1थिस्सलुनीकियनमन 3 - सादरी नवाँ नियम

तीमुथियुस के भेजल जाएक

¹ इ लगिन जब हमरे के तोहरे से दूर रहेक बरदास नी होलक, तो हमरे इ बिचार करली कि एथेंस शहर में एकले रइह जाब।

² आउर हमरे तीमुथियुस के जे मसीह केर शुभ समाचार में हमर भाई आउर परमेश्‍वर केर सेवक हेके तोहर ठिना भेजली, ताकि उ तोहरेमन के मसीह में पोक्ता बिसवास करेक लगिन सहायता करोक, आउर बिसवास में बनल रहेक लगिन तोहरे के समझाओक।

³ ताकि केऊ इ दुःखमन केर चलते बिसवास के छोइड़ ना देवोक, काले कि तोहरेमन खुद जानाला कि हमरे के दुःख उठाएक पड़ी।

⁴ हमरे पहिलेहें जब तोहरे ठिना रही तो तोहरेमन के कहत रही कि हमरे उपरे सताव आवी, आउर एइसनेहें होलक जेके तोहरेमन हों जानाला।

⁵ इ लगिन जब मोर से तोहरेमन केर बिसवास केर हाल जानल बिना रहल नी गेलक, तो मोंय तोहरे केर बिसवास केर हाल जानेक लगिन तीमुथियुस के भेजलों, काले कि मोंय डरात रहों कहीं एइसन ना होवोक कि परीक्षा करेक वाला शैतान तोहरे के फँसाय तो नी लेई हे, आउर हमर मेहनइत बेकार तो नी होई गेलक।

तीमुथियुस बटले समाचार मिलेक

⁶ मगर एखन तीमुथियुस जे तोहर ठिना से हमर हिंयाँ आय हे, तोहरे केर बिसवास आउर प्रेम केर बारे में शुभ समाचार सुनालक। आउर इ गोइठ के हों सुनालक कि तोहरेमन सोउब बेरा प्रेम केर संगे हमरे के याइद कराला, आउर हमरे के देखेक केर इच्छा रखाला, जइसन हमरे हों तोहरेमन के देखेक चाहिला।

⁷ हे बिसवासी भाईमन, हमरे केर सोउब दुःख आउर सताव में हों, हमरेमन तोहर बारे में तीमुथियुस से सुइन के शांति पाली कि तोहरे यीशु मसीह उपरे बिसवास में मजबूत अहा।

⁸ प्रभु यीशु में तोहर स्थिर रहेक केर संदेश के सुनेक हमर लगिन नवाँ जिंदगी पावेक केर बराबइर अहे।

⁹ आउर जे खुशी हमरे के तोहर चलते अपन परमेश्‍वर केर सामने अहे, उकर बदला तोहर बारे में हमरे परमेश्‍वर के का नियर भरपूर धन्यबाद देवब?

¹⁰ हमरे लगातार राइत दिन प्रार्थना करते रहिला कि दोबारा तोहरे के देखेक पारब आउर प्रभु यीशु मसीह उपरे बिसवास करेक में तोहर मदइत करब।

¹¹ हमरे प्रार्थना करिला कि हमर आबा परमेश्‍वर आउर हमर प्रभु यीशु मसीह तोहर ठिना आवेक लगिन हमरे केर अगुवाई करोक।

¹² हमरे एहो प्रार्थना करिला कि प्रभु यीशु एक दोसर से प्रेम करेक में तोहर मदइत करोक, आउर तोहर प्रेम बढ़ते जाओक जइसन हमर प्रेम हों तोहर लगिन पहिले से अहे।

¹³ ताकि परमेश्‍वर तोहर मन के एइसन मजबूत करोक कि जब हमर प्रभु यीशु अपन पवितर आदमीमन केर संगे घूइर आवी, तो उमन हमर परमेश्‍वर आउर आबा केर सामने पवितर आउर निरदोष ठहरोक।