2 कुरिनथियनमन 10 - सादरी नवाँ नियम

पौलुस केर अधिकार

¹ थोरेक आदमीमन कहैना कि जब मोंय तोहर संगे रहोना तो नरम रहोना, मगर जब तोहर से दूर रहोना तो साहस करोना, से लगिन मोंय पौलुस तोहरे से अरजी करोना कि यीशु मसीह केर धीरज आउर नरम जिंदगी केर चलते मोंय उकर नमूना केर पालन करोना।

² मोंय इ बिनती करोना कि जब मोंय हूवाँ आमूँ तो मोके उमन केर परती, जेमन इ सोचैना कि हमरे केर जिंदगी इ दुनिया केर आदमीमन नियर अहे, कठोर ब्यवहार करेक पड़ी, जेकर उमन मोर से आसरा करैना।

³ काले कि हमरे इ दुनिया में रहिला मगर इ दुनिया केर आदमीमन नियर नी लड़िला।

⁴ हमरे केर लड़ाई केर हँथियार इ दुनिया केर आदमीमन केर हँथियार नियर नखे, मगर गढ़मन के गिराय देवेक लगिन परमेश्‍वर बटले शक्तिशाली अहे।

⁵ से लगिन हमरे मन केर बिचारमन के आउर हरेक घमंड केर गोइठ के, जे परमेश्‍वर केर इच्छा केर बिरोध में उठेला, उके रोकिला आउर हर एक बिचारमन के काबू काइर के मसीह केर आगयाकारी बनाय देवीला।

⁶ आउर तेयार रहिला कि जब तोहरे पूरा-पुरी मसीह केर आगयाकारी बिसवासी बाइन जबा, तब हरेक रकम केर आगया नी मानेक वाला आदमी के परमेश्‍वर दंड देवी।

⁷ तोहरेमन बाहरी चीजमन के देखाला, अगर केखो अपन उपरे इ भरसा अहे कि मोंय मसीह केर हेकों, तो उ एहो जाइन लेवोक कि जइसन उ मसीह केर हेके, तइसनेहें हमरे हों मसीह केर हेकी।

⁸ काले कि अगर मोंय उ अधिकार केर बारे में आउर हें घमंड करमूँ, जेके प्रभु तोहरे केर बिसवास के घटाएक लगिन निहीं मगर बढ़ाएक लगिन हमरे के देई हे, तो लाजिम नी होमूँ।

⁹ तोहरेमन इ ना सोचबा कि मोंय अपन चिट्ठी से तोहरे के डरुवाएक चाहोना।

¹⁰ काले कि तोहर में से थोरेक आदमीमन कहैना कि उकर चिट्ठीमन तो, कठोर आउर शक्तिशाली अहे, मगर जब उ हमरे केर सामने रहेला, तो उकर काया कमजोर दिसेला आउर उकर गोइठ में कोनों असर नी बुझायला।

¹¹ जेमन एइसन कहैना उमन इ जाइन लेओक कि जइसन हमरे चिट्ठीमन में लिखिला, तइसनेहें तोहरे केर सामने काम हों करिला।

¹² काले कि हमरे के इ साहस नखे कि हमरे खुद के उमन में से गिनब या जोड़ी करब, जेमन अपन बड़ाई खुद करैना आउर आपस में खुद के नाइप जोइख के एक दोसर से जोड़ी करैना, आउर मूरख बनैना।

¹³ हमरे तो जे काम परमेश्‍वर हमरे के करेक लगिन देई हे उकर से बगरा घमंड कहियो नी करब, मगर ओतनेहें तक करब जेतना परमेश्‍वर हमर लगिन ठहराय देई हें, आउर उकर में तोहरेमन हों शामिल होई जाय हा, आउर उकरे मोताबिक घमंड हों करब।

¹⁴ काले कि हमरे अपन सीमा से बाहरे खुद के बढ़ाएक नी चाहिला, जइसन कि तोहरेमन तक नी पोंहचेक केर दशा में होतक, बल्कि हमरे पहिला आदमीमन हेकी, जेमन तोहरे के मसीह केर शुभ समाचार के बताएक लगिन गोटा कुरिन्थुस शहर में सफर काइर ही।

¹⁵ हमरे सीमा से बाहरे दोसरमन केर मेहनइत उपरे घमंड नी करिला, मगर हमरे के आसरा अहे कि जइसन-जइसन तोहर बिसवास बढ़ते जाई तइसन-तइसन हमरे अपन सीमा केर मोताबिक तोहरे केर माझे आउर बड़का काम करेक पारब।

¹⁶ कि हमरे तोहरे केर सिमान से आगे बाइढ़ के दूर-दूर ठाँव में शुभ समाचार सुनाब, इ निहीं कि हमरे दोसरमन केर काममन केर उपरे घमंड करब, जहाँ परमेश्‍वर हमरे के नी भेइज हे।

¹⁷ मगर जइसन पवितर किताब में लिखल अहे, जे घमंड करेला उ प्रभु उपरे घमंड करोक।

¹⁸ काले कि जे अपन बड़ाई करेला उ निहीं, मगर जेकर बड़ाई प्रभु करेला, उ प्रभु केर देखेक में बेस अहे।