1 तीमुथियुस 1 - सादरी नवाँ नियम

जोहार

¹ इ चिट्ठी मोंय पौलुस बटले हेके। मोंय हमरे केर छुटकारा देवाइया परमेश्‍वर आउर यीशु मसीह जेकर में हमरे आसरा करिला, उकर अधिकार से यीशु मसीह केर एगो चुनल खास चेला हेकों।

² मोंय इ चिट्ठी, हे तीमुथियुस तोके लिखाथों, तोंय मोर अपन बेटा नियर अहिस, काले कि तोंय हों यीशु मसीह में बिसवास करिसला। मोंय प्रार्थना करोना कि आबा परमेश्‍वर आउर हमर प्रभु यीशु मसीह बटले तोके किरपा, दया आउर शांति मिलते रहोक।

झूठा सिखाएक वालामन के चेतावनी

^3-4 हे तीमुथियुस जइसन कि तोंय जानिसला कि इफिसुस शहर में थोरेक एइसन आदमीमन अहैं, जेमन गलत शिक्षा देवैना। उमन लगातार झूठा कहानीमन आउर पुरखामन केर लम्बा बंशावली के सिखायना, जब मोंय इफिसुस शहर से मकिदुनिया परदेस में जाएक लगिन तेयार रहों, तो मोंय तोके इफिसुस शहर में हें रहेक लगिन कहलों आउर उ आदमीमन के इ बताएक लगिन कहलों कि उमन एइसन शिक्षा ना देवोक। जब उमन एइसन गोइठ के सिखायना तो आदमीमन उमन केर बारे में बक-झक करैना। इकर नतीजा इ हेके कि उ सिखाएक वालामन उ काम के नी कराथैं, जेके परमेश्‍वर उमन के करेक ले देई रहे, उ काम के उमन सिरिफ परमेश्‍वर उपरे भरसा काइर के हें करेक पारैना।

⁵ तोहरे के इ आगया देवेक केर मोर मकसद इ हेके कि तोहरे एक दोसर के सच्चा मन, शुद्ध बिवेक आउर पूरा बिसवास से प्रेम करा।

⁶ झूठा सिखाएक वालामन इ सोउब चीजमन के छोइड़ देई हैं, आउर सिरिफ बेकार चीजमन केर बारे में गोठियायना।

⁷ आउर उमन मूसा केर नियम के सिखाएक वाला तो बनेक चाहैना, मगर जे गोइठमन के उमन सिखायना आउर ढेइर जोर देई के सिखायना, उके उमन खुद हें नी बुझैना।

⁸ हमरे जानिला कि मूसा केर नियम अच्छा अहे, अगर उके ओहे नियर लागू करल जातक जे नियर उके लागू करेक अहे।

⁹ इ जाइन के कि मूसा केर नियम धरमी आदमीमन लगिन निहीं मगर अधरमीमन आउर अत्याचारीमन, भक्तिहीनमन आउर पापीमन, अपवितरमन आउर अशुद्ध आदमीमन, आयो-आबा के मोराएक वालामन आउर हत्यारामन,

¹⁰ ब्यभिचारीमन, मरद-मरद केर संग ब्यभिचार करइयामन, आदमीमन के चोराय के गुलाम केर रूप में बेचाइयामन, झूठ बोलेक वालामन, आउर सच बोलेक केर किरिया खाय के हों झूठ बोलेक वालामन लगिन, आउर इकर अलावा, सही शिक्षा जे काम के करेक ले सिखायला, उके करेक से मना करेक वालामन लगिन हों ठहराल जाय हे।

¹¹ इ शिक्षा उ शुभ समाचार केर उपरे टिकल अहे, जे उ महिमा केर बारे में बतायला, जे धाइन परमेश्‍वर से जुड़ल अहे, जेके सुनाएक लगिन मोके जिम्मा देवल जाय हे।

किरपा केर लगिन धन्यबाद

¹² मोंय अपन प्रभु यीशु मसीह के जे मोके शक्ति देई हे, धन्यबाद देवोना कि उ मोखे बिसवास लाएक समइझ के अपन सेवा करेक लगिन ठहरालक।

¹³ मोंय तो बिसवासी बनेक से पहिले मसीह केर बारे में निंदा करेक वाला, आउर बिसवासीमन के सताएक वाला, आउर उमन केर नोकसान करेक वाला रहों, फिन भी परमेश्‍वर केर दया मोर उपरे होलक, काले कि इ काम मोंय अनजाने में करत रहों आउर यीशु मसीह उपरे बिसवास नी करत रहों।

¹⁴ मगर हमर प्रभु केर किरपा, बिसवास आउर प्रेम केर संगे भरपूरी से मोर उपरे होलक, काले कि मोंय मसीह यीशु केर संगे एकजूट अहों।

¹⁵ इ गोइठ सच आउर सोउब रकम से मानेक केर लाएक अहे कि मसीह यीशु हमरे पापीमन के बचाएक लगिन दुनिया में आलक, जेमन में से सोउब से बगरा पापी मोंय हेकों।

¹⁶ मगर यीशु मसीह मोर उपरे दया करलक आउर मोर सोउब से बगरा पापमन के क्षमा काइर के, इ देखाएक चाहेला कि उ केतना सहनशील अहे। ताकि उमन लगिन मोंय एगो नमूना बनमूँ, जेमन पाछे से जुग-जुग केर जिंदगी पावेक लगिन उकर उपरे बिसवास करबैं।

¹⁷ अब जुग-जुग केर राजा जे सोउब दिन लगिन जिंदा अहे, जेके केऊ नी देइख हैं, जे एके गो सच्चा परमेश्‍वर हेके, उकर आदर आउर महिमा जुग-जुग होते रहोक। आमीन।

¹⁸ हे बेटा तीमुथियुस, मोंय तोके उ गोइठमन के याइद करेक ले कहाथों, जे पहिले भविष्यवाणीमन में तोर बारे में कहल जाय रहे, मोंय तोके इ आगया सोपाथों कि तोंय उमन केर मोताबिक झूठा सिखाएक वालामन केर बिरोध में लड़ाई के लड़ते रह।

¹⁹ आउर तोके मसीह उपरे बिसवास में बनल रहेक चाही आउर तोर में एगो शुद्ध बिवेक होवेक चाही। थोरेक आदमीमन उ शुद्ध बिवेक के छोइड़ देलैं जेकर नतीजा इ होलक कि अब उमन बिसवास में नखैं।

²⁰ ओहेमन में से हुमिनयुस आउर सिकंदर हेकैं, जेमन के मोंय कलीसिया से बाहरे निकलाय देलों आउर शैतान के सोंइप देलों कि उमन परमेश्‍वर केर निंदा करेक ना सिखाओक।