1थिस्सलुनीकियनमन 4 - सादरी नवाँ नियम

परमेश्‍वर के खुश करेक वाला जिंदगी

¹ हे भाईमन, हमरे प्रभु यीशु केर नाँव में तोहर से बिनती करिला कि तोहरेमन इ नियर जिंदगी बितावा जे परमेश्‍वर के खुश करेला, जइसन हमरे तोहरे के सिखाय ही। तोहरे पहिले से हें इ नियर जिंदगी बिताथा, आउर हमरे तोहरे के एइसन करेक लगिन आउर हें बगरा उसकाइला।

² काले कि तोहरेमन जानाला कि जे आगया हमरे तोहरे के देई ही, उ प्रभु यीशु बटले आय हे।

³ काले कि परमेश्‍वर केर इच्छा इ हेके कि तोहरेमन पवितर बना, मतलब ब्यभिचार ना करबा।

⁴ तोहर में से हरेक झन अपन काया उपरे कब्जा करेक सिखा, आउर अपन जनाना केर संगे पवितर आउर आदर केर संगे रहा।

⁵ आउर इ काम काया केर लालसा से करेक नखे, आउर ना उ जाइतमन नियर जेमन परमेश्‍वर के नी जानैना।

⁶ एइसन काइर के तोहरे के अपन बिसवासी भाईमन केर बिरोध में पाप नी करेक चाही आउर ना हें कोनों गलत फायदा उठाएक चाही, काले कि इ सोउब गोइठमन केर बारे में प्रभु पलटा लेवेला, जइसन कि हमरे पहिलेहें तोहरेमन के सफा-सफा कइह के कठोर चेतावनी देई रही।

⁷ काले कि परमेश्‍वर हमरे के अशुद्ध जिंदगी जियेक लगिन निहीं, मगर पवितर जिंदगी जियेक लगिन बोलाय हे।

⁸ इ लगिन जे इ नियममन केर मोताबिक जियेक से इनकार करेला, उ आदमी के निहीं मगर परमेश्‍वर के इनकार करेला, जे अपन पवितर आत्मा के तोहरेमन के देवेला।

⁹ मगर संगी बिसवासी भाईमन से प्रेम केर बारे में इ जरुरी नखे कि मोंय तोहर ठिना कोनों लिखमूँ, काले कि आपस में प्रेम रखेक तोहरेमन खुद हें परमेश्‍वर से सीख हा।

¹⁰ आउर गोटा मकिदुनिया परदेस केर सोउब बिसवासी भाईमन से एइसनेहें प्रेम करबो कराला। मगर हे भाईमन, हमरे तोहरेमन के समझाइला कि प्रेम में आउर हें बढ़ते जावा।

¹¹ आउर जइसन हमरे तोहरेमन के आगया देई ही, तइसनेहें शांति से रहा आउर दोसरमन केर काम में दखल ना देवा आउर अपन-अपन हाँथ से कमाएक केर कोशिश करा।

¹² ताकि अबिसवासीमन देखबैं कि तोहरे हर दिन कइसन ब्यवहार कराला, आउर तोहर आदर करबैं आउर तोहरेमन में कोनों चीज केर घटी ना होवोक।

यीशु केर दोबारा घूइर आवेक

¹³ हे भाईमन, हमरे चाहिला कि तोहरेमन उ बिसवासीमन केर बारे में जेमन मोइर जाय हैं, जाइन लेवा कि उ मनक संगे का होवी, एइसन ना होवोक कि तोहरे के दोसरमन नियर शोक करेक पड़ी, जेमन के मोरल पाछे फिन से जियेक केर आसरा नखे।

¹⁴ अगर हमरे बिसवास करिला कि यीशु मोरलक, आउर जी हों उठलक, तो तइसनेहें परमेश्‍वर उमन के हों, जेमन यीशु में बिसवास काइर के मोइर जाय हैं, यीशु केर संगे वापस लानी।

¹⁵ काले कि हमरे प्रभु यीशु केर बचन केर मोताबिक तोहरेमन से इ कहिला कि जेमन बिसवास में मोइर जाय हैं, उमन पहिले प्रभु से मिलेक पारबैं। उकर पाछे हमरेमन जे जिंदा अही आउर प्रभु यीशु केर आवेक तक बचल रहब, तो प्रभु केर संगे भेंट करेक पारब।

¹⁶ काले कि प्रभु यीशु खुद हें स्वरग से उतरी उ समय आदमीमन यीशु के ऊँचा आवाज से आदेश देते सुनबैं, आउर प्रधान दूत जोर से बोली, आउर परमेश्‍वर केर तुरही फूँकल जाई, आउर जेमन मसीह में बिसवास काइर के मोइर हैं, उमन पहिले जी उठबैं।

¹⁷ तब हमरे जेमन जिंदा आउर बचल रहब उमन केर संगे आकाश में प्रभु से मिलेक लगिन बदरी उपरे उठाय लेवल जाब, आउर इ नियर हमरे सोउब दिन लगिन प्रभु केर संगे रहब।

¹⁸ इ गोइठमन से एक दोसर के उसकाते रहा।