1 कुरिनथियनमन 5 - सादरी नवाँ नियम

कलीसिया में ब्यभिचार

¹ मोंय आदमीमन से तोहर बारे में भयानक गोइठमन के बताते सुइन हों, जे तोहरे केर माझे होवाथे कि कलीसिया में तोहर में से थोरेक आदमीमन ब्यभिचार करैना, बल्कि एइसन ब्यभिचार जइसन अबिसवासीमन हों नी करैना कि एगो आदमी अपन सौतेली आयो से ब्यभिचार करेला।

² तोहरेमन के इकर बारे में दुःख आउर शोक से भाइर जाएक चाही आउर उ आदमी के जे एइसन काम करलक उके कलीसिया से निकलाय देवेक चाही, मगर तोहरेमन घमंड कराला।

³ जबकि मोंय तोहरे से दूर अहों, फिन भी इ एइसन अहे जइसन कि हूवाँ मोंय तोहरे से भेंट कराथों आउर जे उ काम काइर हे उकर उपरे न्याय के लानाथों।

⁴ तोहरे के इ करेक केर जरुरत अहे, बिसवासी केर रूप में एक संग जमा होवा, इ जानते हुए कि तोहरे ठिना सचमुच हमर प्रभु यीशु मसीह केर अधिकार अहे, आउर इ एइसन अहे कि मोंय हों अपन मन में हूवाँ अहों, आउर प्रभु यीशु मसीह केर शक्ति केर द्वारा

⁵ जे आदमी एइसन पापी ब्यवहार करेला, उके कलीसिया से निकलाय देवा आउर शैतान केर हाँथ में सोंइप देवा। ताकि उ अपन पाप करेक छोइड़ देवी, अगर उ आदमी पाप करेक छोइड़ देवेला, तो उ सचमुच में उ दिन बाइच जाई जब प्रभु फैसला करी।

⁶ तोहरेमन के घमंड करेक नी चाही, का तोहरे नी जानाला कि थोरे सुन खमीर पूरा गूंधल आटा के खमीर बनाय देवेला।

⁷ उ पापी आदमी के कहलक कि उ तोहरे केर झूँड़ केर हिस्सा नी होवेक पारी, तब तोहरे बिसवासीमन केर एगो एइसन झूँड़ होवी जेमन नवाँ आउर शुद्ध रिश्ता आउर बेगर पाप केर असर से, एक दोसर से मिलल रहबैं, काले कि परमेश्‍वर पहिलेहें तोहरे केर पाप के क्षमा काइर हे, आउर तोहरे के पवितर बनाय हे। तोहरे के शुद्ध रीति से जिंदगी जियेक अहे, काले कि मसीह बलिदान केर रूप में हमरे के पापमन से आजाद करेक लगिन मोइर हे। इ हमरे के उ मेमना केर याइद करुवायला जेके इसराइलीमन ढेइर पहिले फसह परब केर दिन मिसर में बलि काइर रहैं।

⁸ से लगिन मोंय कहोना, हमरे के हमेशा परमेश्‍वर केर पवितर आदमी नियर ब्यवहार करेक चाही। हमरे के बुरा रीति से नी जियेक चाही जइसन हमरे पहिले जीयत रही, हमरे मसीह में बिसवास करिला, से लगिन हमरे के दुष्ट आउर बुरा काममन के छोड़ेक चाही जेमन के हमरे करत रही। हमरे के परमेश्‍वर केर आगयामन के मानेक अहे ना कि बुरा काममन के करेक अहे, इकरे चलते हमरे के हमेशा सावधान आउर बिसवास लायक रहेक अहे।

⁹ मोंय मोर अपन पहिले केर चिट्ठी में तोहरेमन के लीख हों कि ब्यभिचारीमन केर संगति ना करबा।

¹⁰ इ निहीं कि तोहरेमन बिलकुल इ दुनिया केर ब्यभिचारीमन, या लोभीमन, या दोसर के ठाकेक वालामन, या मूर्ति पूजा करेक वालामन से संगति ना करबा, काले कि एइसन करेक से तो तोहरेमन के इ दुनिया के छोइड़ देवेक पड़तक।

¹¹ मोर कहेक इ हेके कि अगर केऊ खुद के एगो बिसवासी कहेला आउर ब्यभिचार, लोभ आउर मूर्ति पूजा करेला, आउर मतवारी करेक वाला आउर ठाकेक वाला हों हेके तो उकर से संगति ना करबा, बल्कि एइसन आदमी से बाइठ के खाबो ना करबा।

¹² काले कि जेमन बिसवासी ना लगैं उमन के दोषी ठहराएक हमरे केर जिम्मेदारी ना लगे, मगर जेमन हमरे केर कलीसिया केर हिस्सा हेकैं उमन के हमरे के जरूर चेताएक अहे।

¹³ कलीसिया से बाहरे केर आदमी केर फैसला परमेश्‍वर करेला, मगर जइसन कि पवितर किताब में लिखल अहे, बुरा काम करेक वाला आदमी के कलीसिया में संगति करेक ना देवा।