1 तीमुथियुस 2 - सादरी नवाँ नियम

आराधना केर बारे में आगया

¹ अब मोंय सोउब से बाइढ़ के इ अरजी करोना कि बिनती, आउर प्रार्थना, आउर अरजी, आउर धन्यबाद, सोउब आदमीमन केर लगिन करल जाओक।

² राजामन लगिन आउर उ सोउब आदमीमन केर लगिन प्रार्थना करा जेमन सरकारी अधिकारी हेकैं, ताकि उमन हमरे के शांति आउर चैन से रहेक में सहायता करोक, आउर हमरे परमेश्‍वर केर आराधना करेक पारब आउर दोसरमन से उचित ब्यवहार करब।

³ एइसन प्रार्थना करेक ठीक अहे आउर हमर छुटकारा देवाइया परमेश्‍वर इके ग्रहण करेला।

⁴ उ चाहेला कि सोउब आदमीमन बाइच जाओक आउर सच्चाई के बढ़ियाँ से जाइन जाओक।

⁵ काले कि सिरिफ एके गो परमेश्‍वर अहे, आउर परमेश्‍वर आउर आदमीमन केर माझे हों एके गो आदमी अहे, मतलब यीशु मसीह, जे आदमीमन के परमेश्‍वर से मिलाएक पारेला।

⁶ जे सोउब आदमीमन के छुटकारा देवेक केर दाम केर रूप में खुद के बलिदान काइर देलक। उकर बलिदान केर द्वारा परमेश्‍वर ठीक समय में गवाही देलक, ताकि जेमन बचेक चाहैना उ सोउबमन बाइच जाओक।

⁷ मोंय सच कहाथों, झूठ नी कहाथों, परमेश्‍वर मोके शुभ समाचार केर परचारक, आउर अपन खास चेला बनेक लगिन चुइन हे। उ मोके परजाइत आदमीमन के बिसवास आउर सच्चाई केर बारे में सिखाएक लगिन हों चुइन हे।

⁸ मोंय चाहोना कि सोउब जगा सभामन में मरदानामन परमेश्‍वर लगिन अपन दुइयो हाँथ के उठाय के बेगर खीस आउर बेगर बक-झक केर प्रार्थना करोक।

⁹ ओहे नियर मोंय चाहोना कि बिसवासी जनानामन के हों, उचित तरीका से लुगा पिंधेक चाही, जे कि सभ्य आउर स्वीकार लायक होवोक, आउर बाल के एइसन गूँथोक कि जेके देखेक ले दोसरमन आकर्षित ना होवोक, आउर ना ही दोसरमन के देखाएक लगिन सोना आउर मोतीमन आउर ना महंगा लुगा पिंधोक।

¹⁰ मगर उमन के दोसरमन लगिन भला काम काइर के खुद के सुन्दर बनाएक चाही, काले कि परमेश्‍वर केर नजइर में भक्ति करेक वाला जनानामन के एहे उचित अहे।

¹¹ जब केऊ, बिसवासीमन के सिखात रहबैं, तब सोउब जनानामन के चुपचाप आउर अधीन रइह के सुनेक आउर सिखेक चाही।

¹² मोंय कहोना, जनानामन पुरूष उपरे अधिकार ना चलाओक आउर ना उपदेस देवोक मगर चुपचाप रहोक।

¹³ मोंय एइसन इ लगिन कहाथों काले कि परमेश्‍वर आदम के पहिले बनालक, उकर पाछे हव्वा के बनालक।

¹⁴ आउर आदम शैतान से बहकाल नी गेलक, मगर जनाना हव्वा के शैतान बहकालक आउर उ पापी होलक।

¹⁵ फिन भी छउवा जनम देवेक केर चलते जनानामन बाइच जाबैं, अगर उमन यीशु मसीह में बिसवास रखबैं, दोसरमन से प्रेम करबैं आउर शुद्ध आउर संयम सहित जिंदगी बिताबैं, तो परमेश्‍वर उमन के बचाय लेवी।