2 कुरिनथियनमन 12 - सादरी नवाँ नियम

पौलुस केर दर्शन देखेक

¹ घमंड करेक तो मोर लगिन ठीक नखे फिन भी करेक पड़ेला, इ लगिन मोंय प्रभु केर देवल दर्शनमन केर आउर भेदमन केर चरचा करमूँ।

² मोंय मसीह में एगो आदमी के जानोना, जे चौदह बरिस पहिले, मोके पता नखे कि उ अपन काया सहित या सिरिफ अपन आत्मा में, परमेश्‍वर जानेला, इ आदमी सोउब से ऊँचा स्वरग तक उठाय लेवल गेलक।

³ मोंय फिन कहोना, मोके पता नखे एइसन सचमुच में होलक, या इ दर्शन रहे, परमेश्‍वर हें जानेला।

⁴ उ स्वरग लोक में उठाय लेवल गेलक आउर एइसन गोइठमन के सुनलक, जेकर बारे में केखो, दोसर आदमीमन के बताएक केर अधिकार नखे।

⁵ एइसन आदमी उपरे तो मोंय घमंड करमूँ, मगर अपन उपरे अपन कमजोरीमन के छोइड़, अपन बारे में घमंड नी करमूँ।

⁶ काले कि अगर मोंय घमंड करेक हों चाहमूँ तो मूरख नी बनमूँ, काले कि सच कहमूँ, मगर मोंय एइसन घमंड करेक से खुद के रोकोना, एइसन ना होवोक कि जइसन केऊ मोके देखेला, या मोर से सुनेला उकर से बाइढ़ के मोके समझोक।

⁷ मोंय परमेश्‍वर केर अदभुत गोइठमन केर चलते जेके उ मोके देखाय हे, घमंड से ना भाइर जामूँ, से लगिन मोर काया में एगो काँटा जोबल जाय हे, मतलब शैतान केर एगो दूत मोके घूँसा मारेक लगिन ताकल अहे, ताकि मोंय फूइल ना जामूँ।

⁸ इकर बारे में मोंय प्रभु से तीन बेर बिनती करलों, कि मोर से इ दूर होई जाओक।

⁹ आउर प्रभु मोर से कहलक, “मोर किरपा तोर लगिन काफी अहे, काले कि मोर शक्ति कमजोरी में सिद्ध होवेला।” इ लगिन मोंय ढेइर खुशी से अपन कमजोरीमन उपरे घमंड करमूँ कि मसीह केर शक्ति मोर उपरे छाँई करते रहोक,

¹⁰ इकर खातिर मोंय मसीह लगिन कमजोरीमन में आउर निंदामन में, आउर गरीबीमन में, आउर हुड़दंगमन में, आउर संकटमन में, खुश अहों, काले कि जेखन मोंय कमजोर होओना, तखनेहें मोंय मसीह केर शक्ति से बलवान होवोना।

कुरिन्थुस शहर केर बिसवासीमन केर लगिन पौलुस केर चिंता

¹¹ मोंय मूरख तो बनलों, मगर तोहरेहेमन मोके एइसन बनेक लगिन जबरजस्ती करला, तोहरेमन के तो मोर बड़ाई करेक चाही रहे, काले कि अगर मोर कीमत कोनोवें नखे, फिन भी बाड़ से बाड़ यीशु केर चुनल खास चेलामन में से कोनों गोइठ में कम नखों।

¹² यीशु केर चुनल खास चेला केर लक्षण हों तोहर माझे सोउब रकम केर धीरज सहित चिन्हामन, आउर चमत्कार केर काममन, आउर शक्ति केर काममन से देखाल गेलक।

¹³ एक काम अहे जेके मोंय तोहरेमन केर साथ नी करलों, मगर दोसर कलीसियामन केर बिसवासीमन से करलों, मोंय सिरिफ रुपया केर भार तोहरे उपरे नी देलों, जेकर मोके जरुरत रहे, तोहरे केर इ सोचेक गलत अहे कि मोंय एइसन काइर के तोहर बिरोध में गलती काइर हों।

¹⁴ देखा, मोंय तीसरा बेर तोहर ठिना आवेक ले तेयार अहों, आउर मोंय तोहरे से कोनों नी माँगमूँ। काले कि मोंय तोहर सम्पति के निहीं बल्कि तोहरेहेमन के चाहोना, काले कि छउवा-पुतामन के आयो-आबामन लगिन धन ठुराएक नी चाही, मगर आयो-आबामन के छउवा-पुता लगिन।

¹⁵ जे कोनों मोर ठिना अहे, उके तोहरेमन के देई के मोंय ढेइर खुश होमूँ, आउर मोंय तोहरे के परमेश्‍वर केर पिछे चलेक ले मदइत करेक लगिन खुद के हों देई देमूँ, मोंय तोहरेमन से ढेइर प्रेम करोना, मगर एइसन दिसेला कि तोहरेमन मोर से ढेइर थोर प्रेम कराला।

¹⁶ तोहरेमन मनाला कि मोंय तोहरे के बोझ नी देलों, मगर थोरेक बिसवासीमन सोचैना कि मोंय चतूर अहों आउर धोखा देई के तोहरे के फँसाय लेलों।

^17-18 मोंय तीतुस आउर उकर संगे एगो बिसवासी भाई के तोहरे ठिना भेजलों, तो उमन में से केखो नी कहलों कि उमन तोहरे से मोर लगिन रुपया माँगोक। हमरे केर मकसद तो एके अहे, आउर हमरे केर काम हों एके नियर अहे।

¹⁹ हे दुलार भाईमन, तोहरेमन एखन तक एहे बुझत होबा कि हमरे तोहर सामने अपन बचाव कराथी, हमरे तो परमेश्‍वर के हाजिर जाइन के मसीह में कहिला, आउर सोउब गोइठमन के तोहर उन्नति लगिन कहिला।

²⁰ काले कि मोके डार अहे, कहीं एइसन ना होवोक कि मोंय आय के जइसन चाहोना, तइसन तोहरेमन के नी पामूँ, आउर तोहरेमन हों मोके जइसन चाहाला तइसन नी पाबा, जेकर से तोहर माझे झगरा, हिसिंगा, डाह, खीस, स्वार्थ, चुगली, घमंड, आउर बखेड़ा ना होवोक।

²¹ कहीं एइसन ना होवोक कि जब मोंय फिन से तोहरे ठिना घूइर आमूँ, तो मोर परमेश्‍वर मोके अपमान करी। आउर मोके ढेइरमन लगिन शोक करेक पड़ी, जेमन पहिले पाप काइर रहैं, आउर गंदा काम, ब्यभिचार आउर लाज केर काम से मन नी फिरालैं।