकी, आउर धीरज से कष्टमन के, गरीबी के, संकट के सहिला

⁵ आउर कोड़रा खाएक से, जेहेल जाएक से, हुड़दंग से, मेहनइत करेक से, नींद अकाम करेक से, भूखे रहेक से,

⁶ पवितर जिंदगी बिताएक से, गेयान से, धीरज धारेक से, किरपा करेक से, पवितर आत्मा केर अगुवाई में चलेक से,

⁷ सच्चा प्रेम करेक से, सच गोइठ गोठियाएक से, परमेश्‍वर केर शक्ति से दुःख उठाइला, आउर धारमिकता से, जे हमरे ठिना हँथियार केर रूप में हमला करेक लगिन आउर खुद के बचाएक लगिन अहे,

⁸ आदमीमन केर बड़ाई करेक आउर तुच्छ जानेक से, हमरे के बुरा आदमी या बेस आदमी कहेक से, हमरे के भरमाएक वाला कहैना, फिन भी हमरे सच्चा हेकी।

⁹ थोरेक आदमीमन हमरे के अनजान आदमी समझैना, फिन भी थोरेक आदमीमन हमरे के नामी कहैना, मोरेक वालामन नियर अही, फिन भी जिंदा अही, माउर खाएक वालामन नियर अही, मगर जान से माइर मोराल नी जाइला।

¹⁰ हमरे ढेइर दुःख उठाइला, मगर सोउब बेरा खुशी मनाइला, हमरे खुद तो गरीब अही, मगर ढेइर आदमीमन के आत्मिक रीति से धनी बनाय देवीला, एइसन अही जइसन हमरे ठिना कोनों नखे, फिन भी हमरे ठिना सोउब कुछ अहे।

¹¹ हे कुरिन्थुस शहर केर बिसवासीमन, हमरे खुइल के तोहरे से गोठियाय ही, हमरे केर हिरदय में तोहरे बाइस जाय हा।

¹² तोहरेमन लगिन हमरे अपन प्रेम में कमी नी काइर ही, मगर तोहरेमन हमरेमन के प्रेम करेक में कमी काइर हा।

¹³ तोहरेमन के मोंय अपन छउवा जाइन के तोहर से कहोना कि तोहरेमन हों इकर बदला में अपन हिरदय में हमरे के बसाय लेवा।

अबिसवासीमन नियर ना बना

¹⁴ तोहरेमन अबिसवासीमन नियर नखा, से लगिन उमन लेखे ना होवा, काले कि हमरे जे भलाई काम करिला उके दुष्ट आदमीमन केर संगे मिल के नी करेक चाही, दीया आउर अंधार एक संगे नी मिलेक पारी,

¹⁵ आउर मसीह केर शैतान संगे कोनों लगाव नखे, या जे आदमीमन मसीह उपरे बिसवास करैना, उमन अबिसवासीमन से बिलकुल अलग अहैं।

¹⁶ आउर परमेश्‍वर केर मंदिर केर रिश्ता मूर्तिमन से नखे, काले कि हमरे तो जिंदा परमेश्‍वर केर मंदिर हेकी, जइसन पवितर किताब में परमेश्‍वर कइह हे, “मोंय इ आदमीमन केर संगे रहमूँ आउर उमन केर संगे चलमूँ-फिरमूँ, मोंय उमन केर परमेश्‍वर होमूँ, आउर उमन मोर आदमी होबैं।”

¹⁷ इ लगिन पवितर किताब में प्रभु हमरे से कहेला, “उ आदमीमन केर माझे से निकला, जेमन परमेश्‍वर केर पिछे नी चलैना, आउर अशुद्ध काममन से दूर रहा, तो मोंय तोहरेमन के ग्रहण करमूँ।

¹⁸ आउर मोंय तोहर आबा नियर होमूँ, आउर तोहरेमन मोर बेटा आउर बेटीमन नियर होबा, इ सर्वशक्तिमान प्रभु परमेश्‍वर केर बचन हेके।”