1 कुरिनथियनमन 3 - सादरी नवाँ नियम

कलीसिया में गुटबाजी केर निंदा

¹ हे बिसवासी भाईमन, जब मोंय तोहरेमन केर संगे रहों तब गहरा शिक्षा के सिखाएक नी पारलों, जइसन कि मोके आत्मिक आदमीमन के सिखाएक रहे। मगर मोंय एइसन गोठियालों जइसन कि तोहरे इ दुनिया केर हेका आउर मसीह में नवाँ बिसवासी हेका।

² उ बेरा मोंय तोहरेमन के परमेश्‍वर केर संदेश में से शुरुवात केर शिक्षा के सिखालों, जइसन एगो आदमी छउवा के पियेक लगिन दूध देवेला। मोंय परमेश्‍वर केर बचन से गहरा सच्चाईमन के नी सिखालों जे ठोस आहार नियर अहे, काले कि तोहरेमन इकर ले तेयार नी रहा।

³ काले कि तोहरेमन एखन तक पाप से भरल इच्छामन केर चलाएक से चलाला, इ लगिन कि जब तोहरेमन में हिसिंगा आउर झगरा अहे, तो का इ सबूत ना लगे कि तोहरेमन पाप से भरल इच्छामन केर चलाएक से चलाला? का तोहरेमन इ दुनिया केर आदमीमन नियर नी चलाला?

⁴ काले कि जब एगो कहेला, “मोंय पौलुस केर हेकों,” आउर दूसरा, “मोंय अपुल्लोस केर हेकों,” तो का तोहरेमन इ दुनिया केर आदमीमन नियर नी चलाला?

⁵ अपुल्लोस के हेके? आउर पौलुस के हेके? उमन सिरिफ परमेश्‍वर केर सेवक हेकैं, जेमन केर द्वारा तोहरेमन मसीह में बिसवास करला, हमर में से हरेक झन उ काम के करली जेके प्रभु हमरे के करेक लगिन देई रहे।

⁶ अगर मोंय तोहरे के एगो बारी से जोड़ी करमूँ, तो मोंय गाँछ रोपलों, अपुल्लोस पटालक, मगर परमेश्‍वर बढ़ालक।

⁷ से लगिन जे रोपेला आउर जे पटायला उमन खास ना लगैं, मगर परमेश्‍वर जे बढ़ाएक वाला अहे ओहे खास हेके।

⁸ मोंय तोहरे के शुभ समाचार परचार करलों आउर परमेश्‍वर केर बचन के सिखाएक शुरु करलों, आउर अपुल्लोस तोहरे के लगातार सिखाते रहलक, मगर हमरे दुयो केर एके मकसद अहे, आउर हमरे अपनेहें मेहनइत केर मोताबिक परमेश्‍वर से अपनेहें मजूरी पावब।

⁹ काले कि हमरे परमेश्‍वर केर संगे काम करेक वाला हेकी, आउर तोहरेमन एगो खेत नियर अहा जे परमेश्‍वर केर हेके।

¹⁰ जे काम परमेश्‍वर मोके करेक लगिन देई हे उके मोंय बुद्धिमानी से करलों, मोंय तोहरे केर शहर में शुभ समाचार केर परचार करलों, आउर पहिले तोहर में से आदमीमन के यीशु उपरे बिसवास करेक में मदइत करलों। इकर पाछे जे काम के मोंय करलों उके दोसर सेवकमन आगे बढ़ालैं, मगर हमर में से हरेक सेवक के धेयान से बिचार करेक चाही कि परमेश्‍वर केर काम कइसन करेक अहे।

¹¹ छुटकारा पावेक लगिन केऊ तोहरे के नवाँ डहर केर बारे में ना सिखाओके, काले कि छुटकारा पावेक लगिन एके गो डहर अहे जेकर बारे में मोंय तोहरे के पहिलेहें बताय देई हों, परमेश्‍वर हमरे के यीशु मसीह केर द्वारा छुटकारा देवेला।

¹² अगर मसीह केर सेवकमन उ शिक्षा के सिखायना जेके परमेश्‍वर उमन के देई हे, तब उमन उ राज मिस्त्रीमन नियर अहैं, जेमन नेव में बेस किसिम केर चीजमन के देई के घर बनायना, जइसन कि सोना, चाँदी आउर किमती पखनामन। मगर, अगर उमन झूठा शिक्षा के सिखायना, तब उमन एइसन राज मिस्त्रीमन नियर अहैं, जेमन कमजोर चीजमन के नेव में देवैना, जइसन कि काठ, सुखल घास आउर पोरा।

¹³ मगर न्याय केर दिन जब मसीह फिन से घूइर आवी, तब आइग हरेक झन केर काम केर गुण के देखाई, अगर केकरो काम केर कोनों कीमत अहे तो आइग उके देखाई,

¹⁴ अगर केकरो काम नी पोड़ी तो उ मजूरी पावी।

¹⁵ मगर जब केकरो काम केर बारे में मसीह कही कि उकर काम बेस नखे, तो उ सेवक मसीह से कोनों इनाम नी पावी, फिन भी उ जुग-जुग केर जिंदगी के नी गवाँई, जेके परमेश्‍वर उके देई हे।

¹⁶ तोहरेमन पक्का जानाला कि तोहरे खुद परमेश्‍वर केर मंदिर हेका, आउर परमेश्‍वर केर आत्मा तोहर में बास करेला।

¹⁷ तोहरेमन जे कि परमेश्‍वर केर मंदिर नियर अहा, अगर केऊ तोहरेमन केर माझे आपस में फूट करुवायला, तो परमेश्‍वर उके कड़ा सजा देवी।

¹⁸ खुद के धोखा ना देवा, अगर तोहर में से केऊ इ दुनिया केर आदमीमन केर देखेक में खुद के गेयानी समझेला, तो उके खुद इ दुनिया केर आदमीमन केर देखेक में मूरख बनेक चाही, ताकि उ परमेश्‍वर केर देखेक में सचमुच गेयानी बनेक पारी।

¹⁹ काले कि इ दुनिया केर आदमीमन जे गोइठमन के गेयान समझैना, परमेश्‍वर केर भीरे मूरखता हेके, जइसन पवितर किताब में लिखल अहे, “थोरेक आदमीमन सोचैना कि हमरे गेयानी अही, मगर परमेश्‍वर उमन के हरुवाएक लगिन अपन गेयान केर इस्तेमाल करेला।”

²⁰ आउर पवितर किताब में फिन लिखल अहे, “प्रभु गेयानीमन केर सोच बिचारमन के जानेला कि उ बेकार हेके।”

^21-22 इ लगिन इ दुनिया केर केऊ अगुवा केर पिछे चलेक उपरे घमंड ना करा। पौलुस आउर अपुल्लोस आउर पतरस सोउब तोहरे केर हेकैं, सचमुच में सोउब कुछ तोहरे केर हेके, इ दुनिया, जिंदगी, माउत, एखन केर बेरा आउर आवेक वाला बेरा, सोउब कुछ तोहरे केर हेके,

²³ आउर तोहरे मसीह केर अधीन अहा, आउर मसीह परमेश्‍वर केर अधीन अहे।