1 पतरस 1 - सादरी नवाँ नियम

जोहार

¹ मोंय पतरस जे यीशु मसीह केर चुनल खास चेला हेकों, इ चिट्ठी के उ परदेसीमन केर नाँव में लिखाथों, जेमन पुन्तुस, गलातिया, कप्पदुकिया, आसिया आउर बितूनिया परदेसमन में तितिर-बितिर होई के रहैना।

² आबा परमेश्‍वर ढेइर पहिलेहें से तोहरेमन के चुइन लेलक आउर पवितर आत्मा केर द्वारा पवितर करलक। परमेश्‍वर एइसन इ लगिन करलक कि तोहरे यीशु मसीह केर आगया मानबा आउर उकर लोहू से शुद्ध होई जबा। मोंय प्रार्थना करोना कि परमेश्‍वर तोहरे के भरपूरी से किरपा आउर शांति देओक।

जिंदगी केर आसरा

³ हमर प्रभु यीशु मसीह केर आबा आउर परमेश्‍वर केर धन्यबाद होवोक, जे अपन बड़का दया से आउर प्रभु यीशु मसीह केर मोरल में से जी उठेक केर द्वारा से हमरे के नवाँ जिंदगी देई हे, आउर जुग-जुग केर जिंदगी केर आसरा देई हे।

⁴ हमरे उ जयजाद के पावेक केर आसरा कराथी, जेके परमेश्‍वर हमर लगिन तेयार काइर हे, जे चीजमन के केऊ कहियो नाश करेक नी पारी। आउर उ कहियो पुरना नी होवी, परमेश्‍वर उ चीजमन के स्वरग में हमरे लगिन राइख हे।

⁵ आउर परमेश्‍वर अपन महान शक्ति से तोहरे के संभराय के राइख हे, काले कि तोहरे यीशु में भरसा कराला, उ तोहरे के मसीह केर घूइर आवेक दिन तक संभराय के राखी, तब तोहरेमन जानबा कि पाप आउर माउत से परमेश्‍वर तोहर पूरा पुरी छुटकारा काइर हे।

⁶ तोहरे के इ सोउब गोइठमन केर बारे में खुश होवेक चाही, जबकि एखन थोरेक समय लगिन रकम-रकम केर दुःखमन से दुःखी अहा।

⁷ इ दुःखमन केर मकसद इ देखाएक हेके कि तोहरे सचमुच में परमेश्‍वर उपरे भरसा कराला कि निहीं, यीशु मसीह में तोहर बिसवास सोना से हों बगरा किमती अहे। जइसन कि सोना के आइग से परखल आउर शुद्ध करल जायला, तइसनेहें अगर तोहरे केर बिसवास कठिन परीक्षामन केर बेरा मजबूत बनल रही, तब एइसन बिसवास से उ दिन जब यीशु मसीह दोबारा घूइर आवी, तो तोहर बगरा स्तुति आउर महिमा आउर आदर होवी।

⁸ तोहरेमन यीशु के कहियो नी देइख हा फिन भी उकर से प्रेम कराला। एखन तोहरेमन उके नी देखाला मगर तोहरे उकर उपरे बिसवास कराला। से लगिन तोहरे खुशी आउर महिमा से मुरुक खुश अहा, जेकर बखाइन करेक नी पराई।

⁹ काले कि परमेश्‍वर तोहरेमन के पापमन केर दंड से छुटकारा देई हे। आउर इ सोउब यीशु मसीह में तोहर बिसवास केर फल हेके।

परमेश्‍वर केर संदेश देवेक वालामन केर गवाही

¹⁰ एहे छुटकारा केर बारे में, उ परमेश्‍वर केर संदेश के बताएक वालामन आउर बगरा जानेक चाहत रहैं, उमन पहिलेहें बताय देई रहैं कि परमेश्‍वर तोहर छुटकारा करेक केर कइसन किरपा करी। उमन इ गोइठमन के धेयान केर साथ खोज बिन आउर जाँच पड़ताल करलैं।

¹¹ मसीह केर आत्मा उमन में रहे, आउर उमन के बतात रहे कि मसीह कइसन दुःख उठाई आउर उके कइसन महिमा देवल जाई। इ लगिन उमन इ खोज-बीन करलैं कि मसीह केहर होवी आउर इ सोउब कहिया होवी।

¹² परमेश्‍वर अपन इ संदेश देवेक वालामन के बतालक कि इ संदेश उ मनक खुद लगिन निहीं बल्कि तोहर लगिन रहे। इ संदेश यीशु मसीह केर बारे में शुभ समाचार हेके जेके तोहरेमन एखन सुनला। परमेश्‍वर स्वरग से अपन पवितर आत्मा के भेजलक कि तोहरे के शुभ समाचार परचार करेक में आदमी मनक मदइत करोक। इ सोउब एतना अदभुत अहे कि स्वरगदूतमन हों लालसा से इ सोउब गोइठमन के होते देखत रहैं।

पवितर जिंदगी जियेक लगिन बोलाल जाएक

¹³ इ लगिन अपन-अपन मन के तेयार करा, जइसन आदमीमन काम करेक ले तेयार होवेक लगिन अपन डाँड़ा के बंधायना। खुद के काबू में रखा आउर उ किरपा केर पूरा आसरा रखा, जेके यीशु मसीह के दोबारा आवेक से तोहरे के देवल जाई।

¹⁴ आउर परमेश्‍वर केर आगया के माना जइसन कि बेस छउवामन अपन आबा केर आगया के मानैना। आउर उ बुरा काममन के ना करा जेके तोहरे उ बेरा करेक चाहत रहा, जब तोहरे परमेश्‍वर केर सच्चाई के नी जानत रहा।

¹⁵ मगर जइसन तोहरे केर बोलेक वाला पवितर अहे, तइसनेहें तोहरे हों अपन सोउब चाइल-चलन में पवितर बना।

¹⁶ काले कि पवितर किताब में लिखल अहे परमेश्‍वर कहेला, “तोहरे के पवितर बनेक चाही काले कि मोंय पवितर अहों।”

¹⁷ जब तोहरे प्रार्थना कराला तो परमेश्‍वर के अपन आबा कहाला, मगर याइद रखा कि उ सोउब आदमीमन केर फैसला एक जइसन करेला, मतलब हरेक केर काम केर मोताबिक। से लगिन जबकि तोहरे इ धरती उपरे एगो परदेसी नियर रहाला, तो तोहरे के परमेश्‍वर लगिन ढेइर सम्मान देवेक चाही।

^18-19 तोहरेमन जानाला कि परमेश्‍वर तोहरे के तोहर बेकार रीति रिवाज से छोड़ाएक लगिन का चीज के इस्तेमाल करलक, जेके तोहरे अपन पुरखामन से सीख रहा, उ तोहरे के छोड़ाएक लगिन एइसन धन-दौलत केर इस्तेमाल नी करलक, जे चाँदी या सोना नियर नाश होई जायला। बल्कि परमेश्‍वर तोहरे के मसीह केर किमती लोहू से कीन हे, जे हमर पापमन केर खातिर बलि केर रूप में मोइर गेलक। उकर माउत हमर लगिन एगो सिद्ध बलि रहे, जइसन कि यहूदी पुरोहितमन केर द्वारा बलि चढ़ाएक वाला मेमना सिद्ध आउर बेगर कोनों दाग या दोष केर होवत रहे।

²⁰ इ दुनिया केर सिरजाल जाएक से पहिले, परमेश्‍वर पहिलेहें से ठहराय लेई रहे कि यीशु मसीह छोड़ाएक वाला होवी। मगर उ तोहर मदइत करेक लगिन इ आखरी दिनमन में धरती में आलक।

²¹ यीशु मसीह जे हमर लगिन करलक उकर चलते तोहरे अब परमेश्‍वर उपरे आसरा कराला। उ ओहे हेके जे यीशु मसीह के मोरेक केर पाछे फिन जिंदा करलक आउर उके महिमा देलक। से लगिन तोहरे बिसवास कराला आउर परमेश्‍वर उपरे तोहर उमीद अब पक्का अहे।

²² काले कि सच्चाई केर पालन करेक केर चलते तोहरे के तोहर पापमन से शुद्ध करल जाय हे, अब तोहरे एक दोसर से अपन भाई नियर तन-मन आउर पूरा दिल से प्रेम करते रहा।

²³ काले कि तोहरेमन के परमेश्‍वर बटले नवाँ जिंदगी मिल हे। तोहरे के जे जिंदगी मिल हे उ एइसन चीजमन से नी मिल हे कि उ नाश होवी बल्कि एइसन चीज से मिल हे जे जुग-जुग लगिन रही। मतलब परमेश्‍वर केर जिंदा आउर जुग-जुग केर बचन से मिल हे।

²⁴ पवितर किताब में लिखल अहे, “सोउब आदमीमन घास नियर अहैं, आउर उ मनक सुंदर दिसेक बान केर फूलमन नियर अहे। घास सूइख जाई आउर फूल झाइर जाई।

²⁵ मगर परमेश्‍वर केर बचन जुग-जुग लगिन स्थिर बनल रही।” इ बचन मसीह केर बारे में शुभ समाचार हेके जेके तोहर माझे परचार करल जाय रहे।