1 पतरस 4 - सादरी नवाँ नियम

बदलाल जिंदगी

¹ से लगिन जब मसीह काया में होई के दुःख सहलक तो तोहरेमन के हों दुःख सहेक लगिन ओहे स्वभाव से तेयार रहेक चाही जे स्वभाव उकर में रहे। काले कि अगर तोहरे मसीह लगिन दुःख सहेक ले तेयार अहा, तो तोहरे पाप नी करेक केर फैसला काइर लेई हा।

² ताकि आगे अपन बचल काया केर जिंदगी के आदमीमन केर लालसा केर मोताबिक नहीं, बल्कि परमेश्‍वर केर इच्छा केर मोताबिक बिताबा।

³ बितल समय में तोहरेमन गैर बिसवासी आदमीमन नियर बुरा काम करेक में ढेइर समय बरबाद काइर देला। जइसन कि लुच्चा काम करेक केर चाह, ब्यभिचार, मतवारी करेक, रीझ-रंग, पियंक्कड़, आउर मूर्ति पूजा, जेकर से परमेश्‍वर घिरना करेला।

⁴ मगर अब तोहरे अपन पुरना संगमन केर बुरा काम में साथ नी देवाला, से लगिन उमन ताजुब होवैना आउर तोहर बारे में बुरा बोलैना।

⁵ मगर एक दिन उमन जरूर परमेश्‍वर केर सामने फैसला होवेक लगिन ठड़ाबैं आउर परमेश्‍वर उमन में से हर एक झन से उ मनक धरती में करल काममन केर बारे में पूछी। आउर जिंदा आउर मोरलमन केर फैसला करी।

⁶ एहे लगिन मोरलमन के हों मसीह केर बारे में शुभ समाचार सुनाल गेलक, उमन केर काया के सोउब आदमीमन नियर मोरेक पड़लक, मगर अब उमन आत्मा में सोउब बेरा परमेश्‍वर केर संगे रहैना।

परमेश्‍वर केर भला भंडारी

⁷ सोउब गोइठमन केर अंत तुरते होवेक वाला अहे, से लगिन ठीक से सोचा आउर खुद के काबू में रखा, ताकि तोहरे प्रार्थना लगिन तेयार रहेक पारबा।

⁸ आउर सोउब से बेस गोइठ इ हेके कि एक दोसर से गहरा प्रेम करा काले कि अगर तोहरेमन आदमीमन से प्रेम कराला, तो तोहरे सोउब बेरा कोनोवें पाप काम के माफ करेक लगिन तेयार रहबा, जे उमन काइर हैं।

⁹ अपन घर में आदमीमन केर स्वागत करा आउर इके तोहरे बेगर कुड़कुड़ाले करा।

¹⁰ हर एक आदमी के आबा परमेश्‍वर बटले बरदान मिल हे, आउर उ बरदान केर इस्तेमाल उके दोसर आदमीमन केर मदइत लगिन करेक चाही। उमन के अपन बरदानमन केर इस्तेमाल एगो बेस सेवक नियर ठीक ढंग से करेक चाही, जेके परमेश्‍वर अपन किरपा केर साथ देई हे।

¹¹ उदाहरन लगिन अगर तोहर ठिना परचार करेक केर बरदान अहे, तो तोहरे के परमेश्‍वर केर संदेश केर परचार करेक चाही, अगर तोहर ठिना दोसर आदमीमन केर मदइत करेक केर बरदान अहे, तो इके तोहरे उ शक्ति केर साथ करा जेके परमेश्‍वर तोहरे के देवेला, तब जे कुछ हों तोहरे करबा, उकर से यीशु मसीह केर द्वारा परमेश्‍वर केर महिमा होवी। सोउब महिमा आउर शक्ति युग-युग लगिन उकरे हेके। आमीन।

मसीह केर दुःखमन में शामिल होवेक

¹² हे बिसवासी भाईमन, उ दुःख देवेक वाला चीजमन केर बारे में ताजुब ना होवा जेकर खातिर तोहरेमन दुःख उठाथा, काले कि तोहरेमन मसीह केर हेका। मगर इ चीज इ देखाएक लगिन होवाथे कि का तोहरे सच में आबा परमेश्‍वर उपरे बिसवास कराला। से लगिन, इ ना सोचा कि तोहर संगे कुछ अजीब होवाथे।

¹³ सिरिफ इकर बारे में खुश रहा, काले कि तोहरे के उ दुःखमन में एक हिस्सा मिल हे जे मसीह के मिल रहे। इकर चलते, जब मसीह सोउब आदमीमन उपरे अपन महिमा के दिस्तार करेक लगिन फिन से आवी, तो तोहर खुशी सच में बाड़ होवी।

¹⁴ फिन अगर मसीह केर नाँव लगिन तोहर निंदा करल जायला, तो धाइन हेका, काले कि महिमा केर आत्मा, जे परमेश्‍वर केर आत्मा हेके, तोहर उपरे रहेला।

¹⁵ तोहर में से केऊ आदमी हत्यारा चाहे चोर, चाहे बुरा काम करेक से चाहे दोसर मनक काम के रोकेक केर चलते दुःख ना पाओक।

¹⁶ लेकिन अगर केखो मसीही होवेक केर चलते दुःख सहेक होवी, तो तोहरे इके लाजिम होवेक केर गोइठ ना समझा, मगर परमेश्‍वर केर महिमा करा कि तोहरे इ लगिन दुःख सहाथा कि तोहरेमन मसीह केर आदमीमन हेका।

¹⁷ काले कि फैसला करेक केर बेरा आय जाय हे कि पहिले परमेश्‍वर केर आदमीमन केर फैसला करल जाओक, आउर जबकि उ पहिले हमरे बिसवासीमन केर फैसला करी, से लगिन उ भयानक चीजमन केर बारे में सोचा, जे उ आदमीमन केर संगे होवी जेमन उ शुभ समाचार के नी मानैना, जे उकर बटले आवेला।

¹⁸ जइसन कि पवितर किताब कहेला, “अगर एक बेस आदमी केर बचाल जाएक एतना कठिन अहे, तो दुष्ट आउर पापी आदमी केर का होवी?”

¹⁹ से लगिन जेमन उसन दुःख सहैना जइसन परमेश्‍वर चाहेला, उमन के परमेश्‍वर उपरे भरसा करेक चाही जे उमन के बनाय हे। परमेश्‍वर सोउब बेरा उ करेला जेके करेक केर करार उ काइर रहे, से लगिन जे बेस अहे उके करते रहा।