2 कुरिनथियनमन 13 - सादरी नवाँ नियम

आखरी चेतावनी

^1-2 पवितर किताब में इ लिखल अहे, “हर एक गोइठ दूई या तीन झन केर गवाही से सच्चा ठहराल जाओक।” जब मोंय दूसरी बेर तोहरे ठिना आय रहों, तो जेमन पाप काइर रहैं उमन के पहिलेहें चेतावनी देई रहों, अब मोंय फिन से उ सोउबमन के इ चिट्ठी में चेतावनी देओना जइसन पहिले देई रहों। आउर अब मोंय तीसरी बेर तोहरे ठिना आवेक वाला अहों, अगर केऊ एखनो तक पाप करेक नी छोइड़ हैं, तो उमन दंड से नी बाचबैं।

³ जब मसीह तोहरे के सुधरायला तो उ कमजोर नखे, मगर तोहर माझे अपन शक्ति के देखायला।

⁴ उ कमजोरी केर चलते क्रूस उपरे चढ़ाल तो गेलक, फिन भी परमेश्‍वर केर शक्ति से जिंदा अहे, हमरे हों कमजोर अही जइसन मसीह रहे, मगर तोहरे महसूस करबा कि हमरे परमेश्‍वर केर शक्ति से मसीह केर संगे जिंदा अही।

⁵ खुद के परखा कि तोहरे बिसवास में अहा कि निहीं, का तोहरेमन अपन बारे में इ नी जानाला कि यीशु मसीह तोहर में अहे? निहीं तो तोहरेमन निकम्मा अहा।

⁶ मगर मोर आसरा अहे कि तोहरेमन जाइन लेबा कि हमरे निकम्मा ना लगी।

⁷ हमरे अपन परमेश्‍वर से इ प्रार्थना करिला कि तोहरेमन कोनों बुराई ना करबा, इ लगिन निहीं कि हमरे परीक्षा से पार होई के खुद के तोहरे से बेस देखाएक चाहिला, बल्कि हमरे चाहिला कि तोहरे सही काम के जाना आउर उके करा, भले हमरे के लगेला कि हमरे हाइर जाय ही, मगर हमरे चाहिला कि तोहरे जीत जावा।

⁸ काले कि हमरे सच केर बिरोध में कोनों करेक नी पारब, मगर सच केर हें साथ देवेक पारब।

⁹ जब हमरे कमजोर अही आउर तोहरेमन बिसवास में मजबूत अहा, तो हमरे खुशी होविला, आउर एहो प्रार्थना करिला कि तोहरेमन बिसवास में सिद्ध होई जावा।

¹⁰ इ लगिन जब मोंय तोहर ठिना आवेक से पहिले इ गोइठमन के तोहरे के लिखाथों, तो मोके उ अधिकार केर मोताबिक जेके प्रभु देई हे, कड़ाई से कोनों करेक ना पड़ोक। काले कि मोके इ अधिकार तोहरे के बिगड़ाएक लगिन निहीं, मगर बनाएक लगिन देई हे।

जोहार

¹¹ हे बिसवासी भाईमन, खुश रहा, सिद्ध बनते जावा, मोर सलहा के सुना, एक मन रहा, मेल-जोल से रहा, आउर प्रेम आउर शांति केर देवाइया परमेश्‍वर तोहर संगे रही।

¹² मसीह केर प्रेम से एक दोसर के जोहार करा।

¹³ सोउब पवितर आदमीमन तोहरेमन के जोहार करैना।

¹⁴ प्रभु यीशु मसीह केर किरपा, आउर पवितर आत्मा केर मेल-मिलाप आउर परमेश्‍वर केर प्रेम तोहरे सोउब केर संगे होते रहोक।