2 कुरिनथियनमन 3 - सादरी नवाँ नियम

नवाँ करार केर सेवक बनेक

¹ का हमरे फिन अपन बड़ाई करेक लगली? या हमरे के आउरमन केर नियर सिफारिस केर चिट्ठीमन तोहरे ठिना लानेक या तोहरे से लेवेक अहे?

² तोहरे खुद हें एगो चिट्ठी नियर हेका जे हमरे केर हिरदय में लिखल अहे, ओहे हमरे केर सिफारिस हेके, तोहर माझे हमर काम केर चलते तोहरे केर बदलाल जिंदगी एगो चिट्ठी नियर हेके, जेके सोउब आदमीमन पढ़ैना आउर जानैना।

³ इ गोइठ सफा अहे कि तोहरे केर बदलाल जिंदगी एगो चिट्ठी हेके, जेके मसीह हमरे केर सेवा केर बदली में लीख हे, जे सियाही से निहीं, मगर परमेश्‍वर केर आत्मा से लिखल जाय हे।

⁴ हमरे एइसन इ लगिन कहिला, काले कि मसीह केर चलते परमेश्‍वर उपरे हमरे केर पक्का भरसा अहे।

⁵ हमरे इ नी कहिला कि कोनों करेक लगिन हमरे खुद लायक अही, मगर परमेश्‍वर हमरे के लायक बनायला।

⁶ जे हमरे के नवाँ करार केर सेवक बनेक केर लायक बनालक, मूसा केर लिखल नियम केर निहीं बल्कि पवितर आत्मा केर, काले कि मूसा केर लिखल नियम के पूरा नी करले दंड मिलेला, मगर पवितर आत्मा जुग-जुग केर जिंदगी देवेला।

^7-8 जब मूसा केर नियम पखना केर पाटी में लिखल जाएक पूरा होलक, तो ओहे बेरा परमेश्‍वर केर तेज रोशनी चमकलक, आउर इसराइली आदमीमन ढेइर देरी तक मूसा केर चेहरा के देखेक नी पारलैं, काले कि उ चमकत रहे, जबकि इ चमकेक ढेइर देरी तक नी रहे। से, अगर मूसा के देवल नियम केर मोताबिक सेवा करेक से, जे माउत के लानेला, उकर एइसन तेज चमक रहे, तब तो पवितर आत्मा केर सेवा करेक से आउर हें बगरा चमक होवी।

⁹ काले कि जब दोषी ठहराएक वाला करार तेज चमक से भरल रहे, तो इ पक्का अहे कि नवाँ करार जे आदमीमन के धरमी ठहरायला, उ आउर हें बगरा तेज चमक से भरल होवी।

¹⁰ अब पुरना करार केर चमक नवाँ करार केर चलते चमकदार नी दिसेला।

¹¹ काले कि जब मूसा केर नियम के तेज चमक केर साथ देवल गेलक, जे थोरहें दिन लगिन रहे, तो नवाँ करार केर चमक आउर हें बगरा तेज होवी, काले कि इ सोउब दिन लगिन रही।

¹² से लगिन एइसन आसरा राइख के हमरे साहस केर साथ गोठियाइला।

¹³ हमरे मूसा नियर निहीं, जे अपन मुँह के परदा से ढाँइप रहे, ताकि इसराइलीमन उ निझेक वाला आउर मेटेक वाला तेज चमक के ना देखोक।

¹⁴ मगर उ मनक मन कठोर होई गेलक, काले कि आइज तक पुरना नियम के पढ़ेक बेरा उ मनक हिरदय में ओहे परदा ढाँपल रहेला, उ परदा सिरिफ मसीह में बिसवास करेक से उइठ जायला।

¹⁵ आइज तक जब कहियो मूसा केर नियम केर किताब के पढ़ल जायला, तो उ मनक हिरदय में परदा ढाँपल रहेला।

¹⁶ मगर जब कभी उमन अपन हिरदय से प्रभु यीशु में बिसवास करबैं, तब उ परदा उइठ जाई।

¹⁷ प्रभु तो आत्मा हेके आउर जहाँव कहों प्रभु केर आत्मा रहेला हूवाँ मूसा केर नियम से आजादी मिलेला।

¹⁸ जब हमरे सोउब केर चेहरा से परदा उइठ जायला, तो उ चेहरा से प्रभु केर चमक चमकेला, जइसन कि आयना में दिसेला, तब परमेश्‍वर हमरे के चमकदार से चमकदार महिमा में बदलते जायला, इ प्रभु केर काम हेके जे पवितर आत्मा हेके।