2 कुरिनथियनमन 1 - सादरी नवाँ नियमजोहार 1 इ चिट्ठी मोंय पौलुस आउर बिसवासी भाई तीमुथियुस बटले हेके, मोंय परमेश्वर केर इच्छा से मसीह यीशु केर चुनल खास चेला हेकों, इ चिट्ठी अखया परदेस में रहेक वाला परमेश्वर केर आदमीमन केर नाँव में आउर उ कलीसिया केर नाँव में लिखल जाय हे, जे कुरिन्थुस शहर में अहे। 2 मोंय प्रार्थना करोना कि हमरे केर आबा परमेश्वर आउर प्रभु यीशु मसीह तोहरेमन उपरे किरपा करोक आउर शांति देवोक। परमेश्वर के धन्यबाद देवेक 3 हमरे केर प्रभु यीशु मसीह आउर आबा परमेश्वर केर धन्यबाद होवोक, जे दया करेक वाला आबा आउर सोउब रकम केर दुःख में दिलासा देवेक वाला परमेश्वर हेके। 4 उ हमरे केर सोउब मुसीबतमन में दिलासा देवेला, ताकि हमरे हों उ दिलासा से जेके परमेश्वर हमरे के देवेला, दोसरमन के दिलासा देवेक पारब, जेमन कोनों रकम केर मुसीबतमन में अहैं। 5 काले कि जेतना बगरा हमरे मसीह केर दुःखमन में भागी होविला, ओतनेहें बगरा हमरे के दिलासा हों मिलेला। 6 अगर हमरे दुःख पाविला, तो इ तोहर शांति आउर छुटकारा लगिन हेके, आउर अगर हमरे शांति पाविला, तो इ तोहर शांति लगिन हेके, जेकर असर से तोहरेमन धीरज केर साथ उ दुःख तकलीफमन के साइह लेवाला, जेके हमरे हों सहिला। 7 तोहरे केर बारे में हमरे के पक्का आसरा अहे, काले कि हमरे जानिला कि जे नियर तोहरेमन हमरे केर दुःखमन में शामिल अहा, ओहे नियर हमरे केर शांति में हों शामिल होबा। 8 हे बिसवासी भाईमन, मोंय चाहोना कि तोहरेमन उ दुःखमन के जाना, जे आसिया परदेस में हमरे केर उपरे होई रहे, हमरे एइसन भरी बोझ से दइब जाय रही जे हमरे केर सहेक शक्ति से बाहरे रहे, हिंयाँ तक हमरे सोइच रही कि अब हमरे नी जियब, 9 बल्कि माइर मोराय देवल जाब। ताकि हमरे अपन उपरे भरसा नी करब, बल्कि परमेश्वर उपरे भरसा करब जे मोरलमन के जियायला। 10 ओहे हमरे के माउत केर बड़का संकट से बचालक, आउर हमरे आसरा करिला कि उ आगे हों बचाते रही। 11 जइसन कि तोहरेमन प्रार्थना करेक केर द्वारा हमर मदइत कराला, ताकि जे आशीषमन ढेइर आदमीमन केर जरिया से हमरे के मिललक, उकर हें जरिया से ढेइर आदमीमन हमर बटले परमेश्वर के धन्यबाद देबैं। पौलुस केर यात्रा में बदलाव 12 हमरे के इ गोइठ उपरे घमंड अहे कि हमरे केर बिवेक बिसवास दिवायला कि हमरे आदमीमन केर साथ, आउर खास काइर के तोहरे केर साथ, जे ब्यवहार काइर ही उ दुनिया केर गेयान केर मोताबिक निहीं, बल्कि उ सच्चाई आउर ईमानदारी केर मोताबिक रहे, जे परमेश्वर केर किरपा केर बरदान हेके। 13 हमरे तोहरेमन के सिरिफ ओहे लिखिला जेके तोहरेमन पइढ़ के बुझेक पाराला, मगर फिन भी तोहरे हमरे के आधा हें बुझाला, मोंय आसरा करोना कि तोहरेमन हमरे के पूरा-पुरी समइझ जबा, ताकि तोहरे हमरे उपरे ओहे नियर घमंड करबा जइसन हमरे हों तोहरे उपरे उ बेरा घमंड करब, जब प्रभु यीशु दोबारा घूइर आवी। 14 जइसन तोहरे में से केतना झन माइन लेई हैं कि हमरे केर चलते तोहरे घमंड कराला, तइसनेहें हमरे हों तोहरेमन केर चलते प्रभु यीशु केर घूइर आवेक दिन घमंड करब। 15 मोके पक्का भरसा रहे कि सोउब से पहिले तोहरे से भेंट करेक केर हमर योजना के तोहरे जानत रहा, मोंय तोहरे से दोबारा मिल के दुगुना आशीष देवेक चाहत रहों। 16 मोर योजना रहे कि मोंय तोहरे ठिना से होई के मकिदुनिया परदेस जामूँ, आउर फिन मकिदुनिया परदेस से तोहरे ठिना घूइर आमूँ, आउर मोंय आसरा करोना कि तोहरेमन मोके यहूदिया परदेस जाएक लगिन मोर डहर खरचा देई देबा। 17 जब मोंय एइसन फैसला करलों तो सोइच समइझ के करलों, मोंय दुनिया केर आदमीमन नियर करेक नी चाहत रहों, जेमन हाँ हों कहैना फिन पाछे से निहीं हों कहैना। 18 परमेश्वर जानेला कि जे कोनों हमरे तोहरे से कइह ही, उ सोउब सच्चा हेके। 19 काले कि परमेश्वर केर बेटा यीशु मसीह केर परचार, हमरे, मतलब मोंय पौलुस, सीलास आउर तीमुथियुस केर जरिया से तोहर माझे होलक, उकर में कभी हाँ, आउर कभी निहीं, दुइयो नी रहे, मगर उकर में हाँ, आउर हाँ हें रहे। 20 काले कि परमेश्वर केर जेतना करारमन अहे उ सोउब मसीह में हाँ केर साथ पूरा होलक, आउर से लगिन हमरे यीशु मसीह केर द्वारा से परमेश्वर केर महिमा लगिन आमीन कहिला। 21-22 जे परमेश्वर हमरे के तोहर संगे मसीह में पोक्ता बनायला, आउर जे हमरे उपरे अपन मोहर लगाय के बेयाना केर रूप में अपन आत्मा के हमरे केर हिरदय में राइख के अभिषेक काइर हे। 23 परमेश्वर मोर इ सच्चाई केर गवाह हेके कि मोंय दोबारा कुरिन्थुस शहर में इ लगिन नी आलों, ताकि तोहरे के परेशानी ना होवोक। 24 इ निहीं कि हमरे बिसवास केर बारे में तोहरेमन उपरे हक जमाएक चाहिला, मगर तोहर खुशी में साथ देवेक चाहिला, काले कि तोहरेमन बिसवास से हें स्थिर रहाला। |
Sadri Bible by The Love Fellowship is licensed under Creative Commons Attribution-ShareAlike 4.0 License.
Beyond Translation