2 कुरिनथियनमन 2 - सादरी नवाँ नियम

¹ मोंय अपन मन में एहे ठाइन लेई रहों कि फिन दोबारा तोहरे ठिना आय के तोहरे के दुःख नी देमूँ।

² काले कि अगर मोंय तोहरेमन के दुःख देमूँ, तो तोहरे के छोइड़ आउर केऊ नी बाइच हैं जेमन मोके खुश करबैं।

³ मोंय इ चिट्ठी के तोहरेमन के इ लगिन लिखलो कि मोर आवेक से एइसन ना होवोक कि जेमन से मोके खुशी मिलेक चाही, उमन से मोंय उदास होमूँ, काले कि मोके तोहरे सोउबमन उपरे इ गोइठ केर भरसा अहे कि जे खुशी मोके अहे, ओहे खुशी तोहरे सोउबमन केर हों अहे।

⁴ इ चिट्ठी के मोंय भारी दुःख तकलीफ आउर अपन मन केर कष्ट से, काइंद-काइंद के तोहरेमन के लीख रहों, इ लगिन निहीं कि तोहरेमन दुःखी होबा, मगर इ लगिन कि तोहरेमन मोर उ बड़का प्रेम के जाइन लेवा, जे तोहरे से अहे।

पापी के क्षमा

⁵ आउर अगर केऊ आदमी मोके दुःख देई हे तो ना सिरिफ मोके देई हे, बल्कि उकर से बगरा तोहरे सोउब के देई हे, (उकर संगे ढेइर कड़ाई नी करमूँ),

⁶ एइसन आदमी लगिन इ दंड जेके बिसवासीमन में से ढेइरमन देई हैं, ढेइर अहे।

⁷ इ लगिन इकर से भला इ अहे कि उकर पाप के क्षमा करा आउर दिलासा देवा, ना होवोक कि एइसन आदमी ढेइर दुःख में डूइब जाई।

⁸ इ लगिन मोंय तोहरे से बिनती करोना, उके बतावा कि तोहरे सचमुच में उकर से प्रेम कराला।

⁹ काले कि मोंय इ लगिन हों लीख रहों कि तोहरेमन के परइख लेमूँ कि तोहरे मोर सोउब गोइठमन के मानेक लगिन तेयार अहा कि निहीं।

¹⁰ अगर तोहरेमन केखो जे तोहरे केर बिरोध में कोनों पाप काइर हे उके क्षमा कराला, तो मोंय हों क्षमा करोना, जब, जे कोनों क्षमा करेक केर जरुरत होवेला उके मोंय क्षमा करोना, तो मोंय तोहरे केर फायदा लगिन मसीह केर अधिकार केर साथ करोना।

¹¹ शैतान के हमरे से कोनों फायदा उठाएक ना देवा, काले कि हमरे जानिला कि उ हमेशा हमरे के पाप में गिराएक लगिन लगल रहेला।

त्रोआस नगर में पौलुस केर घबराएक

¹² आउर जब मोंय मसीह केर शुभ समाचार सुनाएक ले त्रोआस नगर में आलों, तब प्रभु मोके शुभ समाचार सुनाएक लगिन बढ़ियाँ मोका देलक।

¹³ तो मोंय अपन बिसवासी भाई तीतुस के नी पाय के मन में ढेइर बेचैन होई गेलों, से लगिन मोंय उमन से बिदा होई के मकिदुनिया परदेस चाइल गेलों।

मसीह में बिजय

¹⁴ परमेश्‍वर केर धन्यबाद होवोक, काले कि हमरे मसीह केर संगे एक होई जाय ही, सेकर चलते उ हमरे के हमेशा अपन संगे अगुवाई करेला, आउर जीत देवेला। आउर परमेश्‍वर हमरे केर जरिया से मसीह केर गेयान केर सुगंध के सोउब जगा फैलायला।

¹⁵ काले कि हमरे परमेश्‍वर लगिन मसीह केर द्वारा जलाल धूप नियर हेकी, आउर संदेश जे हमरे केर द्वारा परचार करल जायला, उ सुगंध नियर हेके, जे छुटकारा पावल आउर छुटकारा नी पावल सोउब आदमीमन में फाइल जायला।

¹⁶ थोरेक आदमीमन लगिन तो मोरेक केर खातिर माउत केर सुगंध, आउर थोरेक आदमीमन लगिन तो जिंदगी केर खातिर जिंदगी केर सुगंध केर रूप में फाइल जायला। इ काम के करेक केर लायक बिलकुल केऊ नखैं।

¹⁷ काले कि हमरे उ ढेइरमन केर जइसन नखी, जेमन परमेश्‍वर केर बचन के रुपया लगिन परचार करैना, मगर हमरे हमेशा परमेश्‍वर केर भीरे मसीह केर द्वारा ईमानदारी से गोठियाइला।