2 कुरिनथियनमन 11 - सादरी नवाँ नियम

पौलुस आउर यीशु केर झूठा चेला

¹ तोहरेमन उमन के ग्रहण कराला जेमन अपन खुद केर गुण गावैना, से लगिन मोंय आसरा करोना कि अगर मोंय हों थोरेसन मूरख नियर काम करमूँ, तो तोहरेमन साइह लेबा।

² काले कि मोंय तोहरे केर बारे में चिंता करोना, जइसन परमेश्‍वर करेला, से लगिन तोहरेमन के मोंय, तोहरे केर एके गो पति मसीह केर हाँथ में पवितर डिंड़ा कन्या नियर सोंइप देवेक केर करार काइर हों।

³ मगर मोंय डरावना कि जइसन शैतान साँप केर रूप में अपन चलाँकी से पहिला जनाना हव्वा के बहकालक, तइसनेहें तोहरे केर मन के हों उ सिधाई आउर पवितरता से मसीह के जे आदर देवेक चाही, उकर से कहीं दूर ना काइर देओक।

⁴ जब कभी केऊ तोहरे ठिना आय के, केऊ दोसर यीशु केर परचार करेला जेकर परचार हमरे नी काइर ही, चाहे कोनों दोसर आत्मा के पावाला जेके पहिले नी पाय रहा, चाहे तोहरेमन कोनों दोसर शुभ समाचार के सुनला जेके पहिले नी सुइन रहा, तो तोहरे तुरते उके ग्रहण काइर लेवाला जे कि गलत है।

⁵ मोंय कोनों गोइठ में उमन से कम नखों, जेमन खुद के यीशु केर चुनल खास चेलामन में से सोउब से बाड़ समझैना।

⁶ मोंय बोलेक में चतूर नखों, मगर मोर ठिना मसीह केर बारे में आउर शुभ समाचार केर बारे में गेयान अहे, बल्कि मोंय अपन सिखाएक केर सोउब गोइठमन में अपन गेयान के देखाय हों।

⁷ मोंय खुद के छोट बनाय देलों जेकर से तोहरे के परमेश्‍वर केर शुभ समाचार के मुफत में सुनामूँ, ताकि तोहरे आदर पाबा, का मोंय एइसन काइर के कोनों पाप करलों?

⁸ मोंय दोसर कलीसियामन से दान लेलों, ताकि तोहरे केर सेवा करमूँ, तोहरे के इ नी कहेक चाही कि एइसन करेक गलत हेके।

⁹ आउर जब मोंय तोहर संगे रहों, आउर मोके रुपया केर घटी होलक तो मोंय केखो बोझा नी देलों, काले कि बिसवासी भाईमन मकिदुनिया परदेस से आय के मोर घटी के पूरा करलैं, आउर मोंय कोनों गोइठ में तोहरे उपरे बोझा नी बनलों आउर आवेक वाला दिन में हों नी बनमूँ।

¹⁰ अगर मसीह केर सच्चाई मोर में पक्का अहे, तो अखया परदेस में केऊ मोके इ घमंड से रोकेक नी पारी।

¹¹ मोंय तोहरे केर रुपया के काले नी लेलों? का मोंय एइसन इ लगिन करलों कि मोंय तोहर से प्रेम नी करोना? परमेश्‍वर जानेला कि मोंय तोहरे से प्रेम करोना।

¹² ताकि मोंय यीशु केर झूठा चेलामन के हमरे केर बराबरी होवेक से रोकेक पारमूँ। उमन सचमुच में इ दावा करेक केर मोका खोजैना कि उमन केर इ घमंड करेक सच अहे कि उमन हमरे केर बराबइर अहैं।

¹³ काले कि एइसन आदमीमन यीशु केर चुनल खास चेला ना लगैं, उमन छल से काम करेक वालामन आउर मसीह केर चुनल खास चेलामन केर रूप धारेक वालामन हेकैं।

¹⁴ आउर इ कोनों ताजुब केर गोइठ ना लगे, काले कि शैतान खुद हें चमकेक वाला स्वरगदूत केर रूप धारण करेला।

¹⁵ से लगिन अगर उकर सेवकमन हों, धरमी बनाएक वाला केर सेवकमन नियर रूप धरबैं, तो कोनों बड़का गोइठ ना लगे, मगर उ मनक अंत उमन केर काममन केर मोताबिक होवी।

यीशु केर चुनल खास चेला केर रूप में पौलुस केर दुःख

¹⁶ मोंय फिन कहोना, केऊ मोके मूरख ना समझोक, निहीं तो मूरख हें समइझ के मोर साइह लेवा, ताकि थोरेसन मोंय हों घमंड करेक पारमूँ।

¹⁷ इकर बारे में जे कोनों मोंय कहोना, उ प्रभु केर आगया केर मोताबिक निहीं मगर मूरखमन नियर कहोना।

¹⁸ जबकि ढेइर आदमीमन इ दुनिया केर मोताबिक घमंड करैना, तो मोंय हों घमंड करमूँ।

¹⁹ तोहरेमन तो समझदार होई के हों मूरखमन केर ब्यवहार के खुशी से साइह लेवाला।

²⁰ काले कि जब तोहरेमन के केऊ धांगर बनाय लेवेला, या तोहरे ठिना जे कोनों अहे उ सोउब के ले लेवेला या धोखा देवेला, या खुद के बाड़ बनायला, या तोहर गाल में थप्पड़ मारेला, तो तोहरेमन साइह लेवाला।

²¹ से लगिन का तोहरे सोचाला कि मोके लाज होवेक चाही, काले कि मोंय एइसन नी काइर हों? मगर जे केऊ कोनों गोइठ में घमंड करेला: मोंय मूरखमन नियर कहोना, तो मोंय हों घमंड करोना।

²² का उमन हें इब्रानी आदमी हेकैं? मोंय हों हेकों, का उमन हें इसराइली आदमी हेकैं? मोंय हों हेकों, का उमन हें अब्राहम केर बंश हेकैं? मोंय हों हेकों।

²³ का उमन हें मसीह केर सेवक हेकैं? मोंय पगला नियर कहोना, मोंय उमन से बाइढ़ के हेकों! मोंय उमन से बगरा मेहनइत काइर हों, उमन से बगरा जेहेल खाइट हों, अनगिनइत बेर माउर खाय हों, अक्सर मोर प्राण संकट में पाइड़ हे।

²⁴ पाँच बेर मोंय यहूदी अगुवामन केर हाँथ से उन्तालीस-उन्तालीस कोड़रा खाय हों

²⁵ तीन बेर मोके बेंत से मारल गेलक, एक बेर पखना से मारल गेलों, तीन बेर जहाज जेकर उपरे मोंय चाइढ़ रहों, टूइट गेलक, एक राइत दिन मोंय समुदर में काटलो।

²⁶ मोंय घरी-घरी यात्रामन में; नदीमन केर खतरामन में; डाकूमन केर खतरामन में, अपन जाइत वालामन से खतरामन में, परजाइत आदमीमन से खतरामन में, नगरमन केर खतरामन में जंगलमन केर खतरामन में, समुदर केर खतरामन में, झूठा भाईमन केर माझे खतरामन में।

²⁷ मेहनइत आउर दुःख में, घरी-घरी जागते रहेक में, भूख-पियास में, घरी-घरी उपास करेक में, जाड़ में, लुगा केर घटी में।

²⁸ आउर-आउर गोइठमन के छोइड़ के जेकर बखाइन मोंय नी करोना सोउब कलीसियामन केर चिंता रोज दिन मोके दबायला।

²⁹ जब केऊ कमजोर होवेला तो मोंय हों कमजोर होओना। जब केऊ हों पाप में फाँइस जायला, तो उकर उपरे मोंय खिसाय जावना।

³⁰ अगर घमंड करेक जरुरी अहे, तो मोंय अपन कमजोरी केर गोइठमन केर उपरे करमूँ।

³¹ प्रभु यीशु केर परमेश्‍वर आउर आबा जे सोउब बेरा धाइन अहे, जानेला कि मोंय झूठ नी कहोना।

³² दमिश्क नगर में अरितास राजा केर बटे से जे हाकिम रहे, उ मोके धारेक ले दमिश्कीमन केर नगर में पहरा बइठाय रहे।

³³ मगर मोंय टोकरी में खिड़की से होई के भीत उपरे से उतराल गेलों, आउर उकर हाँथ से बाइच निकललो।