1 कुरिनथियनमन 9 - सादरी नवाँ नियम

यीशु केर चुनल खास चेलामन केर अधिकार आउर जिम्मेदारी

¹ जे कोनों मोंय करेक चाहोना उके करेक लगिन मोंय आजाद अहों। मोंय यीशु केर चुनल खास चेला हेकों, मोंय यीशु के देइख हों जे हमरे केर प्रभु हेके, प्रभु केर लगिन मोर काम केर बदली तोहरेमन फार हेका।

² अगर मोंय दोसरमन लगिन यीशु केर चुनल खास चेला ना लगों, फिन भी तोहर लगिन तो हेकों, काले कि मोंय उ हेकों जे तोहरेमन लगिन शुभ संदेश के लानलों, प्रभु यीशु में तोहर बिसवास पक्का बतायला कि मोंय यीशु केर चुनल खास चेला हेकों।

³ जेमन मोके एगो यीशु केर चुनल खास चेला केर रूप में, मोर अधिकार उपरे सवाल पूछैना, उमन लगिन एहे मोर जबाब हेके।

⁴ का मोंय पौलुस आउर बरनाबास के पइसा-कौड़ी से मदइत पावेक केर अधिकार नखे?

⁵ जब यीशु केर दोसर खास चेलामन, आउर यीशु केर भाईमन आउर पतरस अपन-अपन जनानामन के, सेवा करेक लगिन संगे लेई के जायना, तो हमरे के हों अपन-अपन जनानामन के संगे लेई जाएक केर अधिकार अहे।

⁶ मोके आउर बरनाबास के हों पइसा-कौड़ी से मदइत पावेक केर अधिकार अहे, जइसन यीशु केर दोसर खास चेलामन के अहे, आउर हमरे के अपन रोजी-रोटी लगिन कमाएक केर जरुरत नखे।

⁷ केऊवे फौजी कहियो अपन तनखा खुद देई के फौज केर काम नी करेला, आउर केऊवे आदमी थोरको अंगूर बेगर खाले बारी में अंगूर नी रोपेला, केऊ भेड़ीमन केर दूध बेगर पिले, भेड़ीमन केर चरवाही नी करेला।

⁸ मोंय इ गोइठमन के सिरिफ आदमीमन केर बिचार केर मोताबिक नी कहोना, मगर मूसा केर नियम हों एहे कहेला।

⁹ काले कि मूसा केर नियम में इ लिखल अहे, “दाँवरी करते समय गारू केर मुँह के ना बाँधबा।” का परमेश्‍वर गारूमन केर सिरिफ चिंता करेला? निहीं।

¹⁰ खास काइर के हमर लगिन हें लिखल जाय हे, हाँ हमर लगिन हें लिखल जाय हे, काले कि खेत जोतेक वाला कोनों आसरा से हें जोतेला, आउर दाँवरी करेक वाला हों कुछ हिस्सा पावेक केर आसरा से दाँवरी करेला।

¹¹ हमरे आत्मिक बिहीन तोहर माझे बुइन ही, से लगिन इ आसरा करेक ढेइर बगरा नखे कि हमरे तोहरेमन से दुनिया केर चीजमन के पावब।

¹² जब दोसरमन जेमन तोहरेमन केर माझे शुभ समाचार परचार करलैं उमन के अधिकार अहे, तो बरनाबास आउर मोके हों ओहे अधिकार अहे बल्कि उमन से बगरा अहे। हलांकि हमर में से केऊ हों इ गोइठ उपरे जोर नी देली कि तोहरे हमरेमन के उ चीजमन के देवा, जेके तोहरे से पावेक केर अधिकार हमरे के अहे। मगर इकर बदली हमरे सोउब कुछ सहिला कि हमर बटले केखो, मसीह केर बारे में शुभ समाचार उपरे बिसवास करेक से रुकावाट ना होवोक।

¹³ का तोहरेमन नी जानाला कि जेमन यहूदी मनक मंदिर में सेवा करैना, उमन केर रोजी-रोटी मंदिर में से चलेला, आउर जेमन बेदी में बलिदान चढ़ायना उमन ओहे चढ़ाल चीजमन में से अपन हिस्सा लेवैना।

¹⁴ एहे नियर प्रभु हों ठहराय हे कि जेमन आदमीमन के शुभ समाचार सुनायना, उमन केर रोजी-रोटी शुभ समाचार सुनेक वालामन बटले चलोक।

¹⁵ मगर इ अधिकारमन में से मोंय एको गो के इस्तेमाल नी करलों। आउर मोर लगिन एइसन करल जाओक कइह के इ गोइठमन के मोंय नी लीख हों, काले कि इकर से तो मोइर जाएक हें भला अहे कि केऊ मोर इ घमंड करेक के बेकार ठहराई।

¹⁶ अगर मोंय शुभ समाचार सुनावना तो इकर में मोके घमंड करेक केर कोनों कारण नखे, काले कि इके तो करेक लगिन मोके जिम्मा सोंपल जाय हे, आउर अगर मोंय शुभ समाचार नी सुनामूँ तो मोर उपरे हाय।

¹⁷ अगर मोंय इ काम के अपन इच्छा से करतो, तो मोके इनाम मिलतक, आउर अगर मोके इ काम के करेक केर इच्छा नखे, फिन भी मोके इ काम के करेक लगिन जिम्मा सोंपल जाय हे।

¹⁸ तो मोके कोन सा इनाम मिली? मोंय तो मसीह केर शुभ समाचार के मुफत में सुनावना, जबकि मोके अपन रोजी-रोटी केर लगिन शुभ समाचार सुनाएक से कोनों पावेक केर अधिकार रहे, मगर उके मोंय काम में नी लानोना।

¹⁹ इकर मतलब मोंय आदमीमन केर आगया मानेक लगिन गुलाम नखों कि उमन मोके तनखा देवैना, फिन भी मोंय सोउब केर धांगर बनलों ताकि मोंय उमन के मसीह ठिना लेई लानमूँ।

²⁰ से लगिन जब मोंय यहूदीमन केर संगे अहों तो मोंय यहूदीमन नियर रहलों, ताकि उमन के हों मसीह ठिना लेई लानमूँ। आउर जब मोंय उमन केर संगे रहलों, जेमन मूसा केर नियम के मानैना, तो मोंय हों नियम केर अधीन रहलों, जबकि मोके मूसा केर नियम के पालन करेक केर जरुरत नखे, मोंय एइसन इ लगिन करलों ताकि जेमन मूसा केर नियम केर अधीन अहैं, उमन के मसीह ठिना लेई लानमूँ।

²¹ एहे नियर जब मोंय परजाइतमन केर संगे काम करोना, तो मोंय परजाइतमन नियर रहलों, जेमन परमेश्‍वर केर नियम के नी मानैना, ताकि उमन के मसीह लगिन जितेक पारमूँ। हालाँकि मोंय परमेश्‍वर केर नियम से आजाद नखों।

²² जब मोंय उमन केर संगे रहलों जेमन बिसवास में कमजोर अहैं, तो मोंय ओहेमन नियर ब्यवहार करलों, ताकि मोंय उमन के मसीह केर पिछे चलेक में मदइत करेक पारमूँ। मोंय सोउब आदमीमन लगिन सोउब नियर बनलों, ताकि मोंय कोनों नी कोनों नियर कायनों झन केर छुटकारा करुवाएक पारमूँ।

²³ आउर मोंय सोउब कुछ मसीह केर बारे में शुभ समाचार के परचार करेक लगिन करोना, ताकि मोंय हों शुभ समाचार केर फायदा में से हिस्सा पामूँ।

मसीही दौड़

²⁴ का तोहरे नी जानाला कि दौड़ में तो सोभे शामिल होवैना, मगर इनाम एके झन के मिलेला, तोहरेमन एइसन दौड़ा कि इनाम जितबा।

²⁵ आउर हरेक पहलवान अपन काया केर सोउब रकम केर इच्छामन के रोकेला, उ तो एगो मुरझाएक वाला मुकुट के पावेक लगिन इ सोउब के करेला। मगर हमरे तो उ मुकुट के पावेक लगिन मेहनइत करिला जे मुरझाएक वाला नखे।

²⁶ इकरे चलते मोंय निशाना के देइख के कुदोना, जइसन कि एगो पहलवान अपन मुटका के हवा में नी चलायला मगर अपन बिरोधी केर काया में चलायला, सेहे लेखे मोंय अपन मसीही जिंदगी के एगो खास मकसद से जियोना।

²⁷ मोंय अपन काया के काबू में रखोना ताकि इकर बुरा इच्छामन के पूरा नी करमूँ, कहीं एइसन ना होवोक कि मोंय दोसरमन के शुभ समाचार परचार काइर के खुद हें इनाम पावेक से छूइट जामूँ।