1 कुरिनथियनमन 7 - सादरी नवाँ नियम

सादी केर बारे में सवाल

¹ अब मोंय तोहरे केर चिट्ठी में लीख के पुछल सवालमन केर जबाब देमूँ, “का सादी नी करेक हमरेमन लगिन बेस हेके?”

² मगर हमरेमन के ब्यभिचार केर पाप में गिरेक केर परीक्षा में पड़ेक ढेइर सहज अहे, से लगिन हरेक मरद के सादी करेक आउर अपन जनाना लगिन बिसवास लायक बनल रहेक अहे, आउर हरेक जनाना के हों सादी करेक आउर अपन पति लगिन बिसवास लायक बनल रहेक अहे।

³ पति अपन जनाना केर हक के पूरा करोक, आउर तइसनेहें जनाना हों अपन पति केर।

⁴ जनाना के अपन काया उपरे अधिकार नखे मगर उकर पति के अधिकार अहे, तइसनेहें पति के हों अपन काया उपरे अधिकार नखे मगर उकर जनाना के अहे।

⁵ तोहरेमन एक दोसर से अलग ना रहा, मगर सिरिफ थोरेक समय ले प्रार्थना करेक लगिन एक दोसर केर मरजी से अलग रहबा, इकर पाछे फिन एके संगे रहबा जइसन पति आउर पत्नी के रहेक चाही, ताकि शैतान तोहरे के ब्यभिचार में गिराएक लगिन परीक्षा ना करोक, निहीं तो तोहरेमन खुद के काबू करेक नी पारबा।

⁶ मगर मोंय जे इ कहोना उ अनुमति हेके ना कि आगया।

⁷ मोंय इ चाहोना कि जइसन मोंय पौलुस सादी नी काइर हों, तइसनेहें सोउब आदमीमन हों रहोक, मगर हरेक झन के परमेश्‍वर बटले अलग-अलग बरदान मिल हे, परमेश्‍वर केखो सादी करेक केर बरदान देई हे, तो केखो एकले रहेक केर बरदान देई हे।

सादी नी करवइयामन के सलहा

⁸ अब मोंय बेगर सादी करलमन आउर बिधवामन केर बारे में कहोना कि उमन लगिन बेगर सादी करले रहेक बेस हेके जइसन मोंय अहों।

⁹ मगर, अगर उमन खुद के काबू करेक नी पारबैं तो सादी करोक, काले कि शांत नी होवेक वाला इच्छामन में जिंदगी बिताएक से सादी करेक भला अहे।

सादी सुदामन के सलहा

¹⁰ जेमन केर सादी होई जाय हे, उमन के मोंय निहीं बल्कि प्रभु यीशु आगया देवेला कि जनाना अपन पति के ना छोड़ोक।

¹¹ (आउर अगर छोइड़ हों देवी तो बेगर दोसर सादी करले रहोक, या फिन अपन पति से मेल काइर लेवोक)। आउर ना पति अपन जनाना के छोड़ोक।

¹² अब इ प्रभु केर आगया ना लगे मगर मोंय तोहरे दोसर बिसवासीमन से कहाथों, जेमन अबिसवासीमन से सादी काइर हा, अगर केऊ बिसवासी भाई केर जनाना बिसवास नी करेला, मगर अपन पति केर संगे रहेक चाहेला, तो पति उके ना छोड़ोक।

¹³ आउर जे जनाना केर पति बिसवास नी करेला आउर अपन जनाना केर संगे रहेक चाहेला, तो उ जनाना अपन पति के ना छोड़ोक।

¹⁴ काले कि अगर तोंय एगो मसीही जनाना गैर मसीही पति संगे अहिस, तो तोर पति तोंय मसीही जनाना केर चलते परमेश्‍वर केर हेके। आउर अगर तोंय एगो मसीही पति एगो गैर मसीही जनाना केर संगे अहिस, तो तोर जनाना तोंय मसीही पति केर चलते परमेश्‍वर केर हेके। अगर एइसन नी होतक तो तोर छउवा पुतामन परमेश्‍वर केर नी कहातैं, मगर अब तोर छउवा पुतामन हों परमेश्‍वर केर हेकैं।

¹⁵ अगर अबिसवासी पति चाहे पत्नी, बिसवासी पति चाहे पत्नी से अलग होवेक चाहेला, तो उमन के अलग होवेक देवा। जब एइसन होवेला तो, बिसवासी अपन सादी केर बंधन से आजाद अहे। मगर, अगर संभव होवी तो अपन अबिसवासी पति चाहे पत्नी से, सादी केर रिश्ता में बाँधल रहोक। काले कि परमेश्‍वर हमरे के एक दोसर संगे शांति से जिंदगी जियेक लगिन बोलाय हे।

¹⁶ हे जनानामन इके जरूर याइद करा कि तोहरे केर चलते तोहर पतिमन केर जिंदगी बचेक परायला, आउर तोहरे पतिमन हों इके जरूर याइद करा कि तोहरे केर चलते तोहर जनानामन केर जिंदगी बचेक परायला।

परमेश्‍वर केर बोलाएक मोताबिक चला

¹⁷ जे मोंय कइह हों उकर निचोड़ इ हेके: हरेक झन ओहे दशा में बनल रहोक जे दशा में उके परमेश्‍वर बटले बोलाल जाय रहे, आउर उ प्रभु से जे बरदान पाय हे उकरे मोताबिक जिंदगी बिताओक, मोंय सोउब कलीसियामन लगिन एहे नियम ठहराय हों।

¹⁸ उदाहरन केर रूप में जब एगो यहूदी प्रभु यीशु में बिसवास करेला, तो उके यहूदी बनल रहेक के छोड़ेक नखे। सेहे लेखे एगो आदमी जे यहूदी ना लगे, प्रभु यीशु उपरे बिसवास करेला तो उके यहूदी बनेक लगिन खतना कराएक केर जरुरत नखे।

¹⁹ चाहे एगो आदमी खतना करुवाहे या निहीं, इकर से कोनों फरक नखे, मगर परमेश्‍वर केर आगयामन के मानेक हें सोउब कुछ हेके।

²⁰ हरेक झन जे दशा में बोलाल जाय हे ओहे दशा में रहोक।

²¹ अगर तोंय धांगर केर दशा में बोलाल जाय हिस, तो तोके इकर बारे में बुरा सोचेक नखे, मगर, अगर तोंय आजाद होवेक केर मोका पाविसला तो आजाद होई जा।

²² काले कि जे धांगर केर दशा में प्रभु ठिना बोलाल जाय हे, उ आजाद आदमी नियर अहे काले कि उके प्रभु यीशु उकर पापमन से आजाद काइर हे। आउर जे आजाद करल दशा में बोलाल जाय हे, उ मसीह केर दास बनोक।

²³ परमेश्‍वर तोहरेमन के दाम देई के कीन लेई हे, आदमीमन केर धांगर ना बना मगर परमेश्‍वर केर धांगर बना।

²⁴ हे बिसवासी भाईमन, जे केऊ जइसन दशा में बोलाल जाय हे, उ ओहे दशा में परमेश्‍वर केर संगे रहोक।

डिंड़ा आउर बिधवामन

²⁵ डिंड़ा कन्यामन केर बारे में प्रभु केर कोनों आगया मोके नी मिललक, मगर प्रभु अपन दया से मोके बुद्धि देई हे जे बिसवास लायक अहे, जेकर से मोंय सलहा देवोना।

²⁶ कठिनाईमन केर चलते, जे बिसवासीमन केर जिंदगी में आइज काइल सोउब ठिना होवाथे, मोंय तोहरेमन लगिन भला सोचाथों कि जेमन सादी नी काइर हैं उमन सादी ना करोक।

²⁷ अगर तोर जनाना अहे तो उकर से बनल रह, आउर अगर जनाना नखे तो सादी ना कर।

²⁸ मगर तोंय सादी हों करबे तो पाप ना लगे, आउर अगर डिंड़ा कन्या सादी करेला तो कोनों पाप ना लगे, मगर एइसनमन के काया केर दुःख होवी आउर मोंय बचाएक चाहोना।

²⁹ हे बिसवासी भाईमन, मोंय इ कहोना कि यीशु मसीह केर दोबारा घूइर आवेक से पहिले अब बगरा समय बचल नखे, सेकर चलते तोहर ठिना तोर जनाना अहे चाहे नखे ढेइर चिंता ना करा, मगर परमेश्‍वर केर सेवा करेक केर बारे में सोचते रहा।

³⁰ आउर जेमन काँदाला, चाहे जेमन खुश अहा, चाहे जेमन दुनिया केर चीजमन के अपन करेक लगिन किनाला, इ सोउब गोइठमन केर बारे में बगरा चिंता नी करेक चाही, काले कि इ सोउब तोहरे के परमेश्‍वर केर सेवा करेक से दूर लेई जाई।

³¹ आउर इ दुनिया में जे कोनों चीजमन हमरे ठिना अहे, हमरे के उ चीजमन के ढेइर खास नी समझेक चाही, काले कि इ दुनिया केर सोउब चीजमन ढेइर दिन तक नी रही।

³² मोंय इ चाहोना कि तोहरेमन इ जिंदगी केर इच्छामन केर बारे में चिंता ना करबा। जे आदमी सादी नी काइर हे उ प्रभु केर सेवा कइसन करेक अहे उकर चिंता करेला।

³³ मगर सादी करल आदमी इ दुनिया केर गोइठमन केर चिंता करेला कि अपन जनाना के कइसन खुश रखी।

³⁴ सादी करल आदमी केर मन में दूई गो बिचार रहेला, अपन जनाना के खुश करेक केर बिचार आउर प्रभु के हों खुश करेक केर बिचार। जे सादी नी काइर हे उ आदमी सिरिफ प्रभु केर सेवा करेक केर चिंता करेला। ओहे नियर बेगर सादी करल जनाना हों प्रभु केर सेवा करेक केर चिंता करेला कि काया आउर आत्मा दुयो में पवितर रहोक, मगर सादी करल जनाना दुनिया केर चिंता करेला कि अपन पति के कइसन खुश रखी।

³⁵ इ गोइठ के मोंय तोहरेमन केर भलाई लगिन कहोना, ना कि तोहरेमन के फँसाएक लगिन, बल्कि इ लगिन कि जइसन शोभेला तइसनेहें करल जाओक, तोहरेमन एक मन होई के प्रभु केर सेवा में लगल रहा।

³⁶ अगर तोहर में से केऊ अपन बेटी के डिंड़ाय छोइड़ हे, आउर अब उ सोचेला कि मोंय बेटी केर हक के माराथों, उकर सादी होवेक चाही तो उकर सादी काइर देवोक, उ अपन बेटी केर सादी करुवाय के कोनों पाप नी कराथे।

³⁷ मगर, अगर इ आदमी अपन मन में पक्का फैसला काइर लेई हे कि अपन बेटी के डिंड़ाय छोड़मूँ, तब उके अधिकार अहे कि जइसन फैसला उ काइर हे तइसनेहें करोक, उ परमेश्‍वर केर देखेक में भला कराथे।

³⁸ से लगिन जे अपन डिंड़ा कन्या केर सादी काइर देवेला उ बेस करेला, आउर जे सादी नी काइर देवेला उ आउर हें बेस करेला।

³⁹ जब तक केऊ जनाना केर पति जिंदा रहेला, तब तक उ उकर हें संगे रहोक, मगर जब उकर पति मोइर जाई, तो उ, प्रभु में जे बिसवास करेला उकर से सादी करेक पारेला।

⁴⁰ मगर, अगर उ जइसन अहे तइसनेहें रहेक चाही, तो मोर बिचार में आउर हें धाइन अहे, आउर मोंय समझोना कि इ सलहा मोंय परमेश्‍वर केर आत्मा बटले देवाथों।